MUDDATLI HARBIY XIZMATGA ChAQIRILUVChILARNI SARALASh DAVOM ETMOQDA

Mamlakatimizda mudofaa salohiyatini yuksaltirish maqsadida sohada islohotlar izchil amalga oshirilmoqda. Xususan 2021-yil 30-sentyabrda imzolangan “Umumiy harbiy majburiyat va harbiy xizmat toʻgʻrisida”gi Qonunga oʻzgartirish va qoʻshimchalar kiritish haqida”gi Qonunga muvofiq harbiy xizmatga chaqiriluvchilarni harbiy xizmatga tanlab olish jarayonlari ham oʻzgardi.

Oʻzbekiston Respublikasi Prezidentining 2022-yil 6-martdagi qaroriga muvofiq muddatli harbiy xizmatchi chaqirilayotgan fuqarolarni harbiy tibbiy koʻrikdan oʻtkazish uchun tuman, shahar mudofaa ishlari boʻlimidagi hududiy tibbiy komissiyalar va Qoraqalpogʻiston Respublikasi, viloyatlar mudofaa ishlari boshqarmalari huzurida harbiy tibbiy komissiyalar tashkil etildi.

Hududiy tibbiy komissiyalar tomonidan sogʻligʻi darajasi boʻyicha harbiy xizmatga yaroqli deb topilgan chaqiriluvchilar butlash komissiyasida suhbatdan oʻtkazilib, sogʻligʻining darajasi, jismoniy tayyorgarligi, fikrlash qobiliyati va boshqa xususiyatlarini inobatga olgan holda ularni qoʻshin turlariga tayinlash boʻyicha qaror qabul qilinmoqda.

Amudaryo tuman Mudofaa ishlari boʻlimi xizmatchilari tumanimizning 18 yoshdan 27 yoshgacha boʻlgan chaqiriluvchilarni navbatdagi 2023-yilgi chaqiruvga tayyorlash boʻyicha tizimli oʻrganish ishlarini amalga oshirayotir. Oʻrganish ishlari 2022-yilning 10-avgustidan boshlandi va 2023-yilning 10-fevraligacha davom etadi.

Shu kungacha muddatli harbiy xizmatga 100 nafar chaqiriluvchi rejim komandalariga tayinlandi.

Ayni kunda ham harbiy xizmatga chaqiriluvchilarni harbiy xizmatga tanlov asosida qabul qilish uchun sinovlar davom etmoqda. Davlatimiz Qurolli Kuchlari safini jismonan baquvvat, bilim darajasi yuqori, oʻz yurtining tinchlik-osoyishtaligiga oʻzini daxldor deb hisoblaydigan, maʼnaviyatli oʻgʻlonlar bilan butlash maqsadida oʻtkazilayotgan tanlovlar uchta bosqichni tashkil etadi.

Harbiy xizmatga chaqiriluvchilar yaʼni 1996-2005-yilda tugʻilgan yigitlar dastlab umumjismoniy tayyorgarlik darajasi boʻyicha sinovdan oʻtadilar. Bunda ular 100 metr, 300 metr masofaga yuugurish, turnikda tortilish mashqlarini bajaradilar. Ikkinchi bosqichda chaqiriluvchilar bilan yakka suhbat oʻtkazish orqali bilim darajasi, oilaviy ahvoli oʻrganiladi. Ushbu sinovlarda muddatli harbiy xizmatni oʻtashga loyiq deb topilgan chaqiriluvchilar komandalarni butlash komissiyasiga tavsiya qilinadi. Butlash komissiyasi ularning qiziqishlari, intilishlari va salohiyatini hisobga olgan holda yakuniy qaror qabul qiladi.

Tuman mudofaa boʻlimi xodimlari oʻsib kelayotgan yosh avlodning Qurolli kuchlar saflarida xizmat qilishga munosib boʻlib voyaga yetishlariga hissa qoʻshish maqsadida tumanimizdagi umumiy oʻrta taʼlim maktablarida vatanparvarlik mavzusida koʻpgina tadbirlar oʻtkazmoqda va ularning harbiy sohaga qiziqishlarini oshirishga erishmoqda.

Harbiy xizmat – har bir yigitning sharafli burchidir. Oʻz Vatanini sevgan yigitlar uning osoyishtaligini asrashga doimo shay boʻladi.

Qahramon AHMEDOV, tuman Mudofaa ishlari boʻlimi chaqiruv boʻlinmasi boshligʻi.