Oq oltin ovulidagi suv tozalash inshooti foydalanishga topshirildi

Dunyoning koʻplab mamlakatlarida toza ichimlik suvi taqchilligi dolzarb masala boʻlib turgan bir vaqtda, mamlakatimizda aholini toza ichimlik suvi bilan taʼminlash borasida keng koʻlamli amaliy ishlar qilinmoqda.

Oʻzbekiston Respublikasi Prezidentining “2021-2023-yillarda Oʻzbekiston Respublikasining ijtimoiy va ishlab chiqarish infratuzilmasini rivojlantirish chora-tadbirlari toʻgʻrisida”gi qaroriga asosan Amudaryo tumanida ijtimoiy va ishlab chiqarish infratuzilmasini jadal rivojlantirish, tadbirkorlik subʼektlariga qulay investitsiya muhitini yaratish, iqtisodiyot tarmoqlari va ijtimoiy sohani qoʻllab-quvvatlash, shuningdek, davlat-xususiy sheriklik asosida yangi infratuzilma obʼektlarini barpo etish, shu asosda aholi bandligini taʼminlash va ularning turmush darajasini yanada yaxshilash boʻyicha koʻplab ijobiy ishlar amalga oshirilmoqda.

Amudaryo tumanining Oq oltin ovulida joylashgan suv inshooti hamda 7,9 km uzunlikdagi ichimlik suvi tarmoqlari rekonstruktsiya qilinib, foydalanishga topshirilgani ham bu boradagi amaliy qadamlardan biri boʻldi.

Yaqinda ushbu inshootning foydalanishga topshirilish marosimi boʻlib oʻtdi.

Tadbirda Oʻzbekiston Respublikasi Prezidenti Administratsiyasi vakili Akbarjon Jonuzaqov, Qoraqalpogʻiston Respublikasi Vazirlar Kengashi Raisi oʻrinbosari Yernazar Atashov, tuman hokimi Sultonboy Yoʻldashev, sektorlar rahbarlari, hokim oʻrinbosarlari, muassasa va tashkilotlar rahbarlari, ovul aholisi ishtirok etishdi. Ovul nuroniylari aholini toza ichimlik suvi bilan taʼminlash savobi ulugʻ amallardan ekanligini aytib, masʼullarga oʻzlarining chuqur minnaddorligini bildirishdi.

Maʼlumot oʻrnida aytish kerakki, Birlashgan millatlar tashkilotining hisobotiga koʻra, bugungi kunda sayyoramizdagi 2 milliard aholi toza ichimlik suvidan bevosita foydalanish imkoniga ega emas. Mutaxassislarning tahlillariga koʻra, jahonda 2000-yildan 2050-yilgacha boʻlgan davrda suvga boʻlgan global talab 55 foizga oʻsadi. Ayniqsa, Oʻzbekistonning qoʻshni mamlakatlardan keladigan suv taʼminotiga bogʻliqligi yuqori darajada, yaʼni isteʼmol qilinadigan suvning 80 foizi tashqaridan keladi. Shuning uchun ham har bir yurtdoshimiz suvni tejashga alohida eʼtibor qaratishlari lozim.

Oq oltin ovulidagi mazkur suv tozalash qurilmasi va suv tarmoqlarining rekonstruktsiya qilinishi ovul hududida istiqomat qiluvchi 300 ga yaqin oilaning tozalangan suvga boʻlgan ehtiyojini qondirishga xizmat qiladi.

Maʼlumot uchun, mazkur suv tozalash inshooti “Temir beton” masʼuliyati cheklangan jamiyati hamda “Mangʻit mega hamkor” masʼuliyati cheklangan jamiyati oʻrtasidagi oʻzaro shartnomalar asosida rekonstruktsiya qilindi.

Oq oltin ovulidagi suv tozalash qurilmasi va suv tarmoqlarining rekonstruktsiya qilinib, foydalanishga topshirilishi ovul aholisi uchun katta tuhfa boʻldi.

Tuman hokimligining Axborot xizmati.