“YoShLAR – NURONIYLAR NIGOHIDA” NOMLI TADBIR OʻTKAZILDI

Mavzuga oid fotogalereya

Prezidentimiz tomonidan shu yil 15-martda imzolangan Qarorga muvofiq mamlakatimizda keksa avlod vakillarini qoʻllab-quvvatlash boʻyicha yangi ijtimoiy-iqtisodiy tizim yaratildi va shu asosida qator ishlar amalga oshirilmoqda. Mazkur qarorda mahallalarda keksalarning ijtimoiy faolligini ragʻbatlantirishga oid normalar oʻz aksini topgan.

Yoshi ulugʻ insonlarni eʼzozlash, qadrlash, hurmatini joyiga qoʻyish xalqimizning azaliy qadriyatlaridandir. Chunki keksalar bugungiday dorilomon kunlarimizning bunyodkorlaridir.

Shu yilning 12-aprelida Mangʻit shahridagi Xotira maydonida boʻlib oʻtgan “Yoshlar – nuroniylar nigohida” deb nomlangan uch avlod uchrashuvida ham keksa avlod vakillariga boʻlgan ehtirom yaqqol ifodasini topdi.

Tadbirda Qoraqalpogʻiston Respublikasi Mahalla va nuroniylarni qoʻllab-quvvatlash vaziri oʻrinbosari Tursunboy Abdujabborov, Oʻzbekiston Respublikasi Mahalla va nuroniylarni qoʻllab-quvvatlash vazirligi boʻlim boshligʻi Maʼmurjon Shukurov, boshqarma boshligʻi oʻrinbosari Qadamboy Matniyozov, tuman hokimi Sultonboy Yoʻldashev, sektorlar rahbarlari va hokimlik masʼullari, tuman Mahalla va nuroniylarni qoʻllab-quvvatlash boʻlimi xodimlari, tumandagi ovul va mahalla fuqarolar yigʻinlari raislari, nuroniy keksalar va yoshlar ishtirok etdilar.

Tadbir mehmonlari karnay-surnay sadolari ostida samimiy kutib olindi. Mehmonlar dastlab tumanimiz ovul va mahallalaridagi hunarmandlarning mehnat mahsuli boʻlmish turli mahsulotlar koʻrgazmasi, amudaryolik ijodkorlar asarlari bilan tanishdilar. Soʻngra otaxon sanʼatkor, Qoraqalpogʻistonda xizmat koʻrsatgan madaniyat xodimi Gulmirza Nurmatov va tumanimiz yosh sanʼatkorlari joʻrovozligida mashhur  “Yashna, yashna Amudaryom!” qoʻshigʻi yangradi.

“Yoshlar – nuroniylar nigohida” deb nomlangan tantanali uch avlod uchrashuvini tuman hokimi Sultonboy Yoʻldashev ochdi va barcha ishtirokchilarni qutlugʻ ramazon oyi  bilan qizgʻin qutladi. U oʻz soʻzida avlodlar uchrashuviga bagʻishlangan ushbu tadbirning mazkur maydonda oʻtkazilayotgani ham oʻziga xos ramziy maʼnoga egaligi, tuman hokimligining tashabbusi bilan qurilgan ushbu maydon va unga tutash boʻlgan muzey xalqimizning yaqin oʻtmishini oʻzida aks ettirgani bilan barchamiz uchun qadrli ekanligini taʼkidladi.

Qoraqalpogʻiston Respublikasi Mahalla va nuroniylarni qoʻllab-quvvatlash vaziri oʻrinbosari Tursunboy Abdujabborov, tuman Nuroniylar jamoatchilik Kengashi raisi oʻrinbosari Bekman Allamberganov, tuman Mahalla va nuroniylarni qoʻllab-quvvatlash boʻlimi qoshidagi “Buvijonlar maktabi” jamoatchilik Kengashi raisi, “Barkamol avlod” bolalar maktabi direktori, Qoraqalpogʻistonda xizmat koʻrsatgan madaniyat xodimi Xonimjon Rajabova ham bugungi kunda mamlakatimizda keksa avlod vakillariga qaratilayotgan eʼtibor haqida, nuroniylarning yoshlarimizni Vatanga fidoyi, bilimdon va oqil qilib tarbiyalashda namuna boʻlayotganligi haqida toʻlqinlanib gapirdilar.

Soʻzga chiqqanlar mamlakatimizda nuroniylarni eʼzozlash, ularning jamiyat hayotidagi ishtirokini kengaytirish borasida qilinayotgan ishlar xususida gapirdilar. Keksa avlod vakillari mahallalarda tibbiy xizmatlar, oʻquvchi-yoshlarga taʼlim-tarbiya berishning ahvoli va boshqada sohalarda jamoatchilik nazoratini oʻrnatib, tarbiyasi ogʻir va muammoli yoshlarni jamiyat uchun foydali shaxslarga aylantirish borasida “Bir nuroniy – oʻn yoshga masʼul” tamoyili asosida faol ish olib borayotgani alohida qayd etildi.

