40-SONLI MAKTAB ATROFINING YaShIL HUDUDI YaNADA KENGAYDI

Davlatimiz rahbari “Yashil makon” umummilliy loyihasi doirasida respublika boʻyicha 2022-yil yakunigacha 75 million dona mevali va manzarali daraxtlar, koʻp yillik gul koʻchatlarini ekish vazifasini qoʻygan edi. Bunda har bir hududning iqlim sharoitiga mos, tuproq tarkibi, sugʻorish sharoiti holatidan kelib chiqib koʻchatlar ekishni tashkil etish topshirilgan edi.

Respublikamizda bu borada 2021-yilgi tajribalardan kelib chiqib, 20-oktyabrdan 1-dekabrgacha koʻchat ekish boʻyicha “dolzarb 40 kunlik” eʼlon qilindi va aholi xonadonlari atroflari, mahalla, maktablar, idora, tashkilotlar atroflariga koʻchat ekish ishlari uyushqoqlik bilan olib borilmoqda. Natijada tumanimizda ham yashil hududlar kengayib, chor-atrofda turli koʻp yillik gullar, daraxtlar koʻpaymoqda.

19-noyabr kuni loyiha doirasida tumanimizdagi 40-sonli maktabda “Maktabimiz atrofini yashil maskanga aylantiramiz” shiori ostida koʻchat ekish tadbirlari boʻlib oʻtdi.

Tadbirda tuman prokuraturasi, Xalq taʼlimi boʻlimi, Ekologiya boʻlimi xodimlari, maktab maʼmuriyati, oʻqituvchilar ishtirok etdi. Maktab hududidagi qarovsiz yerlar tuman Obodonlashtirish boshqarmasi koʻmagi bilan tozalanib, bogʻ hududiga qoʻshildi shu kuni bogʻ hududiga 200 tupdan ortiq mevali va manzarali daraxt koʻchatlari ekildi.

Shuni eʼtirof etish kerakki, mazkur maktabga hududidagi manzarali, mevali daraxtlar, yoʻlaklar atroflariga ekilgan anvoyi gullar oʻzgacha fayz bagʻishlab turadi. Iqlim sharoitimizga mos ekilib, agrotexnik talablar asosida parvarish qilinayotgan ushbu daraxtlar, gullar durkun oʻsib, rivojlanmoqda.

Endilikda maktab bogʻiga tutashgan qarovsiz yerlar ham oʻzlashtirilib, 200 tupdan ziyod daraxt koʻchatlari oʻtqazilgani kelgusida chor-atrof koʻrkiga koʻrk qoʻshadi.

Xalqimizning qadimiy anʼanalari va urf-odatlariga koʻra, koʻchat ekish, atrofimizdagi olam musaffoligiga hissa qoʻshish – har bir insonning burchi. Qadriyat darajasiga koʻtarilgan bu odat mazkur tadbirda ham yaqqol namoyon boʻldi. Koʻchat ekish ishlarida tuman prokurori, 2-sektor rahbari Aziz Roʻzmetov, prokuratura xodimlari, ekologiya boʻlimi xodimlari ishtirok etishdi.

Butun mamlakatimiz boʻylab hamjihatlikda “Yashil makon” umummilliy loyihasi doirasida oʻtkazilayotgan daraxt ekish boʻyicha “dolzarb 40 kunlik”da tumanimiz hududlariga ekilayotgan mevali, manzarali daraxtlar, gullar koʻchatlari vaqt oʻtib, chor-atrofga koʻrk bagʻishlash birga, bizni oʻrab turgan atmosfera havosini ham tozalaydi. Ular karbonat angidridni biz nafas oladigan kislorodga aylantiradi, havo moʻʼtadilligini taʼminlaydi, jazirama issiqdan himoyalaydi va shirin-shirin mevalar hadya etadi.

Shu maʼnoda olib qaraydigan boʻlsak, 40-sonli maktab atrofining yashil makon hududi kengaytirilgani, 200 tupdan ortiq daraxtlar koʻchatlari oʻtqazilgani juda ahamiyatli boʻldi.

Sevara Ismoilova.