Xitoy ovulida yoshlar sayli oʻtkazildi

Yoshlarning boʻsh vaqtini mazmunli tashkil etish hamda ularning adabiyot sanʼat, sport, kitobxonlik va kompyuter texnologiyalariga qiziqishlarini oshirish maqsadida Prezidentimiz tomonidan ishlab chiqilgan “Beshta muhim tashabbus” qisqa vaqt mobaynida ommalashib, qamrov darajasi kundan-kunga ortib bormoqda.

“Besh muhim tashabbus” doirasida Amudaryo tumanida sektorlar kesimi boʻylab oʻtkazilayotgan tadbirlarda mahalladagi yoshlar yetakchilari oʻrni alohida diqqatga sazovordir.

10-mart kuni tuman hokimligi, Yoshlar ishlari agentligi tuman boʻlimi, Turizm va sport boʻlimi hamda hamkor tashkilotlar bilan birgalikda Xitoy ovuli hududida joylashgan 85-sonli umumtaʼlim maktabida yoshlar sayli oʻtkazildi.

Yoshlar saylida 3-sektor hududiga qarashli Kuyuk-koʻpir, Boʻz yop, Zahiriddin Muhammad Bobur nomli ovullar hamda Oʻzbekiston, Qizilcholi, Jumurovul, Tor yop, Namuna mahallalari, shuningdek, Jumurtov shaxarchasi yoshlari faol qatnashishdi.

Ertalabdan boshlangan sport tadbirlari kun boʻyi davom qildi. Dastlab “Salomatlik uchun 5 ming qadam” shiori ostida piyoda yurish marafoni boʻlib oʻtdi.

Shundan soʻng, 85-sonli maktabda yoshlar ishtirokidagi tadbirlar boshlandi. Tadbirni Xitoy ovul fuqarolar yigʻini raisi Davlatboy Atajanov ochib berdi. Shuningdek tadbirda, tuman Ichki ishlar boʻlimi boshligʻi oʻrinbosari Muxtor Rahmatullayev, 3-sektor kotibi Farhod