Farovon mahallasi hududida yangi uylar qurilishi boshlandi

Mamlakatimizda olib borilayotgan xalqchil va oqilona siyosat yurtimizning barcha hududlarida yashovchi aholi hayotida oʻzining ijobiy natijasini koʻrsatmoqda. Jumladan, Amudaryo tumanining markazi, ovul va mahallalarida ham katta bunyodkorlik ishlari amalga oshirilib, mahallalar koʻrkam qiyofa kasb etmoqda. Tumanning meʼmoriy qiyofasini yaxshilash, yangi-yangi binolar barpo qilish va hududlarni obodonlashtirish ishlari zamirida avvalo, odamlar uchun munosib turmush sharoiti yaratish maqsadi mujassamdir.

Davlatimiz rahbari tashabbusi bilan 2017-yildan boshlab mamlakatimiz boʻylab turar joyga muhtoj oilalar uchun arzon va har tomonlama qulay uy-joylar qurilishi boshlangan edi. Amudaryo tumanida ham oʻtgan yillar davomida keng koʻlamdagi bunyodkorlik ishlari amalga oshirildi. Birgina oʻtgan 2022-yil davomida Gulzor mahallasi hududida 15,6 mlrd.soʻm mablagʻ evaziga 3 ta 5 qavatli, jami 90 ta xonadonga moʻljallangan uy-joylar qurildi. Ushbu imoratlarning qurib bitkazilgani va foydalanishga topshirilgani uy-joyga muhtoj yurtdoshlarimiz uchun katta sovgʻa boʻldi.

Bunyodkorlik ishlarini izchil davom ettirish hamda aholini arzon uy-joylar bilan taʼminlash maqsadida joriy 2023-yilda Mangʻit shahrining Farovon mahallasi hududida buyurtmachi tashkilotlar tomonidan 6 ta, tadbirkorlar tomonidan 4 ta, har birining qiymati 5,5 mlrd. soʻmlik boʻlgan jami 10 ta koʻp qavatli turar joylar qurish rejalashtirilgan.

6-yanvar kuni tender savdolarida gʻolib boʻlgan “Amudaryo maxsus qurilish” masʼuliyati cheklangan jamiyati tomonidan qurilishi rejalashtirilgan 4 ta 5 qavatli jami 140 xonadondan iborat uy-joylarning tamal toshini qoʻyish marosimi boʻlib oʻtdi.

Tadbirda Qoraqalpogʻiston Respublikasi qurilish vaziri Azimjon Qurbanbayev, Qoraqalpogʻiston Respublikasi Vazirlar Kengashining Qurilish masalalari boʻyicha kotibiyat boshligʻi Jaxongir Yakubov, tuman hokimi oʻrinbosari Nodirbek Kamolov, mahalla fuqarolar yigʻinlari raislari, imom-xatiblar, nuroniylar hamda keng jamoatchilik vakillari ishtirok etishdi.

Qoraqalpogʻiston Respublikasi Qurilish vaziri Azimjon Qurbanbayev keyingi yillarda qurilayotgan arzonlashtirilgan uy-joylarning asosiy qismi ijtimoiy himoyaga, uy-joyga muhtoj, koʻp bolali oilalar farzandlari uchun ajratilayotganini taʼkidlab, bu mamlakatimizda yuritilayotgan xalqchil siyosatning yorqin namunasi ekanligini aytib oʻtdi.

Mahalla fuqarolar yigʻini raisi Madamin Kazakov Farovon mahallasida qurilayotgan yangi uylarning avtomobil yoʻllari, suv, gaz va elektr tarmoqlari, bolalar bogʻchalari, savdo shoxobchalari, sport maydonchalari bilan birgalikda qurib bitkazilishi aholining qulay shart-sharoitlarda yashashi uchun kompleks tizim hosil qilishini taʼkidladi.

Mahalla nuroniylari va imom-xatibi tamal toshi qoʻyilayotgan koʻp qavatli uylarda odamlar tinch-farovon yashashini, xonadonlarda faqat yaxshi kunlar, toʻylar boʻlishini tilab duoga qoʻl ochdi.

Shundan soʻng, qurilish hududiga ramziy qoziq qoqish marosimi boʻlib oʻtdi va yangi uylarning tamal toshi qoʻyildi.

Pudratchi tashkilot vakillari Farovon mahallasida bunyod etilajak mazkur uy-joylarni sifatli tarzda, qisqa muddatlarda qurib bitkazish uchun bor kuch va imkoniyatllarini safarbar qilishlarini taʼkidlab, qurilish ishlarini boshlab yubordilar.

Tuman hokimligining Axborot xizmati