Туман Прокуратураси томонидан Тиббиёт бирлашмаси фаолияти ўрганилди

Мамлакатимизда аҳоли саломатлиги, оналик ва болаликни муҳофаза қилиш, маънан етук, жисмонан соғлом ёш авлодни вояга етказиш алоҳида эътибордаги, давлат сиёсати даражасидаги масала ҳисобланади. Айниқса, аҳолининг барча қатламлари, оналар ва болалар соғлигини муҳофаза этишга, халқимизнинг ўртача умр кўриш давомийлигини ошириш, соғлом болалар туғилиши масалаларига устувор аҳамият берилмоқда.

Амударё туманида ҳам тиббиёт тизимида хизматлар сифати ва қулайлигини яхшилаш, аҳолига тиббий хизмат кўрсатишни жаҳон андозалари даражасига кўтариш, соҳада жорий этилаётган ислоҳотларни амалиётга татбиқ этиш орқали оналар ва болалар саломатлигини мустаҳкамлаш, аҳоли ўртасида соғлом турмуш тарзини оммалаштириш борасида давлатимиз томонидан белгилаб берилган вазифалар изчил амалга оширилмоқда.

Яқинда Амударё туман прокуратураси томонидан туман Тиббиёт бирлашмаси ва бирлашма тасарруфидаги тиббий муассасаларда аҳолига намунали тиббий хизмат кўрсатиш борасидаги ишлар ўрганилиб, таҳлил қилинди.

Бугунги кунда аҳоли саломатлигини мустаҳкамлаш йўлида Амударё туман Тиббиёт бирлашмаси таркибида 415 ўринли Марказий шифохона, 36 ўринли хўжалик ҳисобидаги реабилитация бўлими, жами 1455 қатнов-қувватга эга бўлган 14 та амбулатория-поликлиника муассасалари, Кўп тармоқли марказий поликлиника, 9 та оилавий поликлиникалар ҳамда 4 та оилавий шифокорлик пункти орқали тиббий хизматлар кўрсатилмоқда. Шунингдек, 11 та маҳаллада тиббиёт пунктлари фаолият кўрсатади. Ушбу тиббиёт муассасаларида жами 800 нафардан ортиқ саломатлик посбонлари хизмат кўрсатиб келишмоқда.

2024 йил давомида туғиш ёшидаги аёл-қизлардан 53 минг 241 нафари тиббий кўрикдан ўтказилиб, улардан 3 минг 910 нафарида экстрагенитал касалликлар аниқланди ва уларни соғломлаштириш чоралари кўрилди.

Тиббиёт бирлашмасининг моддий-техник базасини яхшилашга қаратилган эътибор туфайли 2024 йилда 14,4 млрд сўмлик кенг миқёсли қурилиш-таъмирлаш ишлари олиб борилиб, 4 қаватли, 90 ўринга мўлжалланган замонавий туғруқ мажмуаси фойдаланишга топширилди ва мазкур мажмуа 10та замонавий тиббий анжомлар билан таъминланди. Бирлашма тасарруфидаги 6-сонли оилавий поликлиника биноси мукаммал таъмирланиб, томига қуввати 10 кВт бўлган қуёш панели ўрнатилди ва зарур ички жиҳозлар билан жиҳозланди. Шунингдек, инвестиция дастури доирасида Куюк кўпир овулидаги 5-сонли оилавий поликлиника биноси 3 млрд 251 миллион сўм маблағ ҳисобига янгидан қурилди.

Туманнинг олис ҳудудларидаги аҳолига намунали тиббий хизмат кўрсатишни яхшилаш мақсадида Тиббиёт бирлашмаси тасарруфидаги барча оилавий поликлиникалар, оилавий шифокорлик ва тиббиёт пунктларининг моддий-техник ҳолатини яхшилаш, шифокорлар, умумий амалиёт шифокорлари, тиббий ҳамширалар ҳамда тиббий биродарлар, патронаж хизмати шифокорлари ва ҳамшираларининг малакаларини ошириш масаласига ҳам алоҳида эътибор қаратилмоқда.

Ўрганишлар давомида Тиббиёт бирлашмаси фаолиятида эришилаётган ютуқлар билан бирга айрим камчиликлар ҳам мавжудлиги қайд қилинди. Хусусан, аҳоли мурожаатлари билан ишлаш, ногиронлиги бўлган фуқароларни алоҳида тизимга олиш орқали уларнинг шарт-шароитлари янада яхшироқ тиббий муассасаларда даволанишлари учун имкониятлар яратиш, ОИВ (Одамнинг иммунитет танқислиги вируси)га чалинган беморларни алоҳида реабилитация қилиш, болаларда силга қарши эмлаш ишларини ташкил этиш борасида баъзи камчиликлар мавжудлиги айтиб ўтилди.

Айниқса, аҳоли мурожаатлари билан ишлаш, шифохона ичи инфекциясига қарши профилактик чора-тадбирларни амалга ошириш, шунингдек, тиббиёт ходимларининг соҳа вазирликлари томонидан амалиётга жорий этилиши кўзда тутилган буйруқлар ва улардан келиб чиқадиган вазифалар юзасидан билимларини ошириб бориш бўйича сусткашликка йўл қўйилгани, бир неча ҳолатда ходимларга меҳнат таътили бериш бўйича меҳнат қонунчилиги талабларига риоя этилмагани танқид қилинди.

Ишонамизки, “Ютуқ ҳам, камчилик ҳам – ўзимизники, уни бартараф этиш – бурчимиз” тамойили асосида иш юритишга одатланган Амударё туман Тиббиёт бирлашмаси меҳнат жамоаси, ўзларининг ҳамжиҳатликлари билан юқорида қайд этилган камчиликларни бартараф этиш бўйича якдил ҳаракат қиладилар ва аҳоли саломатлигини муҳофаза қилишда катта муваффақиятларга эришадилар. Чунки ҳамжиҳатлик билан қилинган ҳар қандай саъй-ҳаракат нафақат меҳнат жамоаси, балки халқимиз учун ҳам манфаатлидир.