TALABChAN RAHBAR,MEHRIBON ONA

Qipchoq ovulidagi 20-sonli maktabgacha taʼlim tashkiloti oʻz faoliyatini boshlaganiga endi 2-yil boʻldi. Ayni paytda bu dargohda 305 nafar kelajagimiz vorislari taʼlim va tarbiya olishmoqda.

Ushbu taʼlim muassasasida bolajonlarni jismoniy, aqliy, ijtimoiy, hissiy jihatdan kamol toptirish va ularning sogʻligʻini muhofaza qilish, erkin fikrlash, ijodiy qobiliyatlarini rivojlantirish, ahloqiy va maʼnaviy jihatdan barkamol qilib tarbiyalash borasida koʻplab samarali ishlar amalga oshirilmoqda.

 Muassasa direktori Sanobar Xoʻjayeva rahbarlik faoliyatini boshlagan ilk kundanoq, 40 nafar ishchi xodim bilan xuddi bir oiladek birdam va ahil-inoqlikda faoliyat yuritib kelmoqda. Ushbu xodimlarning 18 nafarini malakali pedagog xodimlar tashkil etib, ular tomonidan olib borilayotgan mashgʻulotlarning sifat va samarasi alohida nazorat qilib boriladi.

Ishda nihoyatda talabchan, har bir xodimdan katta masʼuliyatni talab etuvchi muassasa mudirasi S.Xoʻjayeva oila, farzandlar tarbiyasida ham xuddi shunday.

Turmush oʻrtogʻi Suhrob Bobojonov bilan 2 nafar farzandni tarbiyalab, oq yuvib, oq tarab voyaga yetkazayotgan ona oʻz rahbarligidagi mussasasadagi bolajonlarni ham xuddi oʻz farzandlaridek koʻradi. Ularning taʼlim-tarbiya olishi, ovqatlanishi, xulq-atvori doimo mudiraning nazoratida boʻladi.

– Yoshligimdan bolalar bilan ishlashni xush koʻrardim. Ular bilan ishlash menga oʻzgacha zavq bagʻishlaydi. Ertalab ishga kelganimda bolalarning begʻubor kulgularini, shoʻx-shodon qiyqiriqlarini eshitib, barcha tashvishlarni unutaman. Kelajagimiz egalarini tarbiya qilishdek ezgu ishga men ham oʻz xissamni qoʻshayotganimdan mamnun boʻlaman, – deydi, S.Xoʻjayeva. 

Fotima Eshimbetova.