Амударё туманида чигит экиш ишлари бошланди

Мамлакатимиз аҳолисининг асосий қисми банд бўлган қишлоқ хўжалиги соҳасида пахтачиликни илм ва инновациялар орқали ривожлантириш, ер ва тупроқ хусусиятларини ҳисобга олган ҳолда уруғлик маҳсулотларини танлаш, ерга қадалган уруғнинг бехато униб чиқишини таъминлаш мақсадида пахтачилик йўналишида фаолият олиб борувчи қишлоқ хўжалик корхоналари ва фермер хўжаликлари томонидан ҳар йили эрта баҳорда чигит экиш мавсумига алоҳида эътибор қаратилади. Чунки пахтачиликда юқори натижаларга эришиш айнан баҳорги тадбирларнинг аниқ ва пухта ташкил этилишига боғлиқ.

Жорий йил Амударё туманида пахта экиладиган майдонларни чигит экишга тайёрлаш ва мавсумни самарали ташкил этиш борасидаги режали саъй-ҳаракатлар, қолаверса, баҳор фаслининг аввалги йилларга нисбатан эрта ва илиқ келгани сабабли деҳқонлар учун Наврўз – қўшалоқ айёмга – янги меҳнат фаслига, яратиш ва яшнатиш байрамига айланиб кетди.

20 март куни Амударё туманида 2025 йилги ҳосил учун чигит экиш мавсумининг бошланишига бағишланган кўргазмали семинар ташкил этилиб, унда соҳага масъул ташкилотлар, пахтачилик кластер корхоналари ҳамда фермер хўжаликлари раҳбарлари, қишлоқ хўжалиги мутахассислари иштирок этдилар.

Кўргазмали семинарда Қорақалпоғистон Республикаси Жўқорғи Кенгеси Раиси Аманбай Оринбаев иштирок этди.

Семинар аввалида нуроний отахонлар дуога қўл очиб, ерга илк уруғ қадаш мавсумини бошлаб бердилар. Чигит экиш сеялкалари дала бўйлаб бир текис жўяклар ҳосил қилиб, деҳқон ва фермерлар шу кундан бошлаб Амударё туманининг юксак пахта хирмонини бунёд этиш борасидаги қизғин меҳнат фаслига киришдилар.

Кўргазмали семинарда Қорақалпоғистон Республикаси Жўқорғи Кенгеси Раиси Аманбай Оринбаев нутқ сўзлаб, сўнгги йилларда давлатимиз раҳбари томонидан Қорақалпоғистон Республикасини ижтимоий-иқтисодий ривожлантириш масаласига алоҳида эътибор берилаётгани, айниқса, қишлоқ хўжалигини замон талаблари даражасига кўтариш, аҳоли фаровонлигини оширишга қаратилган қатор Фармон ва Қарорлар қабул қилингани, шу асосда аввал бўлмаган имконият ва имтиёзлар яратилгани хусусида батафсил тўхталди. Ўтган қисқа вақт мобайнида Республикага, шу жумладан Амударё туманига ҳам қишлоқ хўжалиги учун зарур бўлган замонавий техника ва агрегатлар олиб келиниб, иш суръатининг ошишига самарали таъсир кўрсатганини алоҳида таъкидлади.

Кўргазмали семинар давомида сўзга чиққанлар муҳтарам Президентимизнинг алоҳида эътибори боис, Амударё туманида пахтачилик маданияти йил сайин юксалиб бораётгани ҳақида сўз юритишиб, иштирокчилар жорий йилги чигит экиш мавсумини қисқа фурсатларда, сифатли амалга ошириш бўйича ўзаро фикр алмашдилар.

Семинарда тумандаги қишлоқ хўжалигига мўлжалланган 32 минг 497 гектар майдонга баҳорги экинларни ўз муддатларида ва сифатли тарзда экиш, бу борада қишлоқ хўжалик корхоналари раҳбарлари ва фермерлар эътибор қаратиши лозим бўлган масалалар бўйича таклиф ва тавсиялари берилди.

Амударё туманида жорий деҳқончилик йилида 16 минг гектар майдонга, шундан 12 минг 985 гектарга “Султон”, 615 гектарга “Равнақ-2” ва 2 минг 400 гектар майдонга хорижий навли чигит экиш, ҳосилдорликни ҳар гектар ҳисобига 35 центнерга, ялпи пахта ҳосилини 57 минг 220 тоннага етказиш режалаштирилган. Экиш мавсумини сифатли ва уюшқоқлик билан ўтказиш мақсадида 960 тонна уруғлик чигит тайёрланиб, 16 ҳудудда чигит етказиб бериш шохобчалари ташкил этилган.

Айни пайтда ҳудудлардаги 215 та уруғлик чигит ивитиш хандақларида малакали мутахассислар назорати остида чигитни ивитиш ишлари олиб борилмоқда. 119 нафар аъзоси бўлган 65 та чигит экиш отряди фаолиятига 18 нафар кластер агрономлари, 9 нафар ер тузувчи муҳандислар ва 2 нафар Агроинспекция ходимлари жалб қилинган.

Чигит экиш отрядларига бириктирилган 3 минг 155 та техника ва агрегатларнинг самарали ишлашини таъминлаш мақсадида сервис хизмати кўрсатиш, мутахассислар ва ишчилар учун зарур меҳнат, овқатланиш ва дам олиш шароитлари яратилаётгани боис ерларни экишга тайёрлаш ишлари сифатли олиб борилмоқда.

Бундан ташқари, уруғлик чигит етказиб беришга мўлжалланган 17 та, ёқилғи-мойлаш материаллари билан таъминловчи 17 та, минерал ўғитлар етказиб берувчи 17 та техникалар, мола, лазерли ер текислаш агрегатлари, сеялка ва тиркамалардан ҳам унумли фойдаланилмоқда.

Кўргазмали семинар иштирокчилари туманда чигит экиш мавсумига юқори савияда, пухта тайёргарлик кўрилганини алоҳида қайд этишиб, бошланаётган янги деҳқончилик йилида амударёлик пахтакорларга катта ютуқлар тиладилар.

Робия Йўлдошева.