11-SONLI MAKTAB JAMOASI HUDUD AHOLISI BILAN BIRGALIKDA NAVROʻZ BAYRAMINI NIShONLADI

Yurtimizga fayzu-tarovat baxsh etib, Navroʻzi olam tashrif buyurmoqda. Bu qutlugʻ va qadim bayramni butun elimiz katta xursandchilik bilan qarshi olmoqda. Ushbu bayram munosabati bilan hududlarda, korxona-tashkilotlar va taʼlim muassasalarida ham bayram tadbirlari boshlab yuborildi.

15-mart kuni Qipchoq shaharchasidagi 11-sonli umumtaʼlim maktabida ham “Xush kelding, oʻlkamga Navroʻz” deb nomlangan katta tadbir oʻtkazildi. Maktab direktorining maʼnaviy-maʼrifiy ishlar boʻyicha oʻrinbosari Qunduzoy Xolmurodova boshchiligida tashkillashtirilgan ushbu bayram tadbiri munosabati bilan maktab hovlisi va foyesi bayramona bezatildi. Oʻquvchilar oʻzlari yasagan, bahor belgisi boʻlgan rang-barang gullar va sharlar hovliga yanada fayz baxsh etdi.

Shu kuni erta tongdan maktab hovlisiga katta doshqozon oʻrnatilib, milliy taomlarimizdan biri boʻlgan goʻja pishirishga harakat boshlandi. Maktab psixologi Dilnoza Shomurodova hamda ona tili va adabiyot fani oʻqituvchisi Erkinoy Yakubova bosh-qosh boʻlgan bu taom mehmonlar kelgunicha tayyor boʻldi.

Bayramga oʻqituvchi va oʻquvchilar, ularning ota-onalari, faxriy ustozlar, shaharcha aholisi tashrif buyurdi. Tadbir mehmonlarini hududdagi 21-sonli Bolalar musiqa va sanʼat maktabining orkestr jamoasi bahoriy kuylar bilan qarshi olishdi. Mehmonlar bahoriy va milliy taomlar bilan bezatilgan dasturxonga taklif etildi.

Bayram tadbirini maktabning ijodiy-madaniy masalalar boʻyicha targʻibotchisi Munira Kamolova olib bordi. Soʻzga chiqqanlar barchani Navroʻz ayyomi bilan muborakbod etishdi. Shuningdek, xalqimiz orasida asrlar davomida katta shodu-xurramlik bilan nishonlanib kelayotgan ayyomning shukuhi oʻzgacha ekanligini taʼkidlashdi. Maktabda amalga oshirilayotgan ezgu ishlar, erishilayotgan yutuqlarni ham tilga olib oʻtishdi.

Tadbirda maktabning boshlangʻich va yuqori sinf oʻquvchilari, hududdagi 2-sonli maktabgacha taʼlim tashkiloti tarbiyalanuvchilari, 21-sonli Bolalar sanʼat va musiqa maktabi havaskor-yoshlari tomonidan katta musiqiy dastur namoyish etildi. Bayram ishtirokchilari oʻzlarining bahor va Navroʻz haqidagi sheʼrlari, diltortar kuy-navolari hamda samimiy tabriklari bilan mehmonlarni xushnud etdilar. Kuy-qoʻshiqlar raqslarga ulanib ketdi. Maktabning oʻquvchi-qizlari oʻzlari kiyib kelgan milliy atlas va adras liboslarida, yigitlar esa oʻzlariga yarashgan doʻppilar, oq yaktagu-qiyiqchalar, beqasam choponlarda raqslar ijro etib, bayramga alohida shukuh, koʻtarinki kayfiyat bagʻishlashdi. Dasturdan oʻrin olgan oʻquvchilar ishtirokidagi laparlar, milliy oʻyinlar hamda umrboqiy urf-odatlarimiz aks etgan sahna koʻrinishlari barchaga manzur boʻldi.

Tadbir davomida maktabning oʻquvchi va oʻqituvchilari tomonidan bezatilgan bayramona dasturxondagi milliy taomlar tatib koʻrildi. Mehmonlarga shu yerning oʻzida hamjihatlikda tayyorlangan milliy taom goʻja ham tortildi. Yoshu-qari xursandchilikda, tinchlik-omonlikda qarshi olinayotgan ushbu kunlarga shukronalar aytib, elu-yurtga osoyishtalik, qut-baraka tilashdi. Navroʻzning insonlarni hamjihatlik, birdamlikka chorlovchi ezgu sifatlari haqida soʻz yuritishdi.

Navroʻz ana shunday ulugʻvor va koʻtarinki ruhda oʻtadigan sevimli bayram. Uning tashrifi kattayu kichikka birdek xursandchilik ulashadi. Bayramga tashrif buyurgan mehmonlar, oʻqituvchilar va oʻquvchilar yuz-koʻzida bahoriy kayfiyat ufurib, koʻngillar bilan birga chehralar ham yoshargandek boʻldi.

Ozoda Xudoyberganova.