Мактабларнинг маънавий ва маърифий ишлар бўйича директор ўринбосарлари ва амалиётчи психологлари учун семинар-тренинг ташкил этилди

Яқинда Амударё тумани Мактабгача ва мактаб таълими бўлими тасарруфидаги 38-сонли умумтаълим мактабида тумандаги умумтаълим мактабларининг маънавий ва маърифий ишлар бўйича директор ўринбосарлари ва амалиётчи психологлари учун семинар-тренинг машғулотлари ташкил этилди.

Президентнинг 2025 йил 3 январь кунги “2025 йилда республика маҳаллаларида хавфсиз муҳитни яратиш ва ҳуқуқбузарликларнинг барвақт олдини олиш тизими самарадорлигини янада ошириш бўйича чора-тадбирлар тўғрисида”ги Қарорига мувофиқ белгиланган вазифалар ижросини таъминлаш мақсадида ташкил этилган семинар ёшлар орасидаги салбий хулқ-атворни бартараф этиш ва ижтимоий меъёрдан оғиш ҳолатларининг олдини олишга қаратилган амалий йўналишларни янада мустаҳкамлашга хизмат қилди.

Тадбирда Ўзбекистон Республикаси ташхис маркази методисти Гулбаҳор Юсупова, Қорақалпоғистон Республикаси Мактабгача ва мактаб таълим вазирлиги масъул ходими Эркин Нуртаев, Қорақалпоғистон Республикаси Соғликни сақлаш вазирлиги масъул ходими Ойимхон Давлатмуратова, туман мактабгача ва мактаб таълими бўлими бошлиғи Ялғаш Шомуротов ва бўлим методисти Нурбек Сейтбоевлар иштирок этди.

Семинарда турли мавзулар муҳокама қилинди. Хусусан, вояга етмаган ўқувчи-ёшлар орасида ижтимоий меъёрдан оғиш ҳолатларини юзга келтирувчи омиллар, болаларни зўравонликнинг барча шаклларидан ҳимоя қилишга доир қонунчилик ва салбий хулқ-атворнинг олдини олиш ва бартараф этиш бўйича мактаб психологи иш режасига мувофиқ амалга ошириладиган вазифалар қамраб олинди.

Ўзбекистон Республикаси ташхис маркази методисти Гулбаҳор Юсупова машғулот давомида вояга етмаган ёшлар орасидаги ижтимоий меъёрдан оғиш ҳолатларини келтирувчи омилларни атрофлича тушунтириб ўтди. Айниқса, оилавий омилларнинг — ота-онанинг эътиборсизлиги ёки зўравонлиги, оилавий низолар ва ажралишларнинг ёшларга қандай таъсир кўрсатишини таъкидланди. Шунга қўшимча равишда, ўқитувчиларнинг эътиборсизлиги ёки адолатсизлигининг ҳам ёшларнинг салбий хулқ-атворига таъсири мавжудлигига эътибор қаратилиб, мактаб ва таълим тизими билан боғлиқ муаммолар ҳам қайд этилди.

Мутахассис салбий хулқ-атворнинг олдини олиш ва бартараф этишда самарали усулларга тўхталди. Мазкур усуллар оила, мактаб ва жамоада муҳаббатга асосланган муҳитни барпо этиш, тўғри тарбия бериш ва намуна бўлиш каби муҳим омилларни ўз ичига олади. Шунингдек, болаларни спорт, санъат ёки фанга жалб қилиш орқали салбий хатти-ҳаракатларнинг олдини олиш мумкинлигини қайд этилди.

Қорақалпоғистон Республикаси Мактабгача ва мактаб таълим вазирлиги масъул ходими Эркин Нуртаев томонидан болаларни зўравонликнинг барча шаклларидан ҳимоя қилишнинг муҳимлигини таъкидланди. Болаларни жисмоний, руҳий, жинсий, зўравонлик, эксплуатация ва буллингдан ҳимоя қилиш учун мамлакатда белгиланган асосий йўналишлар кўрсатилди.

Семинар давомида таълим ва тарбия соҳасидаги мутахассислар, психологлар ва масъул ходимлар ҳамкорликда ёшлар орасидаги салбий хулқ-атворнинг олдини олиш ва бартараф этиш бўйича амалий тавсиялар беришди. Шу билан бирга, ўқитувчилар ва ота-оналар учун махсус тренинглар ташкил этиш, ёшлар ўртасидаги ижтимоий фаолликни оширишга қаратилган тадбирлар олиб бориш бўйича янги таклифлар билдирилди. Тадбирнинг якунида, болаларнинг ҳуқуқларини ҳимоя қилиш, уларнинг ҳаёти ва саломатлигини сақлаш бўйича янада кенг қамровли чора-тадбирлар белгилаб олинди.

Бу каби тадбирлар ёшларга салбий таъсир кўрсатувчи омилларни бартараф этиш ва келажакда ҳаммамиз учун барқарор ва хавфсиз муҳитни таъминлаш учун муҳим аҳамиятга эга. Семинарда берилган амалий тавсиялар ва йўналишлар ёшларнинг ижтимоий муаммоларини бартараф этиш ва уларнинг келажагини яхши йўналишда шакллантиришга катта ҳисса қўшади.

Шоҳзод Қурбонбоев.