Oʻz navbatida milliy oʻzligimizni anglash, tariximizni chuqur oʻrganish, mustaqilligimiz yoʻlida jonini fido qilgan ajdodlarimizni xotirlash barchamizning muqaddas burchimiz, ularning oʻtmish xotiralari, bosib oʻtgan hayot yoʻli yoshlarimiz uchun haqiqiy ibrat maktabi ekani eʼtirof etildi.

Shundan soʻng masʼullar turli sohalarda ishlab, tumanimiz ijtimoiy-iqtisodiy ravnaqiga munosib hissa qoʻshgan bir guruh mehnat faxriylariga sovgʻalar topshirdilar. Qoraqalpogʻiston Respublikasi Mahalla va nuroniylarni qoʻllab-quvvatlash vazirligi tomonidan 1 nafar nuroniyga nogironlar aravachasi, 3 nafar nuroniyga eshitish moslamasi, 10 nafariga qoʻltiqtayoqlar topshirildi. Tuman hokimligi nomidan esa 40 nafar nuroniylarga esdalik sovgʻalari berildi.

Tadbirning badiiy qismini tumanimiz yosh sanʼatsevarlari joʻshqin qoʻshiqlar bilan boshlab berishdi. Badiiy gimnastika bilan shugʻullanayotgan bir guruh qizlar ishtirokidagi quvnoq raqsdan soʻng sahnaga Shimoli-Gʻarbiy harbiy okrug orkestri xonandalari chiqishib, tinchlik, baxtiyor davronimiz, shu ulugʻ va muqaddas Vatanimiz madh etilgan joʻshqin qoʻshiqlar kuyladilar.

Tumanimiz sanʼatkorlari ijrosidagi kuy-qoʻshiqlar ham barchaga manzur boʻldi.

Shuningdek, tadbir davomida mehmonlar Gulzor mahallasida “Bir nuroniy – oʻn nafar yoshga masʼul” tamoyili asosida amalga oshirilayotgan ishlar bilan tanishdi.

Qayd etish kerakki, Amudaryo tumanida jami keksalar soni 19 ming 895 nafarni tashkil qiladi. Shundan 12 ming 872 nafari ayollardir. “Bir nuroniy – oʻn nafar yoshga masʼul” tamoyili asosida 49 ta mahallada yashovchi 70 nafar nuroniylar 490 nafar yoshlarga masʼul qilib biriktirilgan.

Oʻz navbatida oʻzgalar parvarishiga muhtoj, yakka-yolgʻiz keksalarni qoʻllab-quvvatlash maqsadida 50 nafar keksa avlod vakillari holidan doimiy xabar olib kelinmoqda. Oʻtgan davr mobaynida 31 marotaba madaniy-maʼrifiy va sogʻlomlashtirish tadbirlari tashkil etilib, tadbirlarga 1 ming 36 nafar yurtdoshlarimiz qamrab olindi. Yil boshidan bayon 7 ta fuqarolar yigʻinlarida “Uch avlod uchrashuvlari" tashkil etilib, tadbirlarda 50 nafar nuroniylar hamda 325 nafar yoshlar ishtirok etdilar.

Shu kuni mehmonlar 82-sonli maktabda tashkil qilingan “Nuroniylar tarbiyaviy soati”da ham ishtirok etdilar. Aytish joizki, har haftaning juma kuni tumanimiz boʻylab “Nuroniylar tarbiyaviy soati” davra suhbatlari oʻtkazib kelinmoqda. Davra suhbatlarini jonli muloqot tarzida tashkil qilish uchun 85 ta umumtaʼlim maktablariga 3 nafardan jami 255 nafar faol nuroniylar biriktirilgan. 82-sonli maktabda ham 2 nafar nafaqadagi ofitserlar, 1 nafar afgʻon urushi qatnashchisi har juma kuni yoshlar bilan suhbatlar uyushtirib kelmoqda.

“Nuroniylar tarbiyaviy soati”da bugungi tinch va osoyishta zamonamizning, erkin va farovon hayotimizning qadriga yetib, ona Vatanimizning tinchligini koʻz qorachigʻiday asrash har bir fuqaroning burchi ekani yoshlarga hayotiy misollar orqali tushuntirib kelinmoqda.

Har qanday mamlakat taraqqiyoti fuqarolarining aql-zakosi, yurti uchun qilgan fidoyi mehnatiga bogʻliq. Shu maʼnoda olib qaraydigan boʻlsak, nuroniylarimiz bugungi baxtiyor zamonaning bunyodkorlaridir. Ular har qancha hurmatga, eʼtiborga munosibdirlar. “Yoshlar – nuroniylar nigohida” deb nomlangan avlodlar uchrashuvi bu hayot haqiqatini yoshlarga yetkazishga xizmat qilishi bilan ahamiyatlidir.

Oygul RAJABOVA.

Ozoda XUDOYBERGANOVA.