Xalq deputatlari Amudaryo tuman Kengashining navbatdan tashqari 67-sessiyasi toʻgʻrisida axborot

2023-yil 11-dekabr kuni Amudaryo tumani hokimligining majlislar zalida Xalq deputatlari tuman Kengashining navbatdan tashqari – 67-sessiyasi boʻlib oʻtdi.
Sessiyani Xalq deputatlari tuman Kengashi raisining oʻrinbosari Gʻulomjon Eshniyozov ochdi va olib bordi. Sessiya kotibligiga 4-Doʻstlik saylov okrugidan deputat Muqaddas Beknazarova saylandi.
Sessiyada tuman hokimi, sektorlar rahbarlari, deputatlar, tuman hokimi oʻrinbosarlari, hokimlik masʼul xodimlari, boʻlimlar, tashkilotlar rahbarlari, ovul va mahalla fuqarolar yigʻinlari masʼullari hamda ommaviy axborot vositalari vakillari ishtirok etdi.
Sessiyada dastlab 2023-2024-yillarning qish mavsumiga tayyorgarlik koʻrish va zararsiz oʻtkazish  choralari toʻgʻrisidagi masala yuzasidan tuman hokimi Sobir Xoʻjametov hisobot berdi.
Hisobotda 2023-yil - “Insonga eʼtibor va sifatli taʼlim” yilida ham tumanimiz aholisining fidokorona mehnatlari natijasida barcha sohalarda salmoqli natijalarga erishilayotganligi aytib oʻtildi.
Aytish kerakki, aholining yordamga muhtoj qatlamini har tomonlama qoʻllab-quvvatlash, qiyin kunlarida ularga koʻmakchi boʻlish maqsadida “Mehr harakati” karvoni davom etmoqda.
Xalqimizga xos bagʻrikenglikning ifodasi boʻlgan ushbu harakat negizida ijtimoiy yordamga muhtoj, boquvchisidan ayrilgan yoki yordamga ehtiyoji bor oilalardan xabar olinib, sovuq kunlarni talofatsiz oʻtkazib olishiga koʻmaklashilmoqda. Jumladan, yolgʻiz qariyalar, koʻp farzandli ehtiyojmand oilalarga issiq kiyim, oziq-ovqat tarqatish punktlarini tashkil etish choralari koʻrilmoqda. “Mehr harakati” tamoyili asosida “Saxovat va koʻmak” jamgʻarmasi va homiylar hisobidan 57 nafar oilaga 122,5 mln. soʻmlik yordamlar koʻrsatilgan. 105 nafar oilaga 42 tonna koʻmir, 78 nafar oilaga oziq-ovqat mahsulotlari, 4 nafar oilaga suyultirilgan gaz balloni, homiylar hisobidan 2ta oilaga gaz plitasi, 90 nafar oilaga isitish pechkasi, 25 nafar oilaga 105 dona issiq kiyim-kechaklar tarqatilgan.
Sessiyada joylarda xotin-qizlarni qiynayotgan muammolarni hal qilish hamda jamiyatda ayollarning nufuzini yanada oshirish boʻyicha koʻrilayotgan choralar samaradorligi toʻgʻrisida tuman hokim oʻrinbosari, Oila va xotin-qizlar boʻlimi boshligʻi Goʻzal Soburova hisobot berdi.
Hisobotda taʼkidlangandek, shu kungacha 4-bosqich “Ayollar daftari”ga kiritilgan 5 ming 398 nafar xotin-qizlarning 5 ming 330 nafariga yordamlar koʻrsatilgan.
Shundan, birinchi toifa - ijtimoiy himoyaga muhtoj ishsiz 1 ming  943 nafar ehtiyojmand xotin-qizlarning  bandligi taʼminlangan.
“Ayollar daftari”ga kiritilgan 200 nafar xotin-qizlar Xiva shahriga sayohatga olib borilgan hamda 14 nafar reablitatsiya moslamalariga muhtoj xotin-qizlarga 3ta hassa tayoq, 4 ta eshitish moslamasi, 7ta nogironlik aravachalari berilgan.
Sessiya ishida “Mehr harakati” boʻyicha yordamga muhtoj yoshlarga yordam berish masalasi yuzasidan Yoshlar ishlari agentligi tuman boʻlimi boshligʻi Sardor Ismoilov hisobot berdi.
Hisobotda taʼkidlangandek, tumandagi jami 14-30 yosh toifadagi 54 ming 503 nafar yoshlarning balansi shakllantirilgan. Xususan, 23 ming 551 nafar "yashil" toifa, 30 ming  952 nafar "sariq" toifa, 1 ming 316 nafar "qizil" toifalarga ajratilgan.
Joriy yil boshidan shu kungacha “Yoshlar daftari”ga 3 ming 769 nafar yoshlar kiritilgan boʻlib, shundan 2 ming 906 nafariga amaliy yordamlar koʻrsatilgan.
Sessiya yakunida tuman hokimi Sobir Xoʻjametov deputatlarni, ovul va mahalla fuqarolar yigʻinlari masʼullari hamda korxona-tashkilotlar rahbarlari bilan birgalikda faol ish olib borgan holda "Mehr harakati" doirasida amalga oshirilayotgan ishlarga hissa qoʻshishga, aholining ehtiyojmand qatlamini ijtimoiy himoya qilish, qish mavsumini betalofat oʻtkazishlariga koʻmaklashish borasida amalga oshirayotgan tadbirlarga hissa qoʻshishga chaqirdi.
Sessiyada Kengash vakolatiga kiruvchi boshqa masalalar ham muhokama qilindi. Kun tartibidagi barcha masalalar atroflicha koʻrib chiqilib, tuman Kengashining tegishli qarorlari qabul qilindi.
Shuning bilan sessiya oʻz ishini yakunladi.

Tuman hokimligi Axborot xizmati