Пахта йиғим-терими мавсумини уюшқоқлик билан ўтказишга бағишланган семинар бўлиб ўтди

Амударё тумани Тош ёп овулидаги “Бекмон Аллаберганов” фермер хўжалиги даласида жорий йилги пахта йиғим-терим мавсумини уюшқоқлик билан ўтказиш маысадида қишлоқ хўжалиги ходимлари иштирокида семинар бўлиб ўтди.

Семинарда туман ҳокими Собир Хўжаметов, ҳоким ўринбосарлари, қишлоқ хўжалиги соҳаси масъуллари ҳамда фермерлар иштирок этдилар. Семинарда пахта йиғим-терими мавсумида амалга оширилиши лозим бўлган ишлар хусусида сўз юритилди. Жумладан, пахтани нест-нобуд қилмасдан ўз вақтида йиғиб-териб олиш, терим мавсумидаги барча ишларни тўғри ташкил этиш юзасидан тегишли масъулларга топшириқлар берилди. Шунингдек, пахта йиғим-терими мавсумини уюшқоқлик билан ўтказиш юксак пахта хирмони бунёд қилишда алоҳида аҳамиятга эга экани таъкидланди.

Бугунги кунда туманимиздаги барча фермер хўжаликларининг пахта далаларида ғўзалар қийғос очилиб, далалар оппоқ тусга кирган. Пахта етиштирувчи фермер хўжаликлари томонидан ғўзани парваришлаш ишларининг ўз вақтида ва сифатли олиб борилгани, пахта етиштиришга масъул шахсларнинг фидойи меҳнатлари натижасида далаларда мўл ҳосил етиштирилди. Сентябрь ойининг бошлариданоқ барча фермер хўжаликларида етиштирилган ҳосилни йиғиб-териб олиш ишлари бошлаб юборилади. Мавсум бошланишидан аввал терим учун барча шароитлар яратилиб, зарур ресурслар тахт қилиб қўйилди.

Айтиш жоизки, пахта йиғим-теримини ғўзанинг пишиш ҳолатидан келиб чиқиб, яъни пахтанинг камида 70-75 фоизи очилганидан кейин териш мақсадга мувофиқ. Ҳудудларда пахта йиғим-теримига оммавий киришиш кечи билан 10 сентябрдан бошланди ва 10 октябргача биринчи терим тўлиқ якунланиб, иккинчи теримга ўтилади.

Пахта терими мавсумида кўнгилли, 18 ёшдан катта, муайян меҳнат билан банд бўлмаган ишга лаёқатли вақтинча ишсиз, айрим ҳолларда меҳнат ресурслари етмаган ҳудудга бошқа ҳудудлардан келиб ҳақ эвазига теримда иштирок этиш истагини билдирган теримчилар махсус терим отрядларига бириктирилади.

Маълумот ўрнида, туманда пахта йиғим-терими мавсумига пухта тайёргарлик кўриш ва уни оптимал муддатларда амалга ошириш мақсадида 310та терим отрядлари ташкил қилинган. Терим отрядларига 100-150 нафардан иборат ташаббускор гуруҳлар ҳамда маҳаллаларда тажрибали кўча фаолларидан иборат отряд раҳбарлари тайинланган. Отрядларга жами 17 минг 490 нафар теримчилар жалб қилинган.

Бу каби юксак ташкилий ишлардан кўзланган асосий мақсад – тумандаги 352та фермер хўжаликларининг 13 минг 900 гектар майдонида пишиб етилган ҳосилдан жами 48 минг 500 тонналик хирмон бунёд қилиш ва шартномаларга мувофиқ хом ашёни 6та кластерларга ўз вақтида ҳамда сифатли тарзда етказиб беришдир.

Семинарда пахта йиғим-терими мавсумида фермер хўжаликлари томонидан теримчиларни зарур меҳнат ва дам олиш шароитлари билан таъминлаш, уларга меҳнат ҳақини ўз вақтида ва тўлиқ тўлаш, пахта-тўқимачилик кластерлари томонидан йиғим-теримга жалб қилинган шахсларни озиқ-овқат маҳсулотлари билан таъминлаш, уларга қулайликлар яратиш мақсадида кўчма савдо дўконлари фаолиятини йўлга қўйиш, тиббий, маданий ҳамда маиший хизматлар кўрсатиш хусусида сўз юритилиб, ҳосилни нест-нобуд қилмасдан териб олиш бўйича тушунтириш-тарғибот ишлари олиб борилди.

Чарос Арслонова, туман ҳокимлигининг Ахборот хизмати раҳбари.