Qoʻmondon va yoshlar uchrashuvi oʻtkazildi

Soʻnggi yillarda mamlakatimizda yoshlarni harbiy-vatanparvarlik ruhida tarbiyalashga doir keng koʻlamli islohotlar amalga oshirilmoqda. Bu boradagi ishlar samaradorligini yangi bosqichga olib chiqish, mazkur yoʻnalishda davlat va nodavlat tashkilotlari hamda fuqarolik jamiyatining boshqa institutlari faolligini yanada oshirish, yoshlar ongiga vatanparvarlik, mardlik tuygʻularini singdirish maqsadida Oʻzbekiston Respublikasi Vazirlar Mahkamasining “Yoshlarni harbiy-vatanparvarlik ruhida tarbiyalash ishlari samaradorligini oshirish chora-tadbirlari toʻgʻrisida” qarori qabul qilindi. Mazkur hujjat yoshlarni harbiy vatanparvarlik ruhida tarbiyalash borasida ishlarni yangi bosqichga olib chiqishda muhim dasturulamal boʻlib xizmat qilmoqda.

Joriy yilning 30-yanvar sanasida Amudaryo tumani Madaniyat boʻlimi binosida oʻtkazilgan qoʻmondon va yoshlar uchrashuvi ham mazkur qarorda belgilangan chora-tadbirlarning amaldagi ijrosi boʻldi.

Uchrashuvda shimoli-gʻarbiy harbiy okrug qoʻshinlari qoʻmondoni general mayor Farhodjon Shermatov, tuman hokimi Sobir Xojametov, sektorlar rahbarlari, hokim oʻrinbosarlari, yoshlar yetakchilari hamda bir guruh yoshlar ishtirok etdilar.

Shu oʻrinda qayd etish joizki, mazkur uchrashuv davlatimiz rahbari tomonidan joriy yilning 12-yanvar sanasida oʻtkazgan yigʻilishida belgilab bergan yoshlarni harbiy vatanparvarlik ruhida tarbiyalash, muddatli harbiy xizmat nufuzini oshirish, yoshlarda muddatli harbiy xizmat qilish borasidagi bilimlarni shakllantirish kabi ustuvor vazifalarni amalga oshirishga qaratildi.

Uchrashuvda shimoli-gʻarbiy harbiy okrug qoʻshinlari qoʻmondoni general mayor Farhodjon Shermatov soʻzga chiqib, Vatan himoyasi, uni asrab-avaylash, Vatanga xizmat qilish har bir oʻgʻil-qizning Vatan oldidagi farzandlik burchi ekanligini taʼkidlab, uchrashuvda ishtirok etayotgan yigitlarning muddatli harbiy xizmatga boʻlgan qiziqishlarini yanada oshirdi.

Shuningdek, uchrashuvda tuman Favqulodda vaziyatlar boʻlimi boshligʻi Zafar Ahmedov, tuman Sanitariya-epidemiyalogik osoyishtalik va jamoat salomatligi markazi boshligʻi Gulmurod Bekiyev, Xizr eli mahalla fuqarolar yigʻini yoshlar yetakchisi Ilyos Egamovlar soʻzga chiqib, oʻzlarining muddatli harbiy xizmat davomidagi taassurotlari, bilim va koʻnikmalari bilan boʻlishdilar.

Tadbirning rasmiy qismi nihoyasiga yetgach, shimoli-gʻarbiy harbiy okrug harbiy orkestr jamoasi, faxriy qorovul jamoasi hamda razvedka qoʻshinlari qoʻl jangi jamoasining qoʻl janggi boʻyicha koʻrgazmali chiqishlari, marsh sadolari ostidagi harbiy saf yurishi, harbiy texnika va qurol-aslahalar koʻrgazmasi hamda harbiy orkestr jamoasining ona Vatan va Milliy armiyani tarannum etuvchi kuy-qoʻshiqlari yangradi.

Uchrashuv mobaynida tuman hokimi Sobir Xoʻjametov soʻzga chiqib, yoshlarning muddatli harbiy xizmatga borishlari ularning har tomonlama rivojlanishlarida muhim oʻrin tutishini qayd etib oʻtdi hamda mehmonlarga oʻz minnatdorchiligini bildirdi.

Uchrashuv davomida tadbir ishtirokchilarining harbiy va turli sohadagi murojaatlariga shimoli-gʻarbiy harbiy okrug qoʻmondoni va boshqa tegishli mutaxassislar tomonidan toʻliq javoblar berildi.

Charos Arslonova, tuman hokimining Axborot xizmati rahbari.