Daryo boʻyi mahallasida aholi turmush tarzi yaxshilanmoqda

Maʼlumki, bugungi kunda davlatimiz rahbari tashabbusi bilan yurt ravnaqi va farovonligi yoʻlida amalga oshirilayotgan islohotlarning joylardagi ijrosi natijasida insonlarning turmush tarzi tobora yaxshilanib bormoqda. Bunda mahallalarda faoliyat yuritayotgan “yettilik” masʼullarining oʻrni va ahamiyati juda muhim.

Amudaryo tumanidagi Daryo boʻyi mahallasiga tashrif buyurar ekanmiz, mahalla “yettiligi”ning oʻzaro hamjihatligiga, aholining uyushqoqligiga, hududning obod va fayzli maskanga aylanganligiga, insonlarning koʻzlaridagi samimiyat, oʻzaro mehr-oqibatning kuchli ekanligiga guvoh boʻldik.

Daryo boʻyi MFY masʼullari hududdagi ijtimoiy himoyaga muhtoj insonlar, yolgʻiz keksalar holidan xabar olib, ularning mavjud muammolarini hal qilishga, hayot sharoitlarini yaxshilashga amaliy yordam berib kelmoqdalar.

Jumladan, mahallada yashovchi Farhod Xolboyev 16-yildan buyon yolgʻiz yashab kelayotgan, yashash sharoitlari juda achinarli holga kelib qolgan, hatto xonadoni elektr energiyasidan uzilib qolganligi mahalla masʼullarini befarq qoldirmagan. Mahalla raisi Mahmud Toʻliboyev, hokim yordamchisi Botir Atabillayev, yoshlar yetakchisi Shahlo Oʻrazboyevalar Farhod aka xonadonida taʼmirlash va tozalash ishlarini tashkil qilishdi. Hashar yoʻli bilan hovlining uy devorlarini oqlab, deraza va eshiklar, xonalarni tozalanb, xonadon egasiga yangi kiyim-bosh, oshxonaga idish-tovoqlar olib berishdi. Shuningdek, xonadonga elektr liniyalari ham yangidan tortilib, elektr hisoblagich hamda televizor olib kelib oʻrnatildi. Qoʻlida hunari bor boʻlgan Farhod akaning bandligini taʼminlash boʻyicha ishar ham tashkil etilmoqda.

Taʼkidlash kerakki, muhtaram Prezidentimiz tomonidan Qoraqalpogʻiston Respublikasidagi har bir mahallaga ajratilgan 500 mln soʻm mablagʻ hisobidan mahallarda tizimli ishlar olib borilmoqda.

Mana shu mablagʻ hisobidan amalga oshirilgan ishlar sababli mahalladagi 60ta xonadonning tomorqasiga suv yetib bormoqda. Mahallaga ajratilgan mablagʻni aholi farovonligi yoʻlida toʻgʻri yoʻnaltirishni koʻzlagan masʼullar hududda yashovchi aholi tomorqalariga oqar suvlarining yetib borishi hamda mavjud suv resurslaridan samarali foydalanish maqsadida katta ariqlardan suv chiqaruvchi 4ta nasos oʻrnatish ishlarini tashkil etdilar.

Mahalla faollari bilan suhbatlashar ekanmiz, katta ariqdan suv chiqaruvchi nasos orqali Taraqqiyot, Taraqqiyot-3, Nurota koʻchalaridagi 60 ta xonadonga suv yetib borayotganini mamnuniyat bilan eʼtirof etishdi. Shuningdek, aholining uyushqoqligi orqali mahalladagi barcha ariqlar tozalanib, xonadonlardagi tomorqalarning sugʻorilishi boʻyicha muammolar ham barataraf qilindi. Tashrifimiz mobaynida mahalladoshlarning oʻzaro ahilligi, mehnatsevarligi natijasida hashar yoʻli bilan mahalladagi yana 19 ta xonadonlar tomorqalariga suv yetkazish maqsadida oʻzlarining hisobidan tuproq tashlanib, Tabiat-3 va Tabiat-4 koʻchalaridan ariq oʻtkazayotganlarining guvohi boʻldik.

Mahallada hokim yordamchisi koʻmagi bilan bandligi taʼminlanayotgan, oilasiga daromad olib kelayotgan, tadbirkorlik bilan shugʻullanayotgan fuqarolar safi ortib bormoqda. Biz hokim yordamchisi Botir Atabillayev yordamida kredit olib, asarichilik bilan shugʻullanayotgan Anvar Yangiboyev faoliyati bilan tanishdik.

Anvar Yangiboyev yosh oila boshligʻi boʻlib, ushbu faoliyat bilan 3-yildan buyon shugʻullanib kelmoqda. Bu yil 33 mln soʻm kredit mablagʻi hisobiga asalari qutilari sonini 30 taga yetkazdi. Anvar akaning taʼkidlashicha, asalarichilik eng daromadli faoliyat turlaridan biri. Koʻp mehnat talab qilmaydigan, har tomonlama foydali ish. U har bir qutidan kamida 30 kg.gacha asal olib, oilasiga yaxshi daromad keltiriyotganini qayd etib oʻtdi.

Hududda yoshlar bandligini taʼminlashda hokim yordamchisi Botir Atabillayev va yoshlar yetakchisi Shahlo Oʻrazboyevalarning oʻzaro hamjihatlikdagi ishlari natijasida Sherzod Bobojonov chorvachilik faoliyatini yoʻlga qoʻydi. Sherzod bilan suhbatlashar ekanmiz, qishloq xoʻjaligining turli sohalariga qiziqishi yuqori ekanligini taʼkidlaydi. Yosh boʻlishiga qaramay, xonadonida chorvachilik, parrandachilik, biogumus yetishtirish kabi ishlar bilan cheklanib qolmasdan, tomorqasidan ham samarali foydalanib kelmoqda.

Hokim yordamchisi koʻmagi bilan olingan 33 mln soʻmlik kredit mablagʻi hisobiga 5 bosh qoramol sotib olib, hozirda qoramollari sonini 7 boshga yetkazgan. Tirishqoq va intiluvchan Sherzodning orzulari bisyor. Oʻziga oʻxshagan koʻplab yoshlarning bandligini taʼminlash, chorvachilikni rivojlantirib, katta fermer xoʻjaligini tashkil etishni maqsad qilgan.

Mahallaga tashrifimiz mobaynida oʻzi oʻqituvchi boʻlishiga qaramay, xonadonida turli oilaviy tadbirkorlik sohalarini hamda chorvachilikni yoʻlga qoʻygan, bu orqali 3 nafar yoshning bandligini taʼminlayotgan, shuningdek, tomorqasidan samarali foydalanayotgan Rustam Haytboyevning amalga oshirayotgan ishlari ham bizda katta taassurot qoldirdi.

Hududdagi 65-sonli umumtaʼlim maktabida psixolog lavozimida faoliyat olib borayotgan Rustam Haytboyev 2019-yilda oilaviy tadbirkorlik faoliyatini yoʻlga qoʻygan. Davlat ishidan boʻsh vaqtlarida eshik va deraza romlarini ishlab chiqarish orqali 2 nafar band boʻlmagan fuqarolarning bandligini taʼminlagan. Uning xonadonida paxta titish uskunasi ham mavjud boʻlib, mahalladoshlarining ogʻrini yengil, uzogʻini yaqin qilib kelmoqda. Paxta titish uskunasi orqali ham 1 nafar ishsiz yoshning bandligi taʼminlangan.

Qolaversa, Rustam aka tomorqasidan ham samarali foydalanib kelmoqda. Tomorqasida qishloq xoʻjaligi mahsulotlarining deyarli barcha turidan ekilgan hamda yiliga kamida 2-martadan yaxshi hosil olinadi. Chorvachilik sirlarini bolaligidan oʻrganib kelayotgan Rustam Haytboyevning hozirda 10 boshga yaqin qoramollari mavjud. Hamyurtimizning ham kelgusidagi maqsad va rejalari bisyor. Katta un zavodini ochish orqali 20 nafarga yaqin ishsiz fuqarolarning bandligini taʼminlash boʻyicha aniq rejalar tuzmoqda va ushbu maqsadiga yaqin 2-yil ichida erishishni rejalashtirmoqda.

Biz faol va tashabbuskor, fidoyi hamda mehnatsevar Daryo boʻyi mahallasi ahlining ishlariga rivoj, roʻzgʻoriga qut-baraka tilab, ular bilan xayrlashdik.

Charos Arslonova, tuman hokimligining Axborot xizmati rahbari.