Amudaryo tumanida "Sogʻlom va osoyishta hayot" nazorat tadbirlari oʻtkazilmoqda

Aholi oʻrtasida sogʻlom va osoyishta hayot tarzini qaror toptirish, jinoyatchilikning oldini olish, ayniqsa, uyushmagan yoshlar, voyaga yetmagan oʻsmirlarning tungi vaqtlarda nazoratsiz koʻchada yurishlari, spirtli ichimliklar isteʼmol qilgan holda fuqarolarning tinchini buzishlarining oldini olish hamda oʻzaro nizoli oilalar oʻrtasidagi kelishmovchiliklarni bartaraf etish maqsadida mamlakatimizda Oʻzbekiston Respublikasi Ichki Ishlar vazirligining farmoyishiga asosan ikki bosqichli “Sogʻlom va osoyishta hayot” tadbirining ikkinchi bosqichi muvaffaqiyatli amalga oshirilmoqda.

Joriy yilning 1-avgust sanasidan 15-avgustga qadar davom etadigan “Sogʻlom va osoyishta hayot” maxsus profilaktik reyd tadbirlari Amudaryo tumanining aholi eng gavjum hududlarida, xususan, Mangʻit Dehqon bozori atrofidagi tadbirkorlik subʼektlari, internet kafelar hamda avtoturargohlar, umumiy ovqatlanish shoxobchalari joylashgan oʻrinlarda, shuningdek, huquqbuzarlik holatlari yuz berish ehtimoli yuqori deb hisoblangan ovul va mahallalarda oʻtkazilmoqda.

Shunisi achinarliki, tuman Ichki ishlar boʻlimi xodimlari, hududlar boʻyicha profilaktika inspektorlari ishtirokidagi tungi reyd tadbirlari davomida shaxsiy boylik orttirish maqsadida eng jirkanch ish – fohishabozlik bilan shugʻullanishga moyil shaxslar ham borligi aniqlandi.

Oʻzbekiston va Beshtom mahalla fuqarolar yigʻinlari hududida yashovchi S. va I. ismli shaxslar jinsiy munosabatda boʻlib, fahsh ishlar bilan shugʻullanayotgan vaqtda hududiy profilaktika inspektori tomonidan qoʻlga olinib, ularga jamiyatda yurish-turish qoidalarini qoʻpol tarzda buzganliklari, yoshlar tarbiyasiga salbiy taʼsir koʻrsatuvchi xatti-harakatlarni sodir etganliklari uchun tegishli hujjatlar rasmiylashtirildi.

Shuningdek, Beshtom mahallasida istiqomat qiluvchi H. ismli shaxs esa maʼlum miqdordagi pul evaziga oʻz uyida ikki nafar fuqaroga jinsiy munosabatda boʻlishlari uchun sharoit yaratib berayotganida nazorat guruhi tomonidan qoʻlga olindi. Ayni paytda mazkur holat boʻyicha tergovga qadar surishtiruv ishlari olib borilmoqda.

Nazorat tadbirlari davomida yoshlar oʻrtasida giyohvandlikdek jirkanch illatning oldini olish, kashandalikka qarshi kurashish, ijtimoiy tarmoqlar orqali zoʻr berib targʻib etilayotgan diniy ekstremizm gʻoyalaridan ularni himoya qilish, davrimizning global muammolaridan biri boʻlgan mafkuraviy xurujlar, pornografik tashviqot vositalarining oʻsib kelayotgan yosh avlod ongini zaharlashidan har lahzada ogoh boʻlish toʻgʻrisida zarur tavsiyalar berilmoqda.

Xalqimiz yildan-yilga farovonlashib, yashash sharoitlari yaxshilanib bormoqda. Buni koʻchalarni toʻldirib, istagan manzillariga shaxsiy avtomobillari bilan tez va oson yetib olishga intilayotgan yurtdoshlarimiz misolida ham koʻrishimiz mumkin. Lekin bu shahar koʻchalari boʻylab oʻzini koʻz-koʻz qilish, kimoʻzarga avtomobil poygasini qizitish degani emas.

Afsuslanarli tomoni shundaki, nazorat tadbirlari davomida ana shunday “uchar avtomobil” egalarining yoʻl harakati qoidalariga xilof ravishda tezlikni oshirish holatlari ham aniqlanib, ularga nisbatan maʼmuriy tartibda choralar koʻrish uchun tegishli hujjatlar rasmiylashtirildi.

Shuningdek, internet kafelarda ota-onasi va ularning oʻrnini bosuvchi vasiylar hamrohligisiz yarim tungacha turli pornografik kanallarga kirib, mentalitetimizga yot boʻlgan videolavhalarni tomosha qilish orqali vaqtini oʻtkazayotgan ayrim tarbiyasi ogʻir oʻsmirlarga sharoit yaratib berayotgan internet kafelar rahbarlari ham aniqlanib, oʻsib kelayotgan yosh avlod tarbiyasiga salbiy taʼsir koʻrsatuvchi, buzgʻunchi saytlar va Telegram kanallaridan foydalanishni cheklash, nazoratsiz oʻsmirlarning internet kafelarda tungi vaqtlarda shugʻullanishlariga chek qoʻyish zarurligi haqida ayrim tadbirkorlik subʼektlari vakillariga muhim tavsiyalar, tushuntirishlar berildi.

Inobat Oʻrozmatova, tuman Ichki ishlar boʻlimining xotin-qizlar masalalari boʻyicha katta inspektori