Amudaryo televideniyesi tahririyatining tashabbusi bilan voyaga yetmaganlarning huquqbuzarliklar sodir etishlariga yoʻl qoʻymaslik maqsadida nazorat tadbiri oʻtkazildi

Yurtimizda oʻsib kelayotgan yosh avlodni maʼnaviy- axloqiy, jismoniy sogʻlom qilib tarbiyalash, ularni barcha sohalarda izchillik bilan tatbiq etilayotgan islohotlarning faol ishtirokchisiga aylantirishga qaratilgan chora-tadbirlar amalga oshirilmoqda. Ular ongiga Vatanga sodiqlik va kelajagi uchun daxldorlik hissini singdirish, qalbida yot gʻoya va qarashlarning salbiy taʼsiriga nisbatan mafkuraviy immunitetni shakllantirishga hissa qoʻshish, ekstremizm va terrorizmning buzgʻunchi gʻoyalariga nisbatan murosasizlikni shakllantirish juda muhim.

Yosh avlod taʼlim-tarbiyasi maktabgacha va umumiy oʻrta taʼlim muassasalarininggina emas, keng jamoatchilik, davlat va nodavlat tashkilotlarining ham vazifasidir.

Amudaryo televideniyesi buningdek ulugʻvor maqsad ijrosiga hissa qoʻshish maqsadida Oliy Majlis huzuridagi Nodavlat notijorat tashkilotlarini va fuqarolik jamiyatining boshqa institutlarini qoʻllab-quvvatlash jamoat fondi taʼsis etgan “Yoshlarning maʼnaviy-ruhiy va intellektual salohiyatini oshirish” yoʻnalishidagi grant tanlovida “Yuksak maʼnaviyatli va axloqli yoshlar – kelajak poydevori” nomli loyihasi bilan qatnashib, gʻolib boʻlgan edi va ayni kunlarda loyihani muvaffaqiyatli amalga oshirib kelmoqda.

Loyiha faoliyati boshlanganidan beri tumanimizning turli hududlaridagi taʼlim muassasalarida va fuqarolar yigʻinlarida yoshlar tarbiyasiga oid turli koʻrsatuvlar, tanlovlar oʻtkazib kelinayapti. Yoshlarning kitobxonlikka, sanʼatga qiziqishlarini oshirish uchun kitoblar koʻrgazmalari, tumanimizdagi Bolalar musiqa va sanʼat maktablari oʻquvchilarining kontsertlari tashkil etildi va bu tadbirlarga koʻplab oʻquvchilar qamrab olindi.

2022-2023 oʻquv yili tugallanishi arafasida grant loyihasi doirasida tumandagi Qipchoq shaharchasi hududida oʻquvchilarning taʼlim-tarbiyasi, ularning sababsiz dars qoldirishlarining oldini olish, maktab, mahalla va ota-onalar hamkorligi masalasi yuzasidan oʻrganish olib borildi. Hududdagi 11-sonli maktabda 934 nafar oʻquvchilarga 87 nafar malakali oʻqituvchilar taʼlim-tarbiya berishayapti.

Oʻquvchilarning bilim asoslarini chuqur egallashlari uchun fan toʻgaraklari, shuningdek, boʻsh vaqtlarini samarali oʻtkazishlari uchun ijodiy va sport toʻgaraklari muntazam ishlab turibdi. Taʼlim- tarbiya ishlari esa mahalla, taʼlim muassasi va ota-onalarning mustahkam hamkorligida amalga oshirilmoqda. Reja boʻyicha oʻtkaziladigan yigʻilishlarda ular faol ishtirok etishadi.

Buningdek saʼy-harakatlar oʻquvchilarning intiluvchan, odobli va ilmli boʻlib voyaga yetishiga xizmat qilayotir. Har yili oʻtkazib kelinayotgan asosiy fanlar olimpiadalarida, koʻrik –tanlovlarda oʻquvchilar erishayotgan yutuqlar buni yaqqol koʻrsatib turibdi.

2021-2022 oʻquv yilida maktabni 29 nafar yigit-qizlar bitirib chiqishgan boʻlsa, ularning 10 nafari turli oliygohlar talabalari boʻlishdi, oʻrta taʼlim muassasalarida kasb-hunar oʻrganayotganlari, korxona, tashkilotlarda mehnat faoliyatini boshlaganlari, oliygohlarga kirishga intilayotganlari ham bor. Joriy yilda maktabdan uchirma boʻlayotgan 33 nafar bitiruvchilarning orzulari esa yanada yuksak.

Shu kuni Qipchoq shaharchasi va Mangʻit shahri hududidagi koʻngilochar maskanlar tuman Ichki ishlar boʻlimining voyaga yetmaganlar masalasi boʻyicha katta inspektori, psixolog, podpolkovnik Ulugʻbek Yoʻldoshev va bir guruh psixologlar hamkorligida voyaga yetmaganlarning tunggi vaqtlarda ota-onalari yoki ularning oʻrnini bosuvchi shaxslar kuzatuvisiz yurishlariga, huquqbuzarliklar sodir etishlariga yoʻl qoʻymaslik maqsadida nazorat tadbiri oʻtkazildi.

Tadbir davomida Mangʻit shahrida joylashgan umumiy ovqatlanish shoxobchalari, kafelar va Mangʻit istirohat bogʻi atrofida voyaga yetmaganlarning bemaqsad yurishlarining oldini olish maqsadida suhbatlar olib borildi.

Tuman Ichki ishlar boʻlimining voyaga yetmaganlar masalasi boʻyicha katta inspektori Ulugʻbek Yoʻldoshev yoshlarning bandligini taʼminlash, ishsiz yoshlarga yaratilayotgan sharoitlar, shuningdek, oʻsmirlarning boʻsh vaqtlarini koʻngilli oʻtkazishlari, salohiyatlarini yuksaltirishlari uchun tashkil etilgan turli toʻgaraklar, sport musobaqalari xususida keng tushunchalar berdi, ularni qiziqtirgan savollarga batafsil javoblar qaytardi.

Bolaning begonasi boʻlmaydi. Ularning kamoli uchun kurash esa barchaga daxldor vazifadir.

Oygul RAJABOVA.