30-iyun – Yoshlar kuni. ChOYKOʻL OVULIDAGI YoShLAR YeTAKChISI FAOLIYaTIGA BIR NAZAR

Yoshlarning doimiy ish bilan bandligini taʼminlash, ularning hayotlaridagi muammo va tashvishlarini ijobiy hal etishda ovul va mahallalarda faoliyat olib boruvchi yoshlar yetakchisining tutgan oʻrni muhim ahamiyatga ega. Xususan, yoshlar yetakchisi – hokim yordamchisi – oila va xotin-qizlar faoli hamkorligi asosida yoshlar yetakchisining kundalik ish faoliyatida amalga oshiradigan vazifalari talaygina. Ayni kunlarda 30-iyun – Yoshlar kuni munosabati bilan butun mamlakatimiz boʻylab keng quloch yoygan “Yoshlar oyligi” tadbirlarida joylardagi yoshlar yetakchilarining oʻz zimmalaridagi vazifalarni nechogʻlik uddalayotganlari alohida eʼtirof etilmoqda.

Amudaryo tumanidagi 49 ta ovul va mahalla fuqarolar yigʻinlarida yoshlar muammolari bilan shugʻullanish barobarida ular erishayotgan yutuqlarni ommalashtirish va oʻz vaqtida moddiy-maʼnaviy ragʻbatlantirish orqali oʻz atrofiga faol, intiluvchan yoshlarni jipslashtirib, xalqimiz farovonligiga munosib hissalarini qoʻshayotgan yoshlar yetakchilari ham koʻpchilikni tashkil etadi.

Choykoʻl ovulida faoliyat olib borayotgan yoshlar yetakchisi Xursand Shukurullayev ham yoshlar bilan ishlashish, ovul yoshlarini ezgu maqsadlar yoʻlida jipslashtirish, ularning boʻsh vaqtlarini samarali tashkil etish, yoshlar tadbirkorligini rivojlantirish borasida oʻziga xos tajribaga ega yetakchilardan biri. U avvalo ishni ovul hududidagi 1218 ta xonadonlarda istiqomat qiluvchi 14 yoshdan 30 yoshgacha boʻlgan yoshlar hayotini oʻrganishdan boshladi. Shu maqsadda ovuldagi hokim yordamchisi, xotin-qizlar faoli bilan hamkorlik rejasini ishlab chiqdi va 14-30 yosh oraligʻidagi 1920 nafar yoshlar xatlovdan oʻtkazildi. 915 nafar yosh ayol-qizlar va 1005 nafar yigitning 5 toifa boʻyicha bandligi, ishga layoqatliligi, maʼlumoti, oilaviy, ijtimoiy, salomatlik holatlari puxta oʻrganilib, “Yoshlar balansi” shakllantirildi. Shu asosda 2023-yil boshidan 121 nafar yoshlar “Yoshlar daftari”ga kiritilib, ijtimoiy himoyaga muhtoj yoshlar ushbu daftarga toʻliq qamrab olindi va ularning barchasiga ijtimoiy yordam koʻrsatildi. Xususan, 18 nafar yoshlarning kredit mablagʻlari olish boʻyicha muammolari toʻliq hal etilib, 78 nafar yoshlarga esa 1 nuroniyga 10 yosh tamoyili asosida ekishlik yer maydonlari ajratilishida yoshlar yetakchisi bosh-qosh boʻldi. Shuningdek, Xursand Shukurullayev 2 nafar yoshning kasanachilik faoliyati bilan shugʻullanish boʻyicha istagini qoʻllab-quvvatlab, ularga zarur asbob-uskunalar olib berishda koʻmaklashdi. Turli OTMlar va texnikumlarda taʼlim olayotgan 15 nafar talabaning shartnoma pullari toʻlab berildi. Bundan tashqari, 2 nafar kam taʼminlangan yosh haydovchilik guvohnomasiga ega boʻlishlari uchun oʻqitildi. 6 nafar yoshning safarbarlik chaqiruv-rezervi uchun shartnoma mablagʻlari toʻlanishiga yaqindan yordam berdi.

Ovul yoshlarini tadbirkorlik faoliyatiga qiziqtirish, ularning oʻz tadbirkorligini boshlashlari uchun koʻmaklashish maqsadida hokim yordamchisi bilan hamkorlikda faoliyat olib borilayotgani bois, bu borada ham sezilarli yutuqlarga erishilmoqda. Izlanuvchan, tashabbuskor yoshlardan Qahramon Oʻrozimbetovning oʻz biznes-loyihasini amalga oshirish borasidagi murojaati hokim yordamchisining koʻmagi tufayli ijobiy hal etildi. Natijada ovul hududida “Saodat” xoʻjalik sovuni ishlab chiqarish oilaviy korxonasi tashkil etish boʻyicha Qahramon Oʻrozimbetovga imtiyozli kredit ajratiladigan boʻldi. Doniyorbek Otajonov esa AKFA deraza va eshik romlari, temir eshiklar ishlab chiqarish tsexi faoliyatini yoʻlga qoʻyish arafasida turibdi.

“Yoshlar oyligi” munosabati bilan Sanobarxon Jumaboyevaning murojaati ham ijobiy hal etilib, subsidiya asosida “Yoshlar daftari” jamgʻarmasi hisobidan tikuv mashinasi olib berildi. Ayni paytda Sanobar Jumaboyeva oʻzi tengi qishloq yoshlariga chevarlik sirlarini oʻrgatishni boshlab yubordi.

Xursand Shukurullayevning faoliyat koʻlami juda keng va serqirra. U oʻz faoliyatida “Yoshlarning boʻsh vaqti – yetakchining ish vaqti” shioriga amal qiladi. Ayni kunlarda esa maktablarda yozgi taʼtil boshlanishi munosabati bilan 16 00dan keyin ovul hududidagi umumtaʼlim maktablarining sport zallari, ochiq stadionlarida yoshlarning boʻsh vaqtlarini mazmunli oʻtkazishga qaratilgan turli sport musobaqalarini tashkil etish, kutubxonalarda kitobxonlik tadbirlarini oʻtkazish orqali yoshlar maʼnaviyatini yuksaltirish, Choykoʻl madaniyat markazida tashkil etilgan toʻgaraklar aʼzolari ishtirokida koʻngilochar kontsert dasturlarini tashkil etishga alohida eʼtibor qaratilayotgani bois, ovul yoshlari orasida ilmga intiluvchan, tashabbuskor va izlanuvchan yoshlar safi tobora oshib bormoqda.

Robiya YOʻLDOShEVA.