“HAR KUNING BAYRAM BOʻLSIN!”

Navroʻz – xalqimizning qadimiy tarixi, boy madaniyati va ezgu qadriyatlarini oʻzida yaqqol mujassam etgan milliy bayramimizdir. Shu boisdan ham sana har yili mamlakatimizda ulkan shodiyonalar bilan nishonlanadi.

Oʻzbekiston Respublikasi Prezidentining shu yil 17-fevralda qabul qilgan “2022-yilgi Navroʻz umumxalq bayramiga tayyorgarlik koʻrish va uni oʻtkazish toʻgʻrisida”gi Qarorida ham joriy yilgi ushbu umumxalq bayramini “Assalom, Navroʻz – yangilanish, mehr-oqibat va qadr-qimmat ayyomi” degan bosh gʻoya asosida umumxalq sayillari shaklida koʻtarinki ruhda va yuqori saviyada nishonlash belgilangan.

Butun mamlakatimizda boʻlgani kabi tumanimizda ham inson va tabiat oʻrtasidagi uygʻunlik, ona zaminga mehr va eʼtibor yaqqol ifodasini topadigan, bugungidek tinch-osoyishta va dorilomon hayotni qadrlashga daʼvat etuvchi  maʼnaviy-maʼrifiy tadbirlar allaqachon boshlanib ketdi.

Amudaryo tumanining Choykoʻl ovulida ham “Assalom, Navroʻzi olam!” deb nomlangan bayram sayli boʻlib oʻtdi.

Tadbirga ovul faollari, tabarruk nuroniylari va yoshlari, 42-sonli, 22-sonli va 59-sonli  umumiy taʼlim  maktablarining oʻqituvchilari, oʻquvchilari, 16-sonli maktabgacha  taʼlim tashkiloti xodimlari va tarbiyalanuvchilari ishtirok etdilar.

Bayram sayliga chorlovchi surnay navolari yangradi. Musiqa, bayramona bezatilgan sahnadagi koʻrinishlar kishi koʻnglicha  ajib bir xushnudlik bagʻishlaydi.

Choykoʻl ovul fuqarolar yigʻini mutasaddilari va mahalla faollari barchani Navroʻz ayyomi bilan qutlab, bahoriy taomlar, turli pishiriqlar qoʻyilgan bayram dasturxoniga taklif etdi. Hududdagi umumiy oʻrta taʼlim maktablari iqtidorli oʻquvchilarining qoʻl mehnati bilan yaratilgan turli liboslar oʻyinchoqlar namunalilari, varraklarni tomosha qilib, yurtimizda oʻtgan yillarda nishonlangan Navroʻz bayrami, yangilanayotgan Oʻzbekistonning bugungi kuniga doir suratlarini tomosha qilib, bir olam taassurotlar olgan katta-yu kichik  toʻkin dasturxondan joy oldilar.

Tadbirda dorboz oʻyini, masxarabozlar chiqishlari, milliy xalq  oʻyinlari – kurash, arqon tortish musobaqalarini ishtirokchilar miriqib tomosha qildilar.

Shuningdek, 42-sonli, 22-sonli, 59-sonli umumiy taʼlim maktablari iqtidorli oʻquvchilari, shuningdek, 16-sonli maktabgacha taʼlim  tashkilotlari tarbiyalanuvchilari ijrosidagi Navroʻzi olamni, ona  Vatanimizni, tinchlik-osoyishtalikni tarannum etuvchi kuy-qoʻshiqlar, ifodali yod aytilgan sheʼrlar bayram sayli shukuhini yana ham oshirdi, yigʻilganlarga yuqori kayfiyat baxsh etdi.

Bayram dasturxoniga qoʻyilgan bugʻdoy maysasini koʻzlariga surib, sumalakdan totib, yurtimizning Navroʻzini olqishlagan nuroniylar “Yurtim ilohim har kuning bayram boʻlsin”, deya duo qildilar.

Oygul RAJABOVA.