YOʻL HARAKATI XAVFSIZLIGINI TAʼMINLASh BOʻYIChA NAZORAT TADBIRLARI OʻTKAZILDI

Mamlakatimizda yoʻl harakati xavfsizligini taʼminlash borasida tizimli ishlar amalga oshirilmoqda. Jumladan, shahar va qishloqlarda yangi yoʻllar va koʻpriklar qurildi, taʼmirtalab boʻlgan koʻplab yoʻllar rekonstruktsiya qilindi. 2023-yilning 9 oyi ichida tartibga solinmagan piyodalar oʻtish joylarida qariyb 9,2 ming yotiq chiziqlar chizilgan, 417 svetofor obʼektlari hamda piyodalar uchun 210 ta svetofor qurilgan.

Shunga qaramasdan, yoʻl harakati qoidalarini buzish holatlari ortib bormoqda. Masalan, 2023-yilning 9 oyi ichida mamlakatimizda yoʻl-transport hodisalari soni oʻtgan yilga nisbatan 2,4 foizga oshgan. Koʻp hollarda baxtsiz hodisa natijasida fuqarolar tan jarohati olib, oʻlim holatlari ham kuzatilyapti.

Shu munosabat bilan davlat yoʻllarda koʻngilsiz hodisalar sonini kamaytirishga qaratilgan bir qator chora-tadbirlarni amalga oshiryapti. Jumladan, yoʻl harakati qoidalarini buzganlarga nisbatan jarima tizimini qoʻllashdir. Butun dunyoda bundan koʻzlangan asosiy maqsad – haydovchi va piyodalarni yoʻl harakati xavfsizligi qoidalarini bajarishga undash va ularni noqonuniy xatti-harakatlar amalga oshirishdan tiyishdir.

Joriy yilning 19-20-noyabr kunlari va dekabr oyining boshida Amudaryo tumanida ham tan jarohati bilan bogʻliq va ogʻir oqibatli yoʻl transport hodisalarining oldini olish, mast holatda avtotransport vositalarini boshqarish bilan bogʻliq vaziyatlarga chek qoʻyish, shuningdek, muddati oʻtgan qarzdorliklarni undirish maqsadida nazorat tadbirlari oʻtkazildi.

Nazorat tadbirlari davomida haydovchilik guvohnomasiga ega boʻlmay turib avtomobil boshqarish, boshqa odamga tegishli avtomobilni boshqarish, tezlikni oshirish mumkin boʻlmagan hududlarda katta tezlik bilan avtomotransport vositalarini boshqarish, ichki ishlar organi xodimining qonuniy talabiga boʻysunmaslik, tegishli hujjatlarsiz avtomobiliga arava ulash kabi qoʻpol turdagi maʼmuriy huquqbuzarliklar aniqlandi. Mazkur huquqbuzarliklarni sodir etgan haydovchilarga nisbatan tegishli tartibda maʼmuriy jazo choralari koʻrildi.

Shuningdek, tadbir davomida toʻy kortejlari bilan bogʻliq xunuk holatlar ham kuzatildi. Xususan, tezlikni oshirish man qilingan, aholi gavjum boʻlgan, shuningdek, taʼlim-tarbiya muassasalari joylashgan hududlarda yoʻlni band qilib, tartibsiz ravishda toʻy sayri uyushtirish, yurib ketayotgan avtomobilning oynasidan yarim beligacha tashqariga chiqib, namoyishkorona selfiga tushish kabi holatlar boʻyicha ham maʼmuriy bayonnomalar tuzilib, huquqbuzar, haydovchilar va toʻy korteji ishtirokchilariga nisbatan tegishli tartibda maʼmuriy jazo choralari belgilandi.

Xalqimiz falokat oyoq ostida, deb bekorga aytishmagan. Lekin har qanday falokat yoki baxtsiz hodisaning oldini olish esa insonning oʻziga bogʻliq. Qolaversa, haydovchilik ham odamdan yoʻl harakati qoidalari bilan bogʻliq madaniyatni, ogohlikni talab etadi. Chunki yoʻl – faqat haydovchiniki emas, umummanfaati uchun xizmat qiluvchi ijtimoiy, madaniy va iqtisodiy mulk hisoblanadi. Shu bois, haydovchilar ana shu mulkdan foydalanuvchilar daxlsizligini taʼminlashga burchlidirlar. Shu bilan birga, insonlar hayotini xavf-xatarga qoʻymaslik uchun hamisha yoʻllarda madaniyatli tarzda harakat qilmoqlari shart.

Robiya YOʻLDOShEVA.