ChOYKOʻL OVULIDA “BESh TAShABBUS OILADAN BOShLANADI” MAVZUSIDA TADBIR OʻTKAZILDI

15-aprel kuni fuqarolar yigʻini binosida Davlatimiz rahbari tomonidan ilgari surilgan yoshlar bilan ishlashni samarali tashkil etishda madaniyat, sanʼat, sport, axborot texnologiyalari, kitob oʻqishga qiziqishni oshirish boʻyicha 5 ta muhim tashabbusni keng ommaga targʻib etish, aholi xabardorligini oshirish maqsadida keng koʻlamli ishlar amalga oshirilmoqda. Choykoʻl ovulida ham “Besh tashabbus oiladan boshlanadi” mavzusida katta tadbir oʻtkazildi.

Tadbirda Ayollarni reabilitatsiya qilish va moslashtirish Qoraqalpogʻiston Respublikasi tumanlararo markazi direktori Gavhar Chimbaychiyeva, tuman Oila va xotin-qizlar boʻlimi yetakchi  mutaxassisi Gulfiya Yerimmetova va mahalladagi faol ayollar qatnashdilar.

Koʻrgazmali seminar tarzida oʻtkazilgan ushbu tadbirda ovul ayol-qizlari va isteʼdodli yoshlarning tikuvchilik, hunarmandchilik, rassomchilik, kulolchilik va boshqa yoʻnalishlardagi qoʻl mehnati namunalaridan koʻrgazma tashkil etildi. Koʻrgazmada mahallaning qoʻli gul chevar ayol-qizlar tomonidan tayyorlangan turli dizayndagi liboslar, usta hunarmandlar tomonidan yasalgan uy-roʻzgʻor buyumlari, kulolchilik mahsulotlari namoyish etildi. Ushbu qoʻl mehnati bilan yaralgan mahsulotlar tashrif buyurgan mehmonlarda katta qiziqish uygʻotdi.

Maʼlumki, Prezidentimiz tomonidan ilgari surilgan “Besh tashabbus” gʻoyasida ezgu maqsadlar mujassamligi hayotimizda oʻz ifodasini topmoqda. Besh tashabbusga koʻra yoshlarni munosib ravishda kamolga yetkazish uchun ularni madaniyat va sanʼatga, jismoniy tarbiya va sportga jalb qilish, kompyuter texnologiyalari hamda internetdan samarali foydalanishlariga imkoniyatlar yaratish, kitobxonlikni keng targʻib qilish, yoshlarni turli hunarlar va boshqa xayrli ishlar bilan band etish zarur. Oila tarbiyasining mantiqiy davomi hisoblangan ana shu besh tashabbusni toʻlaqonli amalga oshirish maqsadida bugun barcha hududlarda turli tadbirlar oʻtkazilib, yoshlarni qamrab olishga alohida eʼtibor qaratilmoqda. Amudaryo tumanida ham bu borada keng koʻlamli ishlar yoʻlga qoʻyilgan.

Tadbir davomida yoshlarning maʼnaviyatini yuksaltirish  va ularning boʻsh vaqtini  mazmunli tashkil etish boʻyicha  “Beshta muhim tashabbus”ning ahamiyati, oilada ota-onalar farzandlarini yoshligidan sportga, kasb-hunarga, kitobxonlikka, sanʼat va madaniyatga, kompyuter texnologiyalari kabi rivojlangan sohalarga oʻz qiziqishlari boʻyicha amaliy koʻmaklashishi lozimligi toʻgʻrisida soʻz yuritildi.

Shu bilan birga ovul yoshlarini beshta tashabbus doirasidagi toʻgaraklarga jalb etish, ularning boʻsh vaqtlarini mazmunli oʻtkazishlari uchun imkoniyat yaratish borasida amalga oshirilgan ishlar xususida maʼlumot berildi.

Hududdagi madaniyat markazi, taʼlim maskanlarida yoshlar uchun besh tashabbus doirasida yoʻlga qoʻyilgan badiiy havaskorlik, sport, chevarlik, milliy hunarmandchilik toʻgaraklari, kutubxonalar faoliyati, ularga yoshlarni jalb etish borasida amalga oshirilayotgan chora-tadbirlar tilga olindi.

Tadbir davomida besh tashabbusning jismoniy tarbiya va sport yoʻnalishi boʻyicha tashkil etilgan toʻgarak shugʻullanuvchilari va mahalladagi qiziquvchi yoshlar oʻrtasida shaxmat-shashka oʻyinlari tashkil etildi. Shuningdek, ovuldagi madaniyat markazida tashkil etilgan toʻgaraklar havaskorlari tomonidan tayyorlangan musiqiy dastur havola etildi. Isteʼdodli yoshlar tomonidan ijro etilgan kuy-qoʻshiqlar, jozibali raqslar va qiziqarli sahna koʻrinishlari barchaga juda manzur boʻldi.

O.Xudoyberganova.