Oʻzbekiston Respublikasi Adliya vaziri Akbar Toshqulov Choykoʻl ovulidagi “Mahalla yettiligi” faoliyati bilan tanishdi

Maʼlumki, Oʻzbekiston Respublikasi Prezidentining 2024-yil 24-may kungi “Maʼmuriy islohotlar doirasida Adliya organlari va muassasalarining masʼuliyatini yanada oshirish hamda ixcham boshqaruv tizimini shakllantirish toʻgʻrisida”gi Farmoni bilan mamlakatimizda fuqarolarning huquq va erkinliklariga soʻzsiz rioya etilishini taʼminlash, ularga koʻrsatilayotgan davlat va huquqiy xizmatlar koʻlamini kengaytirishda adliya organlari va muassasalarining masʼuliyatini yanada oshirish va hujjatda belgilangan shu kabi boshqa vazifalar ijrosi davlat ijtimoiy siyosatida yangi bosqichga koʻtarilgan edi.

Joriy yilning 3-iyul kuni Oʻzbekiston Respublikasi Adliya vaziri Akbar Toshqulov mazkur Farmonning hududlardagi ijrosini koʻzdan kechirish va adliya organlari tomonidan fuqarolarning huquq va erkinliklari taʼminlanishi yuzasidan bajarilayotgan ishlarni oʻrganish maqsadida Qoraqalpogʻistonga qilingan xizmat safari chogʻida Amudaryo tumaniga tashrif buyurdi va Choykoʻl ovulida boʻlib, u yerdagi “Mahalla yettiligi” faoliyati bilan tanishdi.

Tadbirda Oʻzbekiston Respublikasi Adliya vazirligi boshqarma boshligʻi Farrux Saliyev, Qoraqalpogʻiston Respublikasi Adliya vaziri Elmurod Tursunov, tuman Adliya boʻlimi boshligʻi Mansur Sadikov, Oʻzbekiston Mahallalari uyushmasi tuman boʻlimi boshligʻi Alisher Yuldashev, Choykoʻl ovuldagi “Mahalla yettiligi” va boshqalar ishtirok etishdi.

Dastlab tuman Adliya boʻlimi boshligʻi Mansur Sadikov tomonidan joylarda uyma-uy yurib oʻrganishlar davomida aholining huquqiy muammolarini aniqlash va ularni hal etish, shuningdek, manzilli huquqiy targʻibot tadbirlarini yanada kuchaytirish hamda mahalla fuqarolar yigʻinlari va davlat organlarining quyi tizimlari faoliyatiga metodik yordam koʻrsatish masalalariga doir yoʻnalishlarda amalga oshirilayotgan ishlar toʻgʻrisida taqdimot qilindi.

Keltirilgan maʼlumotlarga koʻra, bugungi kunda Choykoʻl ovulida 7123 nafar fuqaro istiqomat qiladi. Shundan 3962 nafarini yoshlar tashkil qiladi. Ovul xotin-qizlaridan 129 nafari “Ayollar daftari”ga kiritilgan. Kam taʼminlangan oilalar sifatida 12ta oila roʻyxatga olingan. Aholining huquqiy muammolarini aniqlab hal etish va ularning huquqiy madaniyatini yuksaltirish yuzasidan adliya-mahalla hamkorligida bir qator ishlar amalga oshirilyapti. Jumladan, huquqiy axborotni tarqatish yoʻnalishida haftaning har chorshanba kuni “Huquqiy targʻibot kuni” oʻtkazilmoqda, qonunchilik bazasini mustahkamlash maqsadida “Mahalla yettiligi”ga 30ta qonunchilik hujjatlari yetkazildi, uchrashuvlar davomida aholiga 450dan ortiq huquqiy targʻibot materiallari tarqatildi, shuningdek, ijtimoiy himoyaga muhtoj 136 nafar fuqaroga imtiyozlar boʻyicha tushuntirishlar berildi.

Bundan tashqari, aholiga davlat xizmatlarini koʻrsatishni yanada soddalashtirish maqsadida mahalla binosiga interaktiv kiosk oʻrnatildi, u orqali fuqarolar shu kunga qadar 297ta davlat xizmatidan foydalandi. Shuningdek, fuqarolarning 130 nafariga sayyor davlat xizmatlari koʻrsatildi. Sayyor qabullar davomida 34 nafar fuqaroning muammolari oʻrganilib, qonuniy tartibda hal qilindi. Aholining murojaatlari yuzasidan 12 nafar fuqaroga birlamchi bepul yuridik yordam koʻrsatildi.

Taqdimot davomida tuman Adliya boʻlimi boshligʻi Mansur Sadikov tomonidan adliya-mahalla hamkorligida amalga oshirilayotgan shu kabi boshqa ishlar toʻgʻrisida ham maʼlumotlar berildi.

Shundan keyin, Oʻzbekiston Respublikasi Adliya vaziri Akbar Toshqulov tadbir ishtirokchilariga ovul-mahallalarda jinoyatchilik va huquqbuzarliklarning oldini olish, aholi bandligini taʼminlash, ijtimoiy himoyaga muhtoj fuqarolarga huquqiy yordam koʻrsatish orqali ularni qoʻllab-quvvatlash, ajrim va oilaviy zoʻravonlikning oldini olish yuzasidan zarur tavsiyalar berib oʻtdi.

Shu oʻrinda taʼkidlash joizki, soʻngi yillarda mamlakatimizda sohalar rivoji yoʻlida amalga oshirilayotgan islohotlar sabab adliya organlari va muassasalarining ovul-mahallalar bilan hamkorligi yanada kuchaydi. Buning natijasida aholining huquqiy madaniyati oshib, qabul qilinayotgan qonuniy hujjatlarning ijrosi taʼminlanayapti.

Shavkat Vaisniyazov, Amudaryo tumani Adliya boʻlimi Yuridik xizmat koʻrsatish markazi boshligʻi.