Tuman xabarlari

Konstitutsiya kuniga bagʻishlangan uchrashuv

2-dekabr kuni Amudaryo akademik litseyida Oʻzbekiston Respublikasi Konstitutsiyasi qabul qilinganining 22 yilligiga ba-gʻishlangan uchrashuv boʻlib oʻtdi. Uchrashuvda Qoraqalpogʻiston Respublikasi Joʻqorgʻi Kengesi vakillari, tuman hokimligi masʼullari, muassasa, korxona va tashkilotlar xodimlari hamda akademik litseyning oʻqituvchi va oʻquvchilari qatnashdilar.

Uchrashuvda tuman hokimi R.Yoʻldoshev, Qoraqalpogʻiston Respublikasi Joʻqorgʻi Kengesi qoʻmita raisi S.Xoʻjanazarov, Respublika Favqulodda vaziyatlar boshqarmasi boshligʻi Q.Jiyemuratovlar Konstitutsiyaning hayotimizdagi ahamiyati haqida soʻzladilar. Akademik litseyning oʻquvchi yoshlari munozaralarda va savol-javoblarda faol ishtirok etib, bosh Qomusimizga oid bilimlarini yanada mustahkamladilar.

Tuman hokimligining axborot xizmati.

Aholi bilan uchrashuvlar oʻtkazilmoqda

Shu kunlarda tumanimizning ovul va mahallalarida Oʻzbekiston Respublikasi Oliy Majlisi Qonunchilik palatasiga, Qoraqalpogʻiston Respublikasi Joʻqorgʻi Kengesiga va xalq deputatlari tuman Kengashiga oʻtkaziladigan saylovlar munosabati bilan hamda Oʻzbekiston Respublikasi Konstitutsiyasi qabul qilinganining 22 yilligi oldidan uchrashuvlar oʻtkazilmoqda.

Aholining huquqiy bilimini oshirish,ularni tumanimizda amalga oshirilayotgan ishlar bilan yaqindan tanishtirish, ijtimoiy-maʼnaviy muhit barqarorligini taʼminlash, noqonuniy mehnat migratsiyasining oldini olish, aholi bandligini taʼminlash, kuz-qish mavsumini betalofat oʻtkazish boʻyicha muammolarni bartaraf qilish maqsadida tashkil qilingan uchrashuvlar ochiq muloqot shaklida oʻtmoqda.

A.JUMANIYoZOV.

Konstitutsiya va yoshlar

21-28-noyabr kunlari "Kamolot” YoIH tuman Kengashi tomonidan "Oʻzbekiston Respublikasi Konstitutsiyasi – mamlakat taraqqiyoti va jamiyat farovonligining huquqiy kafolati” loyihasining targʻiboti oʻtkazildi.

Yoshlarning huquqiy madaniyatini shakllantirish, ularning demokratik islohotlarni chuqurlashtirish, fuqarolik jamiyatini rivojlantirish jarayonlaridagi faolligini oshirish maqsadida tashkil etilgan mazkur loyihada Mirzo Ulugʻbek nomidagi Oʻzbekiston Milliy Universitetining iqtidorli va faol talabayoshlaridan iborat targʻibot guruhi aʼzolari oʻzlarining Konstitutsiya mazmunmohiyatini hamda uning mamlakat va xalqimiz hayotidagi oʻrnini ochib beruvchi maʼruzalari bilan qatnashishdi.

M.Oʻrozboyev, harakatning

tuman Kengashi raisi.

Ajiniyoz ijodiga muhabbat

Yaqinda 64sonli umumtaʼlim maktabida 1-dekabr - Qoraqalpoq tiliga davlat tili maqomi berilgan kun munosabati bilan qoraqalpoq klassik adabiyotining yetuk namoyandalaridan biri Ajiniyoz Qoʻsiboy oʻgʻli tavalludining 190 yilligi munosabati bilan shoir ijodi va faoliyatiga bagʻishlangan adabiy kecha boʻlib oʻtdi. Maktabning 4-sinf oʻquvchilari tomonidan tayyorlangan ushbu adabiy-badiiy tadbirda otashnafas qoraqalpoq shoiri Ajiniyozning adabiy merosi hamda uning oʻzbek va qoraqalpoq adabiyotida tutgan oʻrni haqida soʻz bordi.

Tadbirda shoir ijodidan namunalar oʻqildi va Ajiniyoz ijodining eng bilimdoni, deb tan olingan oʻquvchilarga maktab maʼmuriyati tomonidan esdalik sovgʻalari berildi.

Sharofat Abdullayeva,

64-maktab oʻqituvchisi.

Sheʼriyat kechasi oʻtkazildi

4-dekabr kuni bosh Qomusimiz - Oʻzbekiston Respublikasi Konstitutsiyasi qabul qilingan kun munosabati bilan tumanimizda yashab, ijod qilayotgan qalamkashlar ishtirokida sheʼriyat kechasi oʻtkazildi.

Kechani faxriy jurnalist Saʼdulla Xoʻjaniyozov ochdi va olib bordi. Tadbirda ustoz ijodkorlar hamda yosh qalamkashlar mustaqillik, yurtimizdagi tinchlik va farovonlikni tarannum qiluvchi sheʼrlarini, yangi ijod mahsullarini ishtirokchilarga oʻqib berdilar.

Jannatmakon yurtimizdagi tinchosoyishta, obod va farovon turmushimizning asosi boʻlgan Konstitutsiyamiz qabul qilingan kunga bagʻishlangan sheʼriyat kechasi barcha ishtirokchilarda chuqur taassurot qoldirdi.

Oygul RAJABOVA, jurnalist.