25-oktyabr − Ichki ishlar organlari xodimlari kuni

Har yili mamlakatimizda 25-oktyabr − Ichki ishlar organlari xodimlari kuni sifatida keng nishonlanib kelinadi.

1991-yil 25-oktyabrda Oʻzbekiston Respublikasi Vazirlar Mahkamasining 270-sonli qarori asosida Oʻzbekiston SSR IIV – Oʻzbekiston Respublikasi Ichki ishlar vazirligiga aylantirilgan edi. Qaror bilan vazirlik Nizomi va strukturasi tasdiqlandi. 2006-yil 6-dekabrda qabul qilingan qonunga muvofiq ushbu sana, yaʼni 25-oktyabr sanasi Oʻzbekiston Respublikasi Ichki ishlar organlari xodimlari kuni etib belgilandi.

Bu yil Oʻzbekiston Respublikasi Ichki ishlar vazirligi tashkil etilganiga 31-yil toʻldi. Shu munosabat bilan oʻz hayotini fuqarolarimizning tinchligi va osoyishtaligi, huquq va erkinliklarini ishonchli himoya qilish, jamiyatimizda qonun ustuvorligini taʼminlashdek sharafli va masʼuliyatli ishga bagʻishlab kelayotgan barcha hamkasblarimizni, tinglovchi-kursantlarni hamda muhtaram faxriylarimizni bayram bilan samimiy muborakbod etaman.

Maʼlumki, Ichki ishlar organlari xodimlari jinsi, irqi, millati, tili, dini, ijtimoiy kelib chiqishi, eʼtiqodi, shaxsi va ijtimoiy mavqeidan qatʼi nazar yurtimizda yashayotgan har bir fuqaroning huquqlarini, qonuniy manfaatlarini himoya qiladi. Ichki ishlar organlarining asosiy vazifalari fuqarolarning huquqlari, erkinliklari va qonuniy manfaatlarini, jismoniy va yuridik shaxslarning mulkini, konstitutsiyaviy tuzumni himoya qilishdan, qonun ustuvorligini, shaxs, jamiyat va davlatning xavfsizligini taʼminlashdan, shuningdek huquqbuzarliklarning oldini olish va profilaktikasidan iborat.

Tizimda jinoyatchilikning oldini olish, huquqbuzarliklar profilaktikasi, aholining huquqiy madaniyatini yuksaltirish, fuqarolar ongida “Qonun — ustuvor, jinoyatga jazo muqarrar” degan hayotiy tamoyilni qaror toptirish boʻyicha jiddiy oʻzgarishlar joriy etilmoqda. Ushbu islohotlar natijasi oʻlaroq turli xalqaro reyting tashkilotlari jonajon yurtimizni tinch va osoyishta davlatlar qatorida koʻp bora eʼtirof etmoqda.

Tizimdagi barcha tarkibiy va hududiy boʻlinmalar, jumladan, profilaktika, jinoyat qidiruv, tergov, yoʻl-patrul va patrul-post xizmatlari, ekspert-kriminalistika va pasport boʻlinmalari mutlaqo yangicha mezonlar asosida qayta shakllantirilgani, xodimlar xizmat faoliyatiga xos boʻlmagan koʻplab ishlardan ozod etilgani sohada ish samaradorligini oshirishda muhim omil boʻlmoqda.

Amudaryo tumani Ichki ishlar boʻlimi xodimlari ham samarali faoliyat yuritmoqda.

Ichki ishlar organlarining bir tizimi boʻlgan jinoyat qidiruv boʻlimi shaxsga, fuqarolarning shaxsiy mulkiga, jamoat tartibiga va xavfsizligiga qarshi qaratilgan jinoyatlarning oldini olish, payini qirqish, ularni ochish va boshqa chora-tadbirlarni amalga oshiradi. Aytish kerakki, jamiyatda roʻy berayotgan har qanday qonunbuzilish, huquqbuzarlik va jinoyatchilik alomatlari aks etgan holatlarda Ichki ishlar organlari xodimlari bir-birlari bilan hamkorlikni yanada kuchaytirib, fuqarolarning huquq va manfaatlarini taʼminlashga oʻz hissalarini qoʻshib kelishmoqda.

Shuningdek, organ xodimlari tumandagi korxona-tashkilot, boʻlim masʼullari bilan samarali tarzda hamkorlik qilib kelishmoqda. Ayniqsa, huquqbuzarliklar profilaktikasi, voyaga yetmaganlar va xotin-qizlar oʻrtasida uchrayotgan jinoyatlarni bartaraf etish borasidagi faoliyat Yoshlar ishlari agentligi tuman boʻlimi, tuman Oila va xotin-qizlar boʻlimi hamda boshqa qator tashkilotlar bilan hamkorlik yoʻlga qoʻyilgan boʻlib, buning natijasida tumanda jinoyatchilikning kamayishiga erishilmoqda.

Ammo, baʼzi fuqarolarning yoʻl harakati qoidalariga rioya qilmasdan, tezlikni oshirgan xolda harakatlanishi tufayli yoʻl-transport xodisalari, oilaviy nizolar sababli kelib chiqqan janjallarda inson oʻlimi bilan yakun topgan ayanchli holatlar ham, afsuski uchrab turibdi.

