Vatan himoyachilari kuniga bagʻishlangan tadbir oʻtkazildi

Vatanimizning xavfsizligi, yurtimiz tinchligi, xalqimiz osoyishtaligi Qurolli Kuchlarimiz tomonidan ishonchli tarzda taʼminlanmoqda. Milliy Armiyamizda xizmat qilish Oʻzbekiston fuqarolari uchun nafaqat konstitutsiyaviy burch, ayni paytda tom maʼnodagi shon-sharaf ishiga aylanganligi ham haqiqat. Yurtimizda 14-yanvarda nishonlanadigan Vatan himoyachilari kuni esa chin maʼnoda umumxalq bayramiga aylangan.

Mazkur sana munosabati bilan 2024-yil 13-yanvar kuni Amudaryo tuman Madaniyat boʻlimining tomoshalar zalida Oʻzbekiston Respublikasi Qurolli Kuchlari tashkil etilganligining 32 yilligiga bagʻishlangan “Yangi Oʻzbekiston Armiyasi – mamlakat qudrati, yuksak gʻururi va sadoqat timsolidir” shiori ostida bayram tadbiri boʻlib oʻtdi.

Tadbirda tuman hokimi Sobir Xoʻjametov, sektorlar rahbarlari, Mudofaa, Ichki ishlar boʻlimlari masʼullari, tumandagi DXX chegara qoʻshinlariga qarashli harbiy qismlar mutasaddilari, harbiy xizmatchilar va askar onalari, yoshlar va keng jamoatchilik vakillari ishtirok etishdi.

Tadbir avvalida Oʻzbekiston va Qoraqalpogʻiston Respublikalarining davlat madhiyalari yangradi.

Tadbirda tuman hokimi Sobir Xoʻjametov Milliy Armiyamizda xizmat qilayotgan harbiylar ham el osoyishtaligini taʼminlash, chegaralarni mustahkamlash borasida samarali xizmat qilib kelayotganini taʼkidladi hamda ularni 14-yanvar – Vatan himoyachilari kuni munosabati bilan tabrikladi.

Shuningdek, mamlakatimizda hukmron boʻlgan tinchlikning eng katta boylik ekanligini, Prezidentimiz rahnamoligida mamlakatimiz mudofaa tizimida amalga oshirilayotgan keng koʻlamli islohotlar yuksak samaralar berayotgani, harbiy xizmatga yoshlarimizning qiziqish va intilishi tobora ortib, Vatan himoyasi shon-sharaf ishiga aylanib borayotganini alohida taʼkidladi.

Aytib oʻtish joizki, Milliy Armiyamizning chegaralarimiz daxlsizligini, Vatanimiz tinchligini taʼminlashdagi roli cheksiz. Vatan himoyachilari bor ekan, yurtimiz tinch, osmonimiz musaffo, xalqimizning farovonligi va hamjixatligi mustahkam boʻladi.

Tadbir davomida soʻzga chiqqanlar harbiy xizmatchilarning ishchanlik fazilatlari, xalq bilan birga tinch-totuv turmushni taʼminlash yoʻlidagi fidokorona xizmatlarini alohida tilga olishdi. Shuningdek, Vatanimizni qoʻriqlash har bir insonning muqaddas burchi ekanligi, yosh avlod qalbida yurtga cheksiz mehru-muhabbat, vatanparvarlik, sadoqat tuygʻularini mustahkamlash dolzarb masalalardan biri ekanligi alohida taʼkidlandi.

Tadbirda Milliy Armiyamiz kuch-qudrati, harbiylarga yaratilayotgan shart-sharoitlar, yurt sarhadlarini qoʻriqlayotgan mard oʻgʻlonlar, Vatanimizning jasur himoyachilari koʻrsatayotgan qahramonliklar haqida soʻz yuritildi. Hozirgi tinch, osuda va farovon hayotning qadriga yetish, uni asrab-avaylashga har bir fuqaro masʼul ekanligi ham taʼkidlandi.

Bayram tadbirida tuman Mudofaa ishlari boʻlimining faol xodimlari va faxriylariga tashakkurnomalar hamda tuman hokimligining esdalik sovgʻalari topshirildi.

Tuman Madaniyat boʻlimi tomonidan tayyorlangan katta adabiy-musiqiy dastur namoyish etildi. Kontsert dasturi davomida ijro etilgan Vatanni madh etuvchi kuy va qoʻshiqlar, dilrabo raqslar, kompozitsion sahna koʻrinishlari tomoshabinlarga bayramona ruh, xush kayfiyat baxsh etdi.

Tuman hokimligi Axborot xizmati.