«XAVFSIZ TUN» TEZKOR-PROFILAKTIK TADBIRLARI DAVOM ETMOQDA

Amudaryo tumanida fuqarolarning huquqlari, erkinliklari va qonuniy manfaatlarini, jismoniy va yuridik shaxslarning mulkini himoya qilish, qonun ustuvorligini, shaxs, jamiyat va davlatning xavfsizligini taʼminlash, huquqbuzarliklarning oldini olish maqsadida «Xavfsiz tun» tezkor va profilaktik tadbirlari oʻtkazilib kelinmoqda.
9-oktyabrdan 10-oktyabrga oʻtar kechasi tungi vaqt davomida tuman hududida boʻlib oʻtgan navbatdagi tadbirda tuman Ichki ishlar boʻlimi profilaktika inspektorlari, Yoʻl harakati xavfsizligi boʻlinmasi, prokuratura, Qoʻriqlash boʻlimi, Favqulodda vaziyatlar boʻlimi,  Tibbiyot birlashmasi xodimlari, fuqarolar yigʻinlari raislari, hokim yordamchilari hamda yoshlar yetakchilari jalb etildi.
Tuman hokimligi binosi oldida dastlab tegishli topshiriqlarni belgilab olish va xizmat oldi yoʻriqnomasi  berish uchun oʻtkazilgan yigʻilishda Oʻzbekiston Respublikasi Bosh prokuraturasi tergov tarmoqlari faoliyati ustidan nazorat katta prokurori Abdurahmon Abdullayev, tuman prokurori Aziz Roʻzmetov, Ichki ishlar boʻlimi boshligʻi Jamoladdin Yusupov va boshqa masʼullar qatnashishdi. Yigʻilishni tuman Ichki ishlar boʻlim boshligʻi Jamoliddin Yusupov kirish soʻzi bilan ochib berdi va muhtaram Prezidentimizning 2021-yil 29-noyabr kungi “Oʻzbekiston Respublikasi Jamoat xavfsizligi kontseptsiyasini tasdiqlash va uni amalga oshirish chora-tadbirlari toʻgʻrisida”gi Farmoni boʻyicha qisqacha toʻxtaldi. Ushbu Farmonning ijrosini taʼminlash maqsadida Respublika miqyosida “Xavfsiz tun” tadbirlari oʻtkazilayotgani, barcha huquq-tartibot idoralarining jamoat xavfsizligini taʼminlash, huquqbuzarliklar profilaktikasi va jinoyatchilikka qarshi kurashishdagi hamkorligi oʻz samarasini berishini alohida taʼkidlab oʻtdi.
Shuningdek, fuqarolar oʻrtasida jinoyat va huquqbuzarliklarning oldini olish hamda tungi vaqtlarda jamoat joyi va turli koʻngilochar maskanlarda jamoat tartibini saqlash boʻyicha hamkorlikdagi yangi amaliyot uslublarining amaliy ijrosi samara berayotganligi taʼkidlanib, bu boradagi ishlarni jadallashtirish yuzasidan vazifalar belgilab olindi.
Reyd davomida tadbirga jalb etilgan xodimlar tomonidan tuman hududidagi jinoyat sodir etilishiga imkon beruvchi shart-sharoitlar oʻrganildi. Jamoat joylarida piyodalar, avtotransport vositalarining harakat xavfsizligi qoidalariga amal qilishi nazorat qilindi, probatsiya nazoratidagi shaxslarning oʻrnatilgan cheklovlarga rioya etishi tekshirildi. Shuningdek, tungi vaqtdagi Ichki ishlar va Qoʻriqlash boʻlimlarining tezkor harakatlanuvchi guruhlarining shaylik holati, mahallalardagi tayanch punktlari faoliyati, ularda tungi navbatchilikni tashkil etilganligi, aholi murojaatlarining qabul qilinishi, tezkor chora-tadbirlar koʻrilishi, jamoat xavfsizligini taʼminlash boʻyicha hamkorlikdagi ishlarning amaliy ijrosi oʻrganildi.
Undan tashqari, tungi vaqtlarda yurgan fuqarolar bilan profilaktik suhbat oʻtkazilib, ushbu fuqarolarni shaxsiga oydinlik kiritildi. Spirtli ichimlik isteʼmol qilgan, bemaqsad yurgan fuqarolar tuman Ichki ishlar boʻlimiga olib kelindi va ularning shaxsi aniqlanib, tezkor-profilaktik suhbatdan oʻtkazildi. Ular huquqbuzarlik va jinoyat sodir etmasliklari toʻgʻrisida rasman ogohlantirildi.
Tadbir davomida umumiy ovqatlanish shoxobchalari, tumandagi istirohat bogʻi, korxona-tashkilotlar, savdo va maishiy xizmat koʻrsatish obʼektlari tekshirildi. Tungi vaqtlarda ishlayotgan turli obʼektlar va ularda faoliyat olib borayotgan shaxslar bilan profilaktik suhbatlar oʻtkazildi.
Reyd tadbiriga jalb etilgan xodimlar tomonidan aniqlangan holatlar oʻrganilib, tegishli choralar koʻrildi. Tuman hududida huquqbuzarlik va jinoyatlar, transport yoʻllarida turli xavfli hodisalar sodir etilishining oldini olish, aholining tinchlik-osoyishtaligini saqlashda muhim ahamiyat kasb etayotgan bu kabi tadbirlarni kelgusida kengroq miqyosda, hamkor tashkilotlarni jalb etgan holda oʻtkazishga kelishib olindi.

Ilhom Abutov, tuman IIB HPB boshligʻi, podpolkovnik.