Profilaktika inspektorlari mana shunday noxush holatlarning olidini olish maqsadida muntazam ravishda fuqarolar oʻrtasida tushuntirish-targʻibot tadbirlarini olib bormoqdalar. Tumandagi 49 ta ovul va mahalla fuqarolar yigʻinlarida faoliyat yuritayotgan 49 nafar profilaktika inspektorlari mahalla raisining oʻrinbosari darajasiga tenglashtirilgan boʻlib, ular mahallasidagi har bir fuqaroning oilaviy sharoiti, muammolaridan muntazam ravishda xabardor boʻlib, ijobiy hal qilinishiga koʻmaklashib kelmoqdalar.

Shuningdek, profilaktika inspektorlari hududlarda jamoat tartibini saqlashda, huquqbuzarlik va jinoyatlar sodir etilishining oldini olishda samarali tarzda faoliyat olib borishmoqda.

Qolaversa, mamlakatimiz tarixida ilk bor faqat ayol xodimlar ishlaydigan xotin-qizlar masalalari boʻyicha inspektor lavozimlari joriy etilgani ham muhim ijobiy yangilik boʻldi. Bugungi kunda ular har bir fuqarolar yigʻinlarida xotin-qizlar faollari bilan hamkorlikda opa-singillarimizning maslahatchisi, himoyachisi va koʻmakdoshiga aylanmoqda.

Shuningdek, bilib-bilmasdan jinoyat yoʻliga kirib qolgan va jazoni oʻtayotgan fuqarolarning ijtimoiy hayotga moslashuvini, sogʻlom hayotga qaytishini taʼminlashda ham ichki ishlar organlarining oʻrni va roli tobora ortib bormoqda. Bu yoʻnalishda tashkil etilgan probatsiya xizmati mahkumlarni zarur kasb-hunarlarga oʻqitish va tayyorlash, ishga joylashtirish, ularni xususiy tadbirkorlikka jalb etish, eng asosiysi, ish beruvchilar tomonidan ularning huquq va manfaatlari taʼminlanishida yaqindan yordam koʻrsatmoqda.

Koʻpincha fuqarolarning spirtli ichimliklar ichgan, hamda asabiy holda avtomobil boshqarishi koʻplab yoʻl-transport hodisalarining sodir boʻlishiga olib kelmoqda. Afsuski, mazkur holatlar ayrim fuqarolarning hayotdan erta koʻz yumishiga olib kelmoqda. Mana shunday ayanchli holatlarning oldini olish maqsadida yoʻl-patrul xizmati xodimlari oʻz xizmat vazifasini sidqidildan bajarib kelmoqdalar.

Yoʻl-patrul xizmati xodimlari kechani kecha, kunduzni kunduz demay, haydovchilarga yoʻl harakati qoidalariga qatʼiy rioya qilish, tezlikni oshirmaslik, odam gavjum joylarda ehtiyotkorona harakatlanish, ayniqsa, bogʻcha, maktablarga yaqin hududlarda tezlikni oshirmasdan harakatlanish, avtomobillarning texnik holati soz boʻlishi lozimligi boʻyicha tushuntirish-targʻibot ishlarini olib bormoqdalar.

Ichki ishlar organlari xodimlari nafaqat jamiyatda huquqbuzarlik va jinoyatlarning oldini olishda, qolaversa, fuqarolarning jamiyatda oʻz oʻrnini topishlarida ham yaqindan koʻmakchidir. Aytish kerakki, fuqarolar tomonidan sodir etilayotgan huquqbuzarlik va jinoyatlarga asosiy sabab, koʻpincha ularning hayotida uchrayotgan maishiy muammolardir. Yaʼni, oilaviy nizolarning kelib chiqishi bandligi taʼminlanmagan er-xotinlar orasida koʻproq uchramoqda.

Mana shularni hisobga olgan holda tuman Ichki ishlar boʻlimi boshligʻiga qarashli 3-sektor hududida aholining murojaatlari joyida oʻrganib chiqilib, hal qilib kelinmoqda. Sektor rahbariyati tomonidan aholiga munosib turmush tarzini yaratish maqsadida zarur chora-tadbirlar koʻrib borilmoqda. Jumladan, 2022-yilning shu kuniga qadar fuqarolar uchun 2-marta boʻsh ish oʻrinlari yarmarkasi tashkil etildi. Shuningdek, bandlik dasturiga muvofiq 620 nafar fuqarolar ishga joylashtirildi.

Taʼkidlash kerakki, sohadagi mavjud muammo va kamchiliklarni bartaraf etish hamda tegishli qonunlar ijrosini taʼminlab, islohotlar samaradorligini oshirishda faollik koʻrsatish har birimizning zimmamizdagi asosiy vazifadir. Bu vazifamizni sidqidildan ado etish bilan birga jamiyatda qonun ustuvorligiga erishish, har bir fuqaroning huquq va qonuniy manfaatlarini ishonchli himoya qilish hamda jamoat xavfsizligini taʼminlash orqali yurtimiz tinchligi va xalqimiz farovonligiga hissa qoʻshishdek bosh maqsadimiz yoʻlida hamisha sobitqadammiz.

Fursatdan foydalanib, barcha hamkasblarimizni yana bir bora 25-oktyabr − Ichki ishlar organlari xodimlari kuni bilan tabriklayman!

J.Yusupov, Tuman IIB boshligʻi, podpolkovnik.