“YIL AYoLI” MILLIY TANLOVINING TUMAN BOSQIChI GʻOLIBLARI ANIQLANDI

2022-yil 27-aprel kuni Oʻzbekiston Respublikasi Oliy Majlisi Senati Kengashining “Yil ayoli” va “Gender tenglik faoli” milliy tanlovlarini oʻtkazish toʻgʻrisida”gi Qarori qabul qilingan edi. Qarorga muvofiq jamiyat hayotida faol ishtirok etayotgan, har jihatdan ibratli xotin-qizlarni qoʻllab-quvvatlash, gender tenglikni taʼminlash borasida olib borilayotgan islohotlarni keng targʻib qilish va jamoatchilikka yetkazish maqsadida “Yil ayoli” milliy tanlovi respublikamiz boʻylab oʻtkazilib kelinmoqda.

20-oktyabr kuni Amudaryo tumanidagi 82-sonli umumtaʼlim maktabining majlislar zalida “Yil ayoli” milliy tanlovining tuman bosqichi boʻlib oʻtdi.

Tanlovda mamlakatimizning ijtimoiy-iqtisodiy rivojlanishiga munosib hissasini koʻshib kelayotgan, yuksak maʼnaviyatli, oilada va farzand tarbiyasida ibrat boʻlish bilan birga oʻzi faoliyat koʻrsatayotgan tashkilot nufuzini oshirishda faol ishtirok etayotgan turli soha egalari boʻlgan ayollar qatnashdi.

Prezidentimiz “Maʼrifatli jamiyatni maʼrifatli onalarsiz qurib boʻlmaydi!” gʻoyasini ilgari surar ekan, ayollarning nainki oila va jamiyatdagi, balki Vatan va millat taqdiridagi oʻrni beqiyos ekanini ham alohida taʼkidlaydi. Turli jabhalarda faollik koʻrsatayotgan fidoyi xotin-qizlarni aniqlashda esa koʻrik-tanlovlarning ahamiyati katta.

Keng jamoatchilik vakillari ishtirokida oʻtkazilgan tadbir ochilishida soʻz olgan tuman hokimi oʻrinbosari, Oila va xotin-qizlar boʻlimi boshligʻi Goʻzal Soburova keyingi yillarda mamlakatimizda xotin-qizlarni qoʻllab-quvvatlash, ularning jamiyatdagi oʻrni, roli va nufuzini oshirishga qaratilgan keng koʻlamli ishlar olib borilayotganligini, qator loyiha va tanlovlar oʻtkazilayotganligini taʼkidladi.

Mazkur tanlovdan koʻzlangan maqsad ham jamiyatimiz rivojiga munosib hissa qoʻshib kelayotgan, yuksak maʼnaviyatli, oilada va ishda barchaga oʻrnak boʻlayotgan, davlat va jamoat ishlarida faol xotin-qizlarni qoʻllab-quvvatlash, ularning ilgʻor tajribalarini ommalashtirishdan iborat ekani qayd qilindi.

Nizomga koʻra, tanlovda 35 yoshdan yuqori hamda oʻz faoliyati bilan kamida 5-yil mobaynida uzluksiz shugʻullanib kelayotgan ayollar ishtirok eta oladi. Tanlovning tuman bosqichida 5 nafar ishtirokchilar uchta shart boʻyicha bellashdilar hamda ularning bilim va mahoratlari 5 balli tizim asosida baholandi. Yakunda umumiy natijalar boʻyicha Nazarxon ovulidagi 3-sonli umumtaʼlim maktabining kutubxonachisi Tazaxon Qidirniyazova birinchi oʻrinni egallab, tunlovning Qoraqalpogʻiston Respublikasi bosqichiga yoʻllanmani qoʻlga kiritdi.

Bundan tashqari, Mohira Sobirova, Anbarjon Salayevalar “Yilning eng jonkuyar ustozi”, Nodira Tajimuratova “Oʻz kasbining ustasi boʻlgan yil ayoli”, Qanigul Aytboyeva esa “Yilning eng yaxshi ijodkor ayoli” nominatsiyalari boʻyicha gʻolib boʻldilar.

Tanlov gʻoliblariga va ishtirokchilarga tashkilotchilar tomonidan diplom va qimmatbaho sovgʻalar topshirildi.

Tuman hokimligi Axborot xizmati