OʻZBEKISTON RESPUBLIKASI IChKI IShLAR VAZIRLIGI MIGRATsIYa VA FUQAROLIKNI RASMIYLAShTIRISh BOSh BOShQARMASINING BOʻLIM BOShLIGʻI SAYYoR QABUL OʻTKAZDI

Joylarda oʻtkazilayotgan sayyor qabullar fuqarolarning dardini eshitish, ularning hayotidagi muammolariga yechim topishda muhim ahamiyat kasb etmoqda. Barcha davlat idoralari faoliyatida aholining murojaatlari bilan ishlash boʻyicha yaratilgan bunday tizim “xalq davlat organlariga emas, balki davlat organlari xalqqa xizmat qilish kerak” degan tamoyilning amaliy ifodasi desak, adashmagan boʻlamiz.

Shu yilning 29-oktyabrida Amudaryo tumani Mahalla va nuroniylarni qoʻllab-quvvatlash boʻlimi binosida boʻlib oʻtgan Oʻzbekiston Respublikasi Ichki ishlar vazirligi Migratsiya va fuqarolikni rasmiylashtirish bosh boshqarmasi boʻlim boshligʻi Aziz Rahmatullayevning sayyor qabulida ham aholining migratsiya, fuqarolikni rasmiylashtirish, pasport tizimiga oid koʻpgina muammolariga ijobiy yechim topildi.

Dastlab yigʻilganlarga sohada olib borilayotgan ishlar fuqarolikni rasmiylashtirish va pasport tizimiga oid yangiliklar haqida toʻxtalib oʻtildi.

Sayyor qabulga kelgan fuqarolar masʼullarga sohaga doir koʻplab murojaatlar qildilar. Xususan, Mangʻit  shahrining Xalqlar doʻstligi koʻchasida vaqtincha yashayotgan Rossiya Federatsiyasi fuqarosi Nojkin Vladimir Aleksandrovich pasportining muddati oʻtgan, muddatini uzaytirib, Oʻzbekiston Respublikasida yashash guvohnomasi rasmiylashtirishda yordam soʻrab murojaat qildi. Unga Toshkent shahriga borib kelishi, Rossiya Federatsiyasi pasportini qayta tiklashi uchun homiy biriktirildi.

Tumanimizning Qoramon mahallasida yashovchi 1969-yilda tugʻilgan Gulchehra Ishmedova asli Turkmaniston davlati fuqarosi. Sayyor qabuldan Oʻzbekiston Respublikasida yashash guvohnomasi olish masalasida murojaat qildi. Murojaat ijobiy hal qilinishi uchun hujjatlari koʻrib chiqilmoqda. Shu mahallaning  yana bir fuqarosi 1947-yilda tugʻilgan Toʻliboy Yoʻldoshev Turkmaniston Respublikasida istiqomat qiluvchi farzandi va kelinini Oʻzbekiston Respublikasiga taklif qilish masalasida, Boʻzsolma mahallasida yashovchi, 1945-yilda tugʻilgan Madamin Tursunov Turkmaniston Davlatining fuqarolik pasportini yoʻqotib qoʻyganligi, ushbu hujjatini tiklatib, Oʻzbekiston Respublikasida yashash guvohnomasini olish, Qangli ovulida yashovchi Ogulsona Saparova fuqaroligi yoʻq shaxs uchun Oʻzbekiston Respublikasida yashash guvohnoma olish, Boʻzsolma mahallasida yashovchi Selbi Tuvakmedova, Ikrom Shomurodovlar Oʻzbekiston Respublikasida yashash guvohnomasi olish, Xauagul Orazbayeva esa Oʻzbekiston Respublikasi fuqarolik pasporti olish masalasida murojaatlar qildi.

Sayyor qabul davomida ularning murojaatlarini ijobiy hal qilish uchun ayrimlarining hujjatlari qabul qilindi, ayrimlariga huquqiy tushuntirishlar berildi. Shuningdek fuqaroligi boʻlmagan shaxs sifatida doimiy roʻyxatda boʻlgan Mangʻit shahrida yashovchi Jamile Atabayevaning fuqarolik olish masalasidagi murojaati boʻyicha tegishli tartibda arizasi olinib, ijro uchun Qoraqalpogʻiston Respublikasi Migratsiya va fuqarolikni rasmiylashtirish boʻlimiga berildi.

Sayyor qabulda har bir murojaat sinchiklab oʻrganilgani va ijobiy yechim topishga harakat qilingani, ayrimlariga ega muammolarini hal qilish tartiblari tushuntirilganidan fuqarolar juda mamnun boʻldilar. Yurtimizda inson qadri ulugʻlanib, ularning farovon hayot kechirishi uchun amalga oshirilayotgan saʼy-harakatlardan minnatdor ekanliklarini izhor etdilar.

Oygul RAJABOVA.