EL XIZMATIDAGI NURONIY OTAXON

Yurtimizda xonadonlar fayzi, farishtasi boʻlgan nuroniy otaxon va onaxonlarga alohida hurmat koʻrsatish, eʼzozlash ham millatimizga xos boʻlgan qadriyatlardan biri sanaladi. Darhaqiqat, yoshi ulugʻ insonlar bor boʻlgan uyning fayz-u barakasi ham boshqacha boʻladi. Ular farzandlar va nabiralarning nafaqat duogoʻyi, balki eng yaqin maslahatchisi, oʻz hayotiy tajribalari asosida toʻgʻri yoʻl koʻrsatuvchilardir.

Shu bois keksa avlod vakillarini ulugʻlash, ularning tajribasiga tayanish oilalarimizdagi kabi jamiyatda ham oʻz ifodasini topmoqda. Prezidentimiz rahnamoligida amalga oshirilayotgan, inson manfaatlari ustuvor davlatimiz siyosatida yoshi ulugʻ insonlarni ijtimoiy muhofaza qilish, ularni moddiy va maʼnaviy qoʻllab-quvvatlash, turmush darajasini oshirish eng muhim ustuvor yoʻnalishlardan biri sifatida belgilangan.

Amudaryo televideniyesi tahririyatining “Yuksak maʼnaviyatli va axloqli yoshlar – kelajak poydevori” nomli grant loyihasi doirasida ham “Keksalar – xonadonlarimiz fayzi va farishtasi” shiori ostida keksalarni eʼzozlash, ularning pand-nasihatlarini yoshlarga yetkazish orqali jamiyatda oʻzaro hurmat va mehr-muhabbat, yuksak axloqiy va maʼnaviy qadriyatlar muhitini shakllantirish borasida tadbirlar tashkil etilmoqda. Ushbu tadbirlar muntazam ravishda tumandagi ommaviy axborot vositalarida yoritib borilmoqda.

Ayni paytda Amudaryo tumani “Nuroniylar” jamoatchilik Kengashi raisi boʻlib faoliyat koʻrsatib kelayotgan Bekman ota Allaberganov ham bu borada ibratga loyiq, arzigulik ishlar amalga oshirmoqda. Otaxon uzoq yillar taʼlim tizimida va boshqa sohalarda fidoyilik bilan mehnat qilib, nafaqaga chiqqan boʻlishiga qaramasdan oʻzini ezgu va xayrli ishlarga baxshida etib kelmoqda.

 Bekman otani nafaqat tumanimizda, balki butun qoraqalpoq elida faol nuroniy sifatida juda yaxshi tanishadi. Ota doim xalq orasida, pand-nasihatlari, oʻgit va maslahatlari bilan hammani ezgu ishlarga daʼvat qilib kelmoqda. Ayniqsa, yoshlar tarbiyasiga juda eʼtiborli, ularning yurt kelajagiga munosib, komil insonlar boʻlib voyaga yetishlari uchun astoydil jon kuydiradi. Hali-hamon xalq xizmatida yurgan Bekman Allaberganovning Amudaryo televideniyesidagi “Odoblar xazinasi” mualliflik koʻrsatuvi va xalqimizga xos boʻlgan milliy-maʼnaviy qadriyatlarni avaylab-asrashga qaratilgan davra suhbatlari, tadbirlarini har doim xalqimiz sevib qarshi oladi. Bugungi kunda uning ishtirokidagi tarbiyaviy koʻrsatuvlarning muxlislari juda koʻp.

Hozirgi kunda Toshyop ovulida yashayotgan Bekman Allaberganov 1947-yilda tugʻilgan. U 1963-1968-yillarda Toshkent Davlat pedagogika institutining fizika-matematika fakultetini tamomlab, uzoq yillar 16-sonli va 5-sonli umumtaʼlim maktablarida oʻquvchi-yoshlarga fizika-matematika fanlaridan saboq berdi. Tashabbuskor, xalq hayotiga doir muammolar yechimini topishdagi oʻziga xos fikrga ega boʻlgan Bekman Allaberganov tuman rahbariyatining nazariga tushib, 1987-1995-yillarda Xalq deputatlari Amir Temur nomli ovul Kengashi ijroiya qoʻmitasi raisining oʻrinbosari vazifasiga qoʻyildi. Keyinchalik bir necha yil tadbirkor sifatida faoliyat yuritgan Bekman Allaberganov 1999-2003-yillar oraligʻida Amir Temur nomli ovul mahalla posboni sardori, 2003-2008-yillarda esa mazkur fuqarolar yigʻini raisi vazifalarida sidqidildan mehnat qildi.

Xalqqa fidokorona xizmat qilgan otaxon nafaqaga chiqqanidan keyin 2014-2017-yillarda “Nuroniy” jamgʻarmasi tuman boʻlimi raisi, 2017-2020-yillarda esa Oʻzbekiston faxriylarining ijtimoiy faoliyatini qoʻllab-quvvatlash jamoat birlashmasi shaklidagi “Nuroniy” jamgʻarmasi tuman boʻlimi raisi vazifalarida ishladi. Shu davrlar ichida qanchadan-qancha ezgu ishlarga kamarbasta boʻldi, oilaviy nizolar, ajrashishlarning oldi olinishiga, yoshlarning odob-axloqli, yetuk insonlar boʻlib kamolga yetishlariga hissa qoʻshdi, hayotda oʻz oʻrinlarini topishlariga koʻmaklashdi.

El-yurt fidoyisi Bekman ota haliga qadar tinib-tinchimaydi. Goh u mahallada, goh bu ovulda fuqarolar yigʻini masʼullari, faollari bilan uchrashadi. Ularga boy hayotiy tajribalaridan kelib chiqib, maslahatlar beradi, yoʻl-yoʻriqlar koʻrsatadi. Xonadonlarga kirib borib, oʻzi kabi nuroniylarning suhbatidan bahramand boʻladi, yangi oila qurgan yoshlarga esa pand-nasihatlar berib, inoqlikda umr kechirishga, mustahkam oila qoʻrgʻonini bunyod etishga chaqiradi.

Bugun faqatgina oilaviy hayotda emas, balki turli sohalarda erishayotgan yutuqlarimizda ham moʻʼtabar keksalarimizning ulkan xizmatlari bor. Bekman ota Allaberganov kabi tabarruk insonlar, duogoʻylarimizning erta-yu kech tillaridan tushmaydigan duo-yu tilaklari bois, yurtimizda tinchlik barqaror, xonadonlarda chiroyli toʻylar boʻlmoqda.

Keksalari eʼzoz topgan yurtning kelajagi ham obod boʻladi deyishadi. Elimiz fayzi, farishtasi boʻlgan ana shunday nuroniylarimiz eʼzoz va hurmatda boʻlib, uzoq hayot kechirsin.

O.Xudoyberganova.