TOSh YoP OVULIDA UCh AVLOD UChRAShUVI TADBIRI TAShKIL ETILDI

Joylarda keksa va oʻrta avlod vakillari hamda yoshlar ishtirokidagi “Uch avlod uchrashuvi” tadbirlari davom etmoqda. Ushbu uchrashuvlarda nuroniylarning ibratli hayot yoʻli, turli sohalarda faol boʻlgan oʻrta yoshlilarning fidoyiliklari hamda shijoatli yoshlarning yutuqlari tilga olinib, barchaga oʻrnak sifatida koʻrsatilmoqda.

17-dekabr kuni Amudaryo tumanining Tosh yop ovulida ham hududdagi nuroniylar, oʻrta avlod vakillari va yoshlar ishtirokida shunday tadbir oʻtkazildi. “Manas” kafesida oʻtkazilgan ushbu tadbirda tuman Mahalla va nuroniylarni qoʻllab-quvvatlash boʻlimi boshligʻi Gʻulomjon Duysenboyev, fuqarolar yigʻini raisi Gulshod Sobirova, ovul hududidagi “Bekman Allaberganov” fermer xoʻjaligi rahbari, xalq deputatlari Amudaryo tuman Kengashi deputati Ilhom Polvonov, keng jamoatchilik vakillari qatnashishdi.

Tadbir davomida bugungi kunda yurtimizda amalga oshirilayotgan islohotlar, bunyodkorliklar, oʻzgarishlar eʼtirof etildi. Shu oʻrinda keksalarning tajribasi yoshlar uchun hayot maktabi ekanligi, ularning qimmatli pand-nasihatlari, hayot saboqlari yoshlarning shijoati bilan birlashsa, jamiyatni rivojlantiruvchi kuchga aylanishi, mamlakatimizda amalga oshirilayotgan keng koʻlamli islohotlarning mazmun-mohiyatini yosh avlodga yetkazishda keksa avlod vakillarining alohida oʻrni borligi taʼkidlab oʻtildi.

Ochiq dasturxon atrofida oʻtkazilgan tadbirda ishtirok etgan ovul nuroniylari Kengash ota Kaliyev, Quronboy ota Otajonov, Maqsad ota Safarboyev hamda mahalla imomi Gulmirza ota Davletov, fuqarolar yigʻinining keksalar masalalari boʻyicha maslahatchisi Karimboy aka Rajabovlar ham mamlakatimizda barcha sohalarda islohotlar jadal suratlarda davom etayotgani, bu yangilanish va oʻzgarishlar avvalo fuqarolarning manfaatlari, ularning hayotdan rozi boʻlib yashashlari uchun xizmat qilayotgani haqida soʻzlashdi.

Uzoq yillar qishloq xoʻjaligida mehnat qilgan onaxonlardan Xushroʻy Rahimova, “Buvijonlar maktabi” aʼzosi Ortiqgul Yeshchanova, ovul faoli Gulora Qurbonboyevalar ham oʻz hayotiy tajribalari, bosib oʻtgan ibratli umr yoʻllarini qiziqarli va jonli tarzda maroq bilan hikoya qilishdi. Shuningdek, davlatimizda amalga oshirilayotgan islohotlar haqida gapirib, erishilayotgan barcha yutuqlar koʻplab fidoiy insonlarning mashaqqatli mehnati samarasi ekanligini taʼkidlashdi.

Uchrashuvda yoshlar ham soʻzga chiqib, istiqlol katta imkoniyatlar, imtiyozlar eshigini keng ochib berayotgani, ushbu imkoniyatlardan toʻgʻri va oqilona foydalanib, Vatan ravnaqi, yurt farovonligi uchun hissa qoʻshish kerakligini aytib oʻtishdi. Bu yoʻlda ulugʻ yoshli avlodning xayrli va namunali hayot yoʻlini dasturilamal qilib koʻrsatish, ularning tajribalaridan oʻrnak olishdek ezgu maqsadlarni oʻzida mujassam qilgan bu kabi tadbirlar oʻzlari uchun chinakam mahorat maktabi vazifasini oʻtashini eʼtirof etishdi.

Toʻkin dasturxon atrofida samimiy tarzda oʻtgan tadbirda mahallada keksalarning oʻrnini yanada oshirish, yoshlarga har jihatdan namuna boʻlish, shuningdek, sogʻlom turmush tarziga amal qilish kabilar masalalarda ham fikrlar bildirildi.

Tadbirga tashrif buyurgan mehmonlarga milliy taomimiz palov ham tortildi va nuroniylarga esdalik sovgʻalari topshirildi.

O.Xudoyberganova.