"Mehr harakati" loyihasi doirasida ehtiyojmand oilalarning farzandlariga kiyim-kechaklar tarqatildi

Mamlakatimizda ehtiyojmand, kam taʼminlangan oilalarga har tomonlama koʻmaklashish borasida xayrli ishlar olib borilmoqda. Ayniqsa, bugungi qishning qirovli kunlarida qiyin sharoitda yashayotgan oilalarga yordam qoʻlini choʻzish maqsadida Qoraqalpogʻiston Respublikasi Joʻqorgʻi Kengesi tashabbusi bilan “Mehr harakati” loyihasi doirasidagi tadbirlar izchil davom ettirilmoqda.

Mazkur harakat doirasida barcha shahar va tumanlardagi nochor sharoitda yashayotgan oilalarni borib koʻrish va ularga amaliy yordam koʻrsatish maqsadida vazirlik, boshqarma, korxona, tashkilot rahbarlaridan iborat ishchi guruhlar tashkil etildi va ular ehtiyojmand oilalarga manzilli koʻmak berishmoqda.

Mazkur harakat doirasida 26-dekabr kuni Amudaryo tumani Madaniyat markazida tuman hokimligi hamda homiylar tarafidan 130ta ehtiyojmand oilalarning farzandlariga qishki kiyim-kechaklar tarqatildi.

Tadbirda tuman hokimi oʻrinbosari, Oila va xotin-qizlar boʻlimi boshligʻi Goʻzal Soburova, tuman Maktab va maktabgacha boʻlimi boshligʻi Yalgʻash Shomuratov, Yoshlar ishlari agentligi tuman boʻlimi boshligʻi Sardor Ismoilov, kam taʼminlangan, ehtiyojmand, boquvchisini yoʻqotgan oilalarning farzandlari ishtirok etdilar.

Tadbirda tuman hokimi oʻrinbosari, Oila va xotin-qizlar boʻlimi boshligʻi Goʻzal Soburova soʻzga chiqib, bugungi kunda “Mehr harakati” loyihasi doirasida qilanayotgan ishlar respublikamizning barcha hududlarida boʻlgani kabi tumanimizda ham qizgʻin tus olayotganini, hech kim mehr va eʼtibordan chetda qolmasligini aytib oʻtdi.

Taʼkidlanganidek, davlatimiz rahbari tashabbusi bilan ilgari surilgan “Inson qadri uchun” tamoyili asosida sharoiti ogʻir, kam taʼminlangan oilalarning hayoti bilan tanishish va ularga yordam koʻrsatish boʻyicha belgilangan vazifalar ijrosini taʼminlash, shahar va tumanlarda, ayniqsa chekka hududlarda istiqomat qiluvchi aholi yashash sharoitlarini yaxshilash, ularning hayot farovonligini taʼminlash maqsadida tashkil qilingan “Mehr harakati” loyihasida har qanday jismoniy va yuridik shaxslar ishtirok etib, imkon darajasida aholining ehtiyojmand qatlamiga yordam koʻrsatishi mumkin.

Loyihani amalga oshirishda birinchi navbatda qulay sharoitga ega boʻlmagan turar-joylarda yashab, qish kunlari uyini isitishga oʻtin, koʻmir sotib olishda, farzandlariga kiyim olib berishda qiynalayotgan, bundan tashqari, ijarada vaqtincha kun koʻrayotgan uy-joysiz, boshpanasiz oilalarga alohida eʼtibor qaratiladi.

Haqiqatan ham, mehr-oqibat, hamjihatlik kabi insoniy xislatlar bizga avlodlarimizdan meros boʻlib kelayotgan qadriyatlar sirasiga kiradi. Azal-azaldan xalqimiz har qanday sharoitda ham bir-biriga yelka tutgan, yordam qoʻlini choʻzgan. Koʻmakka muhtoj insonlar qoʻni-qoʻshni, qarindosh-urugʻ, mahalla hamda elu yurt yordami bilan oʻzini tiklab olgan. Ajdodlarimiz turli sinov va ofatlardan ham ana shunday birdamlik orqali oʻtgan, qiyinchiliklarni birgalikda mardona yenggan.

Yangi yil bayrami arafasida tashkil etilgan ushbu tadbir bolajonlarning quvonchiga quvonch qoʻshdi.

Tadbir yakunida tomoshabinlarga tuman Madaniyat boʻlimi tomonidan tayyorlangan kontsert dasturi namoyish etildi.

Tuman hokimligi Axborot xizmati