OʻRTAQALʼA OVULIDA YaNGI OILAVIY NODAVLAT MTT FOYDALANIShGA TOPShIRILDI

Oʻrtaqalʼa ovulida “Dostonbek” nomli yangi oilaviy nodavlat maktabgacha taʼlim tashkiloti foydalanishga topshirildi.

1-iyun kuni ushbu muassasaning ochilish marosimiga bagʻishlangan tadbir boʻlib oʻtdi. Tadbirda tuman hokimi oʻrinbosarlari Goʻzal Soburova, Mahmud Shermetovlar, Maktab va maktabgacha taʼlim boʻlimi, fuqarolar yigʻini masʼullari, ovul faollari ishtirok etishdi. Tadbirda soʻzga chiqqan tuman hokimi oʻrinbosari Goʻzal Soburova va boshqalar ovul aholisini, kichkintoylarni Xalqaro bolalarni himoya qilish kuni va yangi muassasa ishga tushirilgani bilan tabriklashdi. Shuningdek, mamlakatimizda va tumanimizda maktabgacha taʼlim tashkilotlarining faoliyatini takomillashtirish, bolalarni qamrab olish borasida amalga oshirilayotgan keng koʻlamli ishlarga toʻxtalib oʻtishdi.

Taʼkidlash lozimki, yurtimizda barcha sohalarda boʻlgani kabi maktabgacha taʼlim tizimiga ham alohida eʼtibor qaratilmoqda. Maktabgacha taʼlim muassasalarining soni va sifatining yildan-yilga oshib borayotgani buning yorqin misolidir. Tumanimizda ham 3-7 yoshdagi bolalar soni 17 ming nafarga yaqin. Hozirgi kunda tumanda 130 tadan ziyod davlat, davlat xususiy sheriklikdagi va oilaviy nodavlat maktabgacha taʼlim tashkilotlari faoliyat yuritmoqda. Ushbu maktabgacha taʼlim tashkilotlariga qamrab olingan bolalar soni  esa 12 237  nafarni, yaʼni 72,7 foizni tashkil qiladi.

Marosimda tuman hokimligi, Maktabgacha va maktab taʼlimi boʻlimi, fuqarolar yigʻini masʼullari, ovul nuroniylari ishtirokida maxsus lentalar qirqildi. Shundan soʻng, tadbir ishtirokchilari yangidan ishga tushirilgan ikki qavatli maktabgacha taʼlim tashkiloti binosida bolajonlar uchun yaratilgan shart-sharoitlar bilan tanishdilar.

Tashabbuskor shu ovuldagi yakka tadbirkor Mavluda Madrahimovaning oʻz mablagʻi va tijorat bankidan olingan kredit hisobidan bunyod etilgan 50-oʻringa moʻljallangan zamonaviy tipdagi “Dostonbek” oilaviy nodavlat maktabgacha taʼlim tashkilotining foydalanishga topshirilishi ovul kichkintoylari uchun haqiqiy bayram tuhfasi boʻldi. Tashkilot ish boshlashi natijasida hududdagi 50 nafar bolalarni maktabgacha taʼlimga jalb qilish va 6 nafar ishsiz xotin-qizlarni ish bilan taʼminlash imkoniyati yaratildi.

Shu kuni muassasaga 25 nafar kichkintoy qabul qilindi. Yangi ish oʻrinlari tashkil qilinib, 1 nafar oliy maʼlumotli tarbiyachi, 1 nafar yordamchi tarbiyachi, oshpaz, hamshiralar kichkintoylar taʼlim-tarbiyasiga masʼul qilib qoʻyildi. Tashkilot rahbari tarbiyalanuvchilar soni 50 nafarga yetkazilganidan soʻng, muassasada yana yangi ish oʻrinlari yaratilishini, ishchilar olinishini maʼlum qildi. Tadbir ishtirokchilarini kelgusidagi rejalari bilan ham tanishtirib, ushbu maskanda bolajonlar uchun rus, ingliz tillari, musiqa, raqs, sanʼat, mohir qoʻllar va bir qator sport toʻgaraklari mashgʻulotlari muntazam yoʻlga qoʻyilishini ham aytib oʻtdi.

Tashkilotda tarbiyalanuvchilarning taʼlim-tarbiya olishlari uchun barcha shart-sharoitlar yaratilgan. Mashgʻulotlar xonalari, dam olish va ovqatlanish xonalari, oshxona, hamshira xonasi zarur jihozlar bilan jihozlangan. Bu yerdagi bolalarga mos tarzda bezatilgan keng, yorugʻ xonalar, oʻyin maydonchalari, yozgi ayvonchalar tadbir ishtirokchilariga va ovul aholisiga juda manzur boʻldi.

Bayram kuni zamonaviy koʻrinishdagi ushbu maskan ishga tushirilganidan, farzandlarining barcha shart-sharoitlarga ega boʻlgan maskanda taʼlim-tarbiya olishiga imkoniyat yaratilganidan ovul aholisi nihoyatda xursand boʻldi.

O.Xudoyberganova