DOʻRMAN OVULIDA “YaShIL MAKON” UMUMMILLIY LOYIHASI DOIRASIDA AMALIY SEMINAR OʻTKAZILDI

Shu kunlarda mamlakatimiz boʻylab Prezidentimiz tashabbusiga tashkil etilgan “Yashil makon” umummilliy loyihasi doirasida hududlarni koʻkalamzorlashtirish ishlari davom etmoqda. Ushbu harakat doirasida Amudaryo tumanida ham hudud iqlim sharoitiga mos boʻlgan koʻchatlar ekish ishlari qizgʻin tashkil etilib, bogʻ-rogʻlar yaratilmoqda.

Joriy yil 4-noyabr kuni Amudaryo tumanidagi Doʻrman ovulidagi 84-sonli maktab binosida Oʻzbekston Respublikasi Prezidentining 2022-yil 25-oktyabrdagi “Jamoatchilik fikri asosida shakllantiriladigan loyihalarni moliyalashtirish koʻlamini kengaytirish chora-tadbirlari toʻgʻrisida”gi Qarorining mazmun-mohiyatini tushuntirish hamda “Yashil makon” umummilliy loyihasi doirasida koʻchat ekish ishlarini tashkil etish boʻyicha amaliy seminar oʻtkazildi.

Seminarda tuman Mahalla va nuroniylarni qoʻllab-quvvatlash boʻlimi boshligʻi Gʻulomjon Duysenboyev, Oila va xotin-qizlarni qoʻllab-quvvatlash boʻlimi boshligʻi Goʻzal Saburova, Obodonlashtirish boshqarmasi boshligʻi Jasur Norimov, Yoshlar ishlari agentligi tuman boʻlimi boshligʻi Sardor Ismailov hamda boshqa masʼullar, fuqarolar yigʻini xodimlari, ovul faollari ishtirok etishdi.

Seminarda soʻzga chiqqan tuman Mahalla va nuroniylarni qoʻllab-quvvatlash boʻlimi boshligʻi Gʻulomjon Duysenboyev mahalla raislariga loyiha va uning afzalliklari toʻgʻrisida fuqarolarga batafsil tushunchalar berishda hokim yordamchilari, yoshlar yetakchilari va xotin-qizlar bilan hamkorlikdagi ishlarni yanada jadallashtirish lozimligini taʼkidladi. Tuman Moliya boʻlimi masʼuli ham mahalla raislarining loyihalarni dasturga joylash, ovoz berish jarayonlarida eʼtibor qaratishi lozim boʻlgan jihatlar toʻgʻrisidagi koʻplab savollariga aniq va atroflicha javob berdi.

Shuningdek, seminarda “Yashil makon” umummilliy loyihasini tatbiq etish maqsadida tumanda samarali ishlar olib borilayotgani, joriy yilning bahor mavsumidan koʻkalamzorlashtirish, mevali daraxt va buta koʻchatlarini ekish ishlarini tizimli, uyushqoqlik bilan tashkil qilingani, kuz mavsumida ham ushbu ezgu ishlarni davom ettirish boʻyicha reja-tadbirlar belgilab olingani, hozirda ham rejaga koʻra qator amaliy ishlar olib borilayotganligi alohida taʼkidlab oʻtildi.

Shundan soʻng, aholi xonadonlariga va ovul hududiga iqlimga mos daraxtlar koʻchatlarini ekish, ularni parvarishlash boʻyicha tavsiyalar berildi. Tabiat musaffoligini taʼminlash, ekologik muvozanatni barqarorlashtirishda koʻkalamzorlashtirishning, daraxtlarni koʻpaytirishning ahamiyati tushuntirildi.

Seminarda taʼkidlanganidek, ekologiya va atrof-muhitni muhofaza qilish, ayniqsa, daraxt ekishga qaratilgan umummilliy loyihani amalga oshirish masalasi davlat siyosati darajasiga koʻtarilgani bejiz emas. Aytish joizki, mamlakatimiz va butun dunyodagi vaziyat ham ekologik muammolarga mana shunday tizimli va samarali yondashuvni taqozo etmoqda.

Soʻzga chiqqan masʼullar ekologik masalalarga bu qadar katta ahamiyat qaratilib, mana shunday umummilliy loyiha oʻtkazilishi Oʻzbekiston tajribasida shu paytga qadar kuzatilmaganligini, «Yashil makon» umummilliy loyihasi Oʻzbekiston sharoitida shu paytgacha ekologiya sohasida amalga oshirilgan ishlardan oʻrinli xulosa chiqargan holda, masalaning barcha taraflarini atroflicha inobatga olib, kelajakni koʻzlab ishlab chiqilgan noyob tajriba sifatida oʻz natijasini, samarasini berishini alohida taʼkidlashdi.

Seminardan soʻng, ovulda yangidan tashkil etilgan bogʻ hududiga mevali va manzarali daraxt koʻchatlari oʻtqazildi.

Shuningdek, 1-noyabrdan 30-noyabrgacha “Keksalar uchun turizm oyligi” deb eʼlon qilingani munosabati bilan Mahalla va nuroniylarni qoʻllab-quvvatlash boʻlimi boshligʻi Gʻulomjon Duysenboyev, Oila va xotin-qizlarni qoʻllab-quvvatlash boʻlimi boshligʻi Goʻzal Saburova, tuman Obodonlashtirish boshqarmasi boshligʻi Jasur Norimov va yana bir guruh mutasaddilar Doʻrman ovulidagi front ortida mehnat faxriylari 93 yoshli Yoʻldosh bobo Matmurodov, 87 yoshga kirgan Oyimjon momo Rahimova hamda 80 yoshli Aminboy ota Jumatovlarning holidan xabar olishdi va sovgʻa-salomlar topshirishdi.

Keksalar oʻzlariga koʻrsatilgan bu eʼtibor va gʻamxoʻrlikdan nihoyatda mamnun boʻldilar.

Ozoda Xudoyberganova.