“Noʻgʻay Eshon” jomeʼ masjidi binosi yangidan barpo etilmoqda

Yurtimizda masjidlarimiz kundan-kunga obod boʻlmoqda. Koʻpchilik masjidlar zamonaviy shaklda taʼmirlanib, chiroyli va qulay holatga keltirilmoqda. Bu kabi hayrli ishlar diniy qadriyatlarimizga boʻlgan ulkan eʼtiborning natijasidir. Masjidlarni obod etish hamda ularni taʼmirlash savobi ulugʻ amallardan biridir.

Vazirlar Mahkamasining “Muqaddas qadamjolar, ziyoratgohlar, masjidlar va qabristonlarni obodonlashtirish  ishlarini samarali tashkil etish toʻgʻrisida”gi qaroriga muvofiq hududlarda faoliyat yuritayotgan masjidlarning eski binolarini rekonstruktsiya qilish va taʼmirlash boʻyicha “Yoʻl xaritasi” tasdiqlangan boʻlib, unga koʻra hududlarda yangi masjidlar qurilmoqda.

Amudaryo tumanining Choykoʻl ovuli hududida joylashgan “Noʻgʻoy Eshon” jomeʼ masjidi binosining yangidan barpo etilishi ham bu boradagi amaliy ishlarning yaqqol namunasi boʻldi.

Mazkur binoning qurilish ishlari tuman hokimi qaroriga asosan Choykoʻl ovul fuqarolar yigʻini hududidan ajratilgan yer maydonida shaharsozlik meʼyorlari va qoidalariga muvofiq tarzda boshlab yuborildi.

Yaqinda hashar yoʻli bilan tadbirkorlar va xayriya qiluvchilarning homiylik yordami hisobiga qurilayotgan ushbu masjid binosining qurilish ishlari boshlanishi munosabati bilan tadbir boʻlib oʻtdi. Unda tuman hokimi Sultonboy Yoʻldashev, hokim oʻrinbosari Nodirek Kamolov, Amudaryo tumani bosh imom-xatibi Abdurahmon Matsapayev, masjid imom-xatibi Oʻktam Qurbaniyazov hamda mahalla faollari ishtirok etishdi.

Tuman hokimi Sultonboy Yoʻldashev mahalla ahlini ushbu muqaddas binoning barpo etilayotganligi bilan samimiy tabrikladi. Shuningdek, bunyod etilayotgan ushbu masjid hashamatli, namozxonlar uchun juda qulay va shinam boʻlishiga alohida eʼtibor qaratilganligini taʼkidlab oʻtdi.

Aytish kerakki, qurilish ishlariga eng mohir usta va muhandislar jalb etilgan. Bunday ezgu ishga oʻz hissasini qoʻshishni istovchi mahalla ahli ham oʻz mahoratlarini koʻrsatib, bor kuch-gʻayratlari bilan mehnat qilishga shay boʻlib turishibdi.

Tadbirda imom-xatiblar masjidni obod etishning savobi ulugʻ ekani, hamda bu muqaddas hadislarimizda ham alohida bayon qilib oʻtilganini taʼkidlashdi.

Shundan soʻng, tuman hokimi, imom-xatiblar hamda mahalla aholisi masjidning yangi binosi uchun ilk ustunlarni qoqishdi.

 Marosimda Qurʼon tilovat qilindi va yangidan qurilishi boshlanayotgan masjid tez orada bunyod boʻlishi, ularda moʻmin-musulmonlar ibodatlar qilishini soʻrab duolar qilindi.

Eslatib oʻtamiz, oʻtgan yilning 24-iyul kuni Qipchoq shaharchasidagi “Hoji eshon bobo” jomeʼ masjidi binosi qurilishini boshlash uchun tamal toshi qoʻyilgan edi. Ayni kunlarda masjid binosi boʻy tiklab, qurilish ishlari jadal surʼatlarda olib borilmoqda.

Tuman hokimligining Axborot xizmati.