Amir Temur nomli ovulda DXX xodimlari aholi bilan uchrashdi

Amudaryo tumanining Amir Temur nomli ovul fuqarolar yigʻini binosida chegaraga yaqin joylarda istiqomat qiluvchi aholi bilan “Chegara dahlsizligi, diniy ekstremizm va xalqaro terrorizm hamda narkotrafikga qarshi kurashishda mahalliy aholining roli” mavzusida yigʻilish oʻtkazildi.

Yigʻilishda Davlat xavfsizlik xizmati xodimlari, tuman hokimligi mutasaddilari, chegara oldi hududidagi fermer xoʻjaligi ishchilari, imomlar va mahalla faollari ishtirok etishdi.

 Yigʻilish davomida Davlat xavfsizlik xizmati xodimlari aholiga Oʻzbekiston Respublikasi Vazirlar Mahkamasining 2021-yil 4-dekabrdagi “Oʻzbekiston Respublikasida chegara zonasi va chegara mintaqasini belgilashga oid qoʻshimcha chora-tadbirlar toʻgʻrisida”gi qarorining mazmun mohiyati keng tarzda tushuntirishlar berdilar.

Qolaversa, davlat chegara chizigʻidan 500 metr oraliqda chorva mollarini boqmaslik, chegara hududida fermer xoʻjaligi yerlarida ishlovchi ishchilarning roʻyxatlarini Davlat xavfsizlik xizmatiga taqdim qilish, aholiga chegara oldi zonalarida Qonun talablari asosida harakatlanish zarurligi boʻyicha batafsil maʼlumot berildi.

Shuningdek, chegara oldi hududlarida istiqomat qiluvchi aholi oʻrtasida dunyoviy va diniy qarashlar zidligininshg yuzaga kelishining oldini olish, nosogʻlom, diniy aqidalar tasiriga tushib qolgan oilalar bilan alohida ishlash, ularning hayotda oʻz oʻrnini topishlarida hamkorlikni kuchaytirish lozimligi haqida taʼkidlab oʻtildi.

Aytish kerakki, hozirgi kunda muqaddas islom dinimizning asl mazmun-mohiyatini anglab yetish, uni turli xil gʻarazli xuruj va hamlalardan, tuhmat va boʻhtonlardan himoya qilish, uning asl mohiyatini unib-oʻsib kelayotgan yosh avlodimizga toʻgʻri tushuntirish, islom madaniyatining ezgu gʻoyalarini keng targʻib etish vazifasi nihoyatda dolzarb ahamiyat kasb etadi. Afsuski, baʼzi yurtdoshlarimiz yaqin qoʻshnimiz Afgʻoniston, qolaversa Suriya va Iroq davlatlaridagi notinchliklar guvohi boʻla turib ham aqidaparastlarga aldanib, ularga qoʻshilib qolayotganligi achinarli holat.

Yigʻilishda fuqarolarga bugungi kunda islomni daʼvo qilayotgan, biroq qilayotgan ishlari islomga butunlay begona boʻlgan terrorchilarning asl maqsadi haqida tushuntirishlar berildi. Ayniqsa, yoshlarning internetdan foydalanish madaniyatini oshirish zarurligi, ota-onalar farzand tarbiyasiga jiddiy qarashi lozimligi taʼkidlandi.

Darhaqiqat, bugungi axborot asrida internet tarmoqlarida islom dinini turli koʻrinishda targʻib qiladigan videolavhalar, maʼruzalar koʻp uchraydi. Ammo ularning hammasiga ham ishonib boʻlmaydi. Yigʻilish yakunida fuqarolar oʻzlarini qiziqtirgan savollar bilan murojaat qilib, tegishlicha javoblar oldilar.

Mamlakatamizda tinchlik va osoyishtalik hukm surmoqda. Buning asosida yurtboshimiz olib borayotgan oqilona siyosat, kechani kecha, kunduzni kunduz demay xizmatga shay harbiylarimiz, yoshlarimizni Vatanga sadoqatli, insonparvar va bilimli etib tarbiyalash yoʻlida hormay mehnat qilayotgan ustoz va murabbiylarimiz hamda xalqimizning diniy maʼrifatini oshirish, ularni sof islomiy qadriyatlar asosida imon-eʼtiqodli qilib tarbiyalash yoʻlida ulkan xizmat qilayotgan imom-xatiblarimizning xizmatlari mujassamdir.

Shunday ekan, tinchlikdek oliy neʼmatning qadriga yetishimiz, uni asrab-avaylash, ogoh va xushyor boʻlib yashash – har birimiz uchun ham farz, ham qarzdir.

Fotima Eshimbetova