AMUDARYo TUMANI “INSON” IJTIMOIY XIZMATLAR MARKAZI BOShLIGʻI TAYINLANDI

16-avgust kuni Amudaryo tumani hokimligining majlislar zalida tuman “Inson” ijtimoiy xizmatlar markazi raisini tayinlash masalasiga bagʻishlangan yigʻilish boʻlib oʻtdi.

Yigʻilishda Oʻzbekiston Respublikasi Prezidenti huzuridagi Ijtimoiy himoya milliy agentligi Qoraqalpogʻiston Respublikasi boshqarmasi raisi Saylaoʻbay Daniyarov, tuman hokimining yoshlar masalalari boʻyicha oʻrinbosari Mahmud Shermetov, fuqarolarning oʻzini oʻzi boshqarish organlari raislari, bir guruh faxriylar ishtirok etdilar.

Yigʻilish avvalida ishtirokchilarga Oʻzbekiston Respublikasi Prezidenti huzuridagi Ijtimoiy himoya milliy agentligi raisining buyrugʻi asosida agentlikning Qoraqalpogʻiston Respublikasi Amudaryo tumanidagi “Inson” ijtimoiy xizmatlar markazi boshligʻi lavozimiga Duysenbayev Gʻulomjon Ismoilovich tayinlangani maʼlum qilindi.

Gʻulomjon Duysenbayev 1983-yilda Amudaryo tumanida tugʻilgan. 2007-yilda Qoraqalpoq davlat universitetini tamomlagan. Mehnat faoliyat davomida Amudaryo akademik litseyi oʻqituvchisi, mazkur akademik litsey direktorining maʼnaviy va maʼrifiy ishlar boʻyicha oʻrinbosari, ushbu akademik litsey direktori, tuman hokimligi tashkiliy-nazorat guruhi rahbari lavozimlarida faoliyat olib borgan. Keyinchalik Amudaryo tumani hokimining oʻrinbosari – Mahalla va oilani qoʻllab-quvvatlash boʻlimi boshligʻi lavozimida faoliyat yuritgan. Gʻulomjon Duysenbayev shu kunga qadar tuman Kambagʻallikni qisqartirish va aholi bandligiga koʻmaklashish boʻlimi boshligʻi vazifasida ishlab kelayotgan edi.

Aytish joizki, Oʻzbekiston Respublikasi Prezidentining 2023-yil 1-iyundagi “Aholiga sifatli ijtimoiy xizmat va yordam koʻrsatish hamda uning samarali nazorat tizimini yoʻlga qoʻyish boʻyicha kompleks chora-tadbirlar toʻgʻrisida”gi Farmoni bilan davlat tomonidan aholini manzilli himoya qilishning asosiy yoʻnalishlari belgilab berildi. Bu esa mazkur yoʻnalishdagi ishlarni yangi bosqichga koʻtarishga xizmat qilmoqda.

Farmonga muvofiq endilikda hududlarda ijtimoiy himoya tizimini joriy qilish va uning samaradorligi va manzilliligini oshirish orqali aholining koʻmakka muhtoj qatlami ijtimoiylashuvini taʼminlash hamda ijtimoiy himoyani mahalla darajasigacha tashkil etish, turmushi ogʻir ahvolga tushib qolgan aholiga individual yondashuvga muvofiq ijtimoiy xizmat va yordam koʻrsatishni yoʻlga qoʻyishga alohida eʼtibor qaratiladi.

Aholiga individual yondashuv asosida ijtimoiy koʻmak koʻrsatishda hech shubhasiz aytish mumkinki, soʻnggi yillarda yaratilgan “Ayollar daftari”, “Yoshlar daftari”, “Temir daftar” tizimlarining oʻrni beqiyos. Oʻz navbatida, mahallalarda hokim yordamchilari va yoshlar yetakchilari lavozimlarining joriy etilgani esa ijtimoiy himoyani mahalla darajasida tashkil etish imkonini bermoqda.

Bu boradagi ishlarni yanada kuchaytirish maqsadida yuqoridagi Farmonga koʻra tuman va shaharlarda “Inson” ijtimoiy xizmatlar markazlari tashkil etilib, ijtimoiy xodimlar guruhlari faoliyati yoʻlga qoʻyilishi belgilangan.

Yigʻilishda tegishli masʼullarga har bir xonadon ahvolini oʻrganib, oilalardagi haqiqiy holatni hamda ularning ijtimoiy xizmatlar va yordamga boʻlgan ehtiyojini aniqlash, oilalarning iqtisodiy-ijtimoiy holati va ehtiyojlarini oʻrganish natijasida ularning ijtimoiy pasportlarini shakllantirish, ogʻir ahvolga tushib qolgan va ogʻir ahvolga tushib qolish xavfi yuqori boʻlgan oilalarni muntazam ravishda monitoring qilib borish, ular uchun ijtimoiy xizmat va yordamlarni tashkil etish boʻyicha koʻrsatmalar berildi.

Shuni taʼkidlash lozimki, aholining ijtimoiy qoʻllab-quvvatlashga ehtiyoji yuqori boʻlgan qatlamini manzilli aniqlash borasida yangi tizimning joriy etilishi kelgusida aholi turmush farovonligining yanada yuksalishida oʻzining ijobiy samaralarini beradi.

Tuman hokimligining Axborot xizmati.