Мардлик сабоқлари ва унутилмас хотиралар
Тарихнинг шундай саҳифалари борки, уларни эслаш оғир, унутиш эса мумкин эмас. Афғон уруши ана шундай фожиали даврлардан бири бўлиб, минглаб инсонларнинг тақдирида ўзининг аянчли изини қолдирди. Ўтган асрнинг охирларида кечган бу ҳарбий можаролар кўплаб ўзбекистонлик ёшларни ҳам уруш домига тортган эди. Уларнинг аксарияти ўша машъум йилларнинг гувоҳи бўлди, жанг майдонида мардлик ва жасорат кўрсатиб, Ватанга шараф билан қайтдилар. Бугун фахрийнинг хотиралари ҳаётий сабоқ, тажрибалари эса келажак авлод учун бебаҳо меросдир.
8 январь куни Амударё туманининг Тўлқин овулида истиқомат қилувчи ана шундай мард инсонлардан бири – Афғон уруши фахрийси Кўклан Худойберганов хонадонига Ўзбекистон “Ветеран” жангчи-фахрий ва ногиронлар бирлашмасининг тумандаги вакили Баҳодир Жуманиёзов ҳамда уюшма аъзолари ташриф буюришди. Қуролдош дўстларнинг бу учрашуви хотиралар жонланган, миннатдорлик туйғуси ва инсоний қадриятлар мужассам бўлган самимий мулоқотга айланди.
Кўклан Худойберганов 1986-1988 йилларда Афғонистонда ҳарбий хизматни ўтаган. У дастлаб Туркманистоннинг Чоржўй шаҳрида уч ой давомида дастлабки ҳарбий тайёргарликдан ўтди. Шундан сўнг, Афғонистоннинг Кобул яқинидаги Баграм қишлоғида жойлашган ҳарбий авиация қисмларидан бирида хизмат қилди. Оғир шароитлар, тинимсиз жанглар ва мудҳиш воқеалар унинг ҳаётида чуқур из қолдирди.
1988 йилда ҳарбий хизматни тамомлаб, Ватанга қайтган Кўклан Худойберганов ўқишни давом эттириб, Пахтачилик техникумида таҳсил олди. Кейинчалик қишлоқ хўжалиги соҳасида фидокорона меҳнат қилди. Урушнинг оғир асоратларига қарамай, ҳаётга бўлган ишончини йўқотмади, оиласи ва фарзандларининг тарбиясига алоҳида эътибор қаратди. Бугунги кунда у меҳрибон отахон, бир нафар набиранинг суюкли бобоси.
Кўклан Худойберганов ёш авлодни ватанпарварлик руҳида тарбиялаш борасида фаол иш олиб бормоқда. У ўзининг жанг майдонидаги сафдошларини, уруш майдонида қолган дўстларини доимо ёдга олиб, уларнинг хотирасини ҳурмат билан эъзозлайди.
Унутилмас жасорати, фидокорона хизматлари учун Кўклан Худойберганов Ўзбекистон “Ветеран” жангчи-фахрий ва ногиронлар бирлашмаси томонидан “Ёшларни ватанпарварлик руҳида тарбиялаш учун” медали билан тақдирланди. Бу юксак эътироф унинг сермашаққат ҳаётий йўли, жасорати ва ёш авлодга ўрнак бўлаётгани учун билдирилган юксак ҳурмат ифодасидир.
Фахрийлар ўзаро мулоқот қилиб, юртдаги тинчлик ва осойишталикнинг қадрига етиш муҳимлигини яна бир бор таъкидладилар. Кўклан Худойберганов давлат ва жамият томонидан кўрсатилаётган эътибордан миннатдор эканлигини билдирди.
Тинчлик – энг катта неъмат. Бу неъмат йўлида фидокорона хизмат қилган инсонлар бор экан, уларнинг ҳикоялари унутилмайди. Фахрийларнинг сабоқлари келажак авлодга жасорат, сабр-тоқат ва Ватанга садоқат рамзи бўлиб қолади. Қаҳрамонлик абадий, мардлик эса унутилмасдир!
Шоҳзод Қурбонбоев
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
