АСОСИЙ ФАНЛАР ОЛИМПИАДАСИНИНГ ТУМАН БОСҚИЧИ ЎТКАЗИЛМОҚДА

Ўзбекистон Республикаси Вазирлар Маҳкамасининг 2021 йил 9 сентябрдаги “Иқтидорли ўқувчилар ўртасида фан олимпиадаларини ўтказиш тизимини такомиллаштириш ҳамда хорижий тилларни ўқитиш бўйича энг яхши мактабни аниқлаш тизимини жорий этиш тўғрисида”ги 562-сонли Қарори асосида ҳар йили умумтаълим мактаблари, ихтисослаштирилган мактаблар ва касб-ҳунар мактаблари ўқувчилари ўртасида асосий фанлар олимпиадаси ўтказиб келинмоқда.

Ушбу Қарор билан ўқувчилар ўртасида фан олимпиадаларини ташкил этиш, ўтказиш ҳамда халқаро олимпиадалар иштирокчиларини саралаш ва ғолибларни рағбатлантириш тартиби тўғрисида Низом ҳам тасдиқланган бўлиб, мазкур Низом давлат ва нодавлат умумий ўрта таълим ташкилотлари, академик лицей ва касб-ҳунар мактаблари ўқувчилари ўртасида умумтаълим фанлари бўйича олимпиадаларни ташкил этиш, ўтказиш, халқаро ва минтақавий олимпиадалар иштирокчиларини саралаш ҳамда олимпиада ғолибларини рағбатлантириш тартибини белгилайди.

Ушбу Низом асосида жорий йилнинг 21 октябрь санасидан бошлаб Амударё тумани Мактабгача ва мактаб таълими бўлимига қарашли умумтаълим мактаблари ўқувчилари ўртасида ҳам фанлар олимпиадасига старт берилди. Мазкур тадбирни талаблар даражасида, қатъий интизом ва шаффофлик асосида ўтказиш мақсадида олимпиада ўтказиладиган 40-, 55-, 76-сонли мактаблар бинолари белгиланган фанларга мутаносиб равишда зарур жиҳозлар билан таъминланди.

Олимпиадада тумандаги 86та мактабларнинг 9-11-синфларидан таълим олаётган 2700га яқин ўқувчи иштирок этмоқда.

21 октябрь куни 55-сонли умумтаълим мактабида тарих, география, қозоқ тили ва адабиёти, қорақалпоқ тили ва адабиёти фанларидан ташкил этилган олимпиадада ушбу фанлар бўйича энг билимдон ўқувчилар ғолиблик учун куч синашдилар.

Айтиш жоизки, асосий фанлар олимпиадаси иккита гуруҳга ажратилган ҳолда ўтказилади. Нуфузли халқаро олимпиадалар учун ташкил қилинадиган фанлар мос келувчи биринчи гуруҳ математика, физика, кимё, биология, информатика ва ахборот технологиялари фанлари ҳисобланади. Қолган фанлар эса иккинчи гуруҳга киритилган. Ўзбекистон Республикаси Мактабгача ва мактаб таълими вазирининг буйруғи асосида асосий фанлар олимпиадасининг туман босқичи 21-25-октябрь кунлари ўтказилиши белгиланган.

Олимпиаданинг туман босқичининг муваффақиятли ўтказилишини таъминлаш мақсадида ўқувчилар билимини баҳолаш учун ўз фанини мукаммал биладиган, тажрибали ўқитувчилардан иборат ҳакамлар ҳайъати ҳамда 7 кишидан иборат аппеляция комиссияси фаолият олиб борди.

Якуний натижаларга кўра, 11-синф ўқувчилари ўртасида тарих фанидан 1-ўринни 65-сонли умумтаълим мактабининг 11-синф ўқувчиси Зилола Сатторбергенова, 2- ва 3-ўринларни эса 28-мактабнинг 11-синф ўқувчилари Шодиёна Комилова ҳамда Феруза Умаровалар эгалладилар.

Бошқа фанлар бўйича ҳам ғолиблар аниқланиб, улар Амударё туман Мактабгача ва мактаб таълими бўлими томонидан диплом ва эсдалик совғалари билан тақдирландилар ҳамда 1-, 2- ва 3-ўрин ғолиблари асосий фанлар олимпиадасининг Қорақалпоғистон Республикаси босқичига йўлланма олдилар.

Айни кунларда асосий фанлар олимпиадаси баҳслари белгиланган жадвал асосида, 40-, 55- ва 76-сонли умумтаълим мактабларида юқори савияда ташкил этилиб, кўтаринки руҳда, қатъий интизом ва шаффофлик асосида ўтказилмоқда. Ушбу маърифий тадбирда иштирок этаётган туманимизнинг билимдон ёшларига омад ва муваффақиятлар тилаймиз.

Равшан Баҳромов.