Muddatli harbiy xizmatga chaqiriluvchilar va ularning ota-onalari ishtirokida uchrashuv oʻtkazildi

Oʻzbekiston Respublikasi Qurolli Kuchlari safini har tomonlama yetuk, sogʻlom, jismonan baquvvat, intellektual salohiyatli chaqiriluvchilar bilan butlash, chaqiriluvchilar ongida milliy gʻurur, ona yurtga sadoqat va vatanparvarlik toʻygʻusini kuchaytirish maqsadida Amudaryo tumani Mudofaa ishlari boʻlimi tomonidan samarali ishlar amalga oshirilmoqda.

13-fevral kuni tuman Madaniyat boʻlimi binosida Amudaryo tumani Mudofaa ishlari boʻlimi shaxsiy tarkibi, tuman tibbiy komissiyasi shifokorlari, hamda hamshiralari, ovul va mahalla fuqarolar yigʻinlarining harbiy hisob mutaxassislari ishtirokida boʻlib oʻtgan yigʻilishda 2023-yilgi chaqiruv mavsumida muddatli harbiy xizmatga saralab olingan chaqiriluvchilar va ularning ota-onalari ishtirok etishdi.

Yigʻilishda “Muddatli harbiy hizmatning belgilangan muddatini oʻtab boʻlgan fuqarolarni xizmatdan boʻshatish hamda Oʻzbekiston Respublikasi Qurolli Kuchlariga navbatdagi chaqiruvni oʻtkazish toʻgʻrisida”gi, “Fuqarolarni muddatli harbiy va muqobil xizmatlarga chaqirish, safarbarlik chaqiruvi rezervidagi xizmatga olish boʻyicha komissiyaslar foliyatini tashkil etish tartibi toʻgʻrisidagi” qarorlarning mazmun-mohiyati keng tarzda tushuntirildi.

Shuningdek, yigʻilish davomida Amudaryo tumani mudofaa ishlari boʻlimi boshligʻi, podpolkovnik Sherzod Murodov chaqiriluvchilarning jismoniy tayyorgarligi, fikrlash qobiliyati, taffakuri, fidoiyligi, qiziqishlari va boshqa xususiyatlarini inobatga olgan holda, ular butlash komissiyasi tomonidan qoʻshin turlarining qay biriga tayinlanishi haqida batafsil maʼlumot berib oʻtdi.

Shuningdek, 2023-yilgi chaqiruvni sifatli oʻtkazish yuzasidan chaqiruv yoshidagi fuqarorlarni muddatli harbiy xizmatga chaqirilishini tashkil etish, chaqiriluvchilarning sifatli va xolisona tibbiy koʻrikdan oʻtkazilishi, ularning maʼnaviy-ruhiy fazilatlarini va intelektual rivojlanish saviyasini qonunchilikda belgilangan harbiy-kasbiy mezonlarga muvofiq ravishda oʻrganib chiqilishini va hududiy komissiya aʼzolarining samarali ishlashini tashkil etish maqsadida komissiya aʼzolariga zarur shart-sharoitlar yaratib berilishini taʼkidlab oʻtdi.

Yigʻilishda tuman Ichki ishlar boʻlimi boshligʻi oʻrinbosari, hududiy komissiya aʼzosi Ilhom Abutov chaqiriluvchilar chaqiruv qogʻozini olib, belgilangan vaqt ichida tuman mudofaa ishlari boʻlimiga sababsiz kelmagan taqdirda birinchi maʼmuriy bayonnoma rasmiylashtirilishini va qayta sodir etsa, jinoiy javobgarlikka tortilishi boʻyicha tushintirishlar berib, Vatan oldida xizmat qilish har bir yigitning muqaddas burchi ekanligini aytib oʻtdi.

Undan tashqari, yigʻilishda chaqiriluvchilarning qoʻshin turlariga tanlab olinishida oʻtkaziladigan suhbatlarning shaffoflik va oshkoraligini taʼminlash yuzasidan Amudaryo tumani mudofaa ishlari boʻlimi huzuridagi butlash komissiyasi raisi, mayor Rustam Tursunov maʼlumot berdi.

Jumladan, chaqiriluvchilarni muddatli harbiy xizmatga joʻnatish va ulurning tibbiy koʻrik natijalariga koʻra komandalarga tayinlanishi, chaqiriluvchining bilim darajasini baholash, harbiy xizmat muddatini oʻtab boʻlgan harbiy xizmachilarga beriladigan imtiyozlar, yaʼni oliy taʼlim muassasalariga oʻqishga kirish, shartnoma asosida harbiy xizmatchi boʻlib ishlash tartibi toʻgʻrisida tushuntirib oʻtildi.

Chaqiriluvchilarni hududiy tibbiy komissiyadan oʻtkazish tartibi toʻgʻrisida esa hududiy tibbiy komissiya katta shifokori Rustam Jumaniyozov maʼlumot berdi. Taʼkidlanishicha, bugungi kunda chaqiriluvchilarning aksariyatida yassi oyoqlik muammosi uchramoqda. Shifokor tomonidan yassi oyoq muddatli harbiy xizmat davrida qanday oqibatlarga olib kelishi batafsil tushuntirib oʻtildi.

Uchrashuvda chaqiriluvchilar va ularning ota-onalari oʻzlarini qiziqtirgan savollar bilan murojaat qilib, tegishlicha javoblar olishdi.

Tuman hokimligining Axborot xizmati.