Amudaryo tumanida 3-dekabr− Xalqaro nogironlar kuniga bagʻishlangan tadbir oʻtkazildi

1992-yil 14-oktyabr kuni Birlashgan Millatlar Tashkiloti Bosh Assambleyasining 37-yalpi majlisida qabul qilingan rezolyutsiyaga muvofiq, 3-dekabr – Xalqaro nogironlar kuni sifatida belgilangan. Shundan buyon har yili mazkur sana doirasida nogironlar duch kelayotgan muammolarni chuqurroq anglash, shu kabi masalalarni hal etish, ularning qadr-qimmati, huquqini himoya qilish, turmush sharoitini yaxshilashga qaratilgan tadbirlar uyushtiriladi, imkoniyati cheklanganlarga moddiy yordamlar berilib, maʼnaviy qoʻllab-quvvatlanadi.

Mamlakatimizda ham nogironligi boʻlgan shaxslarga jamiyat va davlat tomonidan koʻmak va yordam koʻrsatish, ularni ijtimoiy-siyosiy hayotga faol jalb etishga qaratilgan keng koʻlamli chora-tadbirlar amalga oshirilmoqda.

Hozirgi vaqtda ushbu toifaga mansub fuqarolarni qoʻllab-quvvatlashga ixtisoslashgan bir qator tuzilmalar, xususan, Oʻzbekiston nogironlar jamiyati, Nogironlar assotsiatsiyasi, Koʻzi ojizlar jamiyati, Karlar jamiyati va boshqa jamoat hamda nodavlat notijorat tashkilotlari samarali faoliyat koʻrsatmoqda.

Eng muhimi, taqdir taqozosi bilan nogiron boʻlib qolgan bironta ham yurtdoshimiz xalqimizning, davlat idoralarining mehru eʼtiboridan chetda qolmasdan, oʻzining mehnati va qobiliyati bilan nafaqat hayotda oʻz oʻrnini egallab kelmoqda, balki azmu matonati, sabr-bardoshi va shukronalik fazilatlari bilan koʻpchilikka ibrat boʻlmoqda.

3-dekabr kuni Amudaryo tumanidagi “Sher” restoranida nogironligi boʻlgan yurtdoshlarimiz uchun tadbir tashkil etildi.

Tadbirda tuman hokimi Sultonboy Yoʻldashev, sektorlar rahbarlari, hokim oʻrinbosarlari hamda yuz nafarga yaqin imkoniyati cheklangan yurtdoshlarimiz ishtirok etishdi.

Tuman hokimi Sultonboy Yoʻldashev jamiyatimizning ajralmas qismi boʻlgan nogironligi bor fuqarolarning huquq va manfaatlarini taʼminlash, mehnat va turmush sharoitlarini yaxshilash borasida mamlakatimizda bir qator qonunlar hamda 25 dan ortiq boshqa meʼyoriy-huquqiy hujjatlar qabul qilinib, mustahkam qonuniy baza yaratilganligini, bu esa mazkur toifa vakillariga tibbiy-ijtimoiy xizmatlar koʻrsatish, ularning bilim olishi, mehnat qilishi, malakali tibbiy xizmatlardan foydalanishi, oʻz isteʼdod va salohiyatini roʻyobga chiqarishi, muxtasar aytganda, oʻzlarini jamiyatimizning toʻlaqonli aʼzosi deb his etishlari uchun yanada qulay sharoitlar yaratish imkonini berayotganligini taʼkidladi.

Tadbir davomida soʻzga chiqqanlar ishtirokchilarga ularning sabr-u matonati, shijoati, shukronaligi bilan barchaga oʻrnak boʻlayotganligi, hamda intilish va isteʼdodlarini xalqimiz yukasak qadrlashini aytib, mamlakatimizning ijtimoiy-iqtisodiy hayotidagi faol ishtiroki uchun chuqur minnatdorlik bildirdi.

Shundan soʻng, imkoniyati cheklangan yurtdoshlarimizga qimmatbaho sovgʻalar tanʼtanali tarzda topshirildi. Undan tashqari, nogironligi boʻlgan 15 nafar yurtdoshlarimiz reabilitatsiya-texnik vositalari bilan taʼminlandi.

Tadbir ishtirokchilari toʻkin dasturxon atrofida jamuljam boʻlishib, tuman Madaniyat boʻlimi tomonidan tayyorlangan kontsert dasturini maroq bilan tomosha qildilar. Tadbir davomida tumanimizning ustoz sanʼatkorlari, umidli estrada yulduzlari tomonidan Vatan, doʻstlik, sevgi-muhabbat va insoniy fazilatlarni ulugʻlovchi goʻzal kuy-qoʻshiqlar yangradi.

Tadbir qatnashchilari oʻzlariga koʻrsatilayotgan bu kabi eʼtibor uchun tuman hokimligiga va tashkilotchilarga minnatdorlik bildirishdi.

Tuman hokimligining Axborot xizmati