“ENG NAMUNALI MAHALLA RAISI” TANLOVINING AMUDARYo TUMANI BOSQIChI GʻOLIBLARI ANIQLANDI

Oʻzbekiston Respublikasi Prezidentinin 2023-yil 21-dekabrdagi “Oʻzbekiston mahallalari uyushmasi faoliyatini yoʻlga qoʻyish va mahallalarda boshqaruv tizimini takomillashtirishga oid qoʻshimcha chora-tadbirlar toʻgʻrisida”gi Qarori bilan tasdiqlangan “Yoʻl xaritasi” hamda Qoraqalpogʻiston Respublikasi mahallani qoʻllab-quvvatlash Kengashining 2024-yil 12-fevraldagi bayoniga muvofiq, Amudaryo tumanida joriy yilning 19-25-fevral kunlari “Eng namunali mahalla raisi” Respublika tanlovining sektor bosqichi oʻtkazilib, unda toʻrtta sektor hududidagi ovul va mahalla fuqarolar yigʻinlari raislari ishtirok qildilar.

Sektor bosqichida gʻoliblikni qoʻlga kiritgan ovul va mahalla fuqarolar yigʻinlari raislari koʻrik-tanlovning tuman bosqichida oʻzaro kuch sinashdilar.

“Eng namunali mahalla” koʻrik-tanlovi Nizomi talablariga koʻra, har bir ovul va mahalla fuqarolar yigʻini raisi rahbarligida amalga oshirilayotgan ishlarning natijadorligiga, ayniqsa infratuzilmalarining rivojlanishiga alohida eʼtibor qaratildi.

Koʻrik-tanlovining Amudaryo tumani bosqichi joriy yilning 28-fevral sanasida tumandagi 82-sonli umumtaʼlim maktabi faollar zalida boʻlib oʻtdi. Tanlovda sektor bosqichida 1-, 2-, 3-oʻrinlarni egallagan jami 12ta mahalla va ovul fuqarolar yigʻinlari raislari ishtirok etdilar va belgilangan Nizom talablariga koʻra, tanlov ochiqlik va shaffoflik asosida amalga oshirildi.

Koʻrik-tanlovda ovul va mahalla fuqarolar yigʻinlarining Kengashlari, jamoatchilik tuzilmalari, hududlarda amalga oshirilayotgan maʼnaviy-maʼrifiy tadbirlar, xalqni ijitmoiy himoyalashga qaratilgan chora-tadbirlar va bu chora-tadbirlarning aholi hayotida tutgan oʻrni, yoshlar bandligini taʼminlash, ularning boʻsh vaqtlarini mazmunli oʻtkazish borasidagi amaliy ishlarning natijadorligiga alohida eʼtibor qaratildi.

Koʻrik-tanlov yakunida aholi punktlarida olib borilgan obodonlashtirish va koʻkalamzorlashtirish ishlarini, yuqori saviyada olib borgan ayniqsa, oʻzlari yashab turgan hududni bogʻ-rogʻlarga aylantirish, yoshlar oʻrtasida jinoyatchilik va huquqbuzarlik holatlarini keskin kamaytirishga erishgan, yosh oilalar oʻrtasidagi kelishmovchiliklar, ajrashish holatlari sodir boʻlmagan ovul va mahalla fuqarolar yigʻinlari raislari gʻolib boʻldilar. Unga koʻra, koʻrik-tanlovning Nizomi talablariga toʻla mos keladigan Xitoy ovul fuqarolar yigʻini raisi Davlatboy Otajonov faxrli 1-oʻrinni egalladi.

Oʻzi rahbarlik qilayotgan mahalla fuqarolar yigʻini hududida xotirjam va osoyishta turmush tarzini yaratgan, shuningdek, aholini ijtimoiy himoya qilishni zamon talablari darajasida amalga oshirayotgan, aholi muammolari bilan ishlashda oʻziga xos tajribaga ega deb topilgan Oʻzbekiston MFY raisi Akbarjon Boltaboyev faxrli 2-oʻrin sohibi boʻldi.

Amalga oshirayotgan ishlari koʻrik-tanlovning barcha shartlariga toʻla javob beradigan, rasmiy hujjatlar, ariza va shikoyatlar boʻyicha oʻziga xos tajribaga ega deb topilgan Choykul ovul fuqarolar yigʻinining raisi Begzod Aytekov 3-oʻringa loyiq koʻrildi.

Koʻrik-tanlov yakunida fuqarolar yigʻinlarining gʻolib raislari tashkilotchilar tomonidan munosib ragʻbatlantirildilar.

Xitoy ovul fuqarolar yigʻini raisi Davlatboy Otajonovga koʻrik-tanlovning Qoraqalpogʻiston Respublikasi bosqichiga yoʻllanma berildi.

Robiya YOʻLDOShEVA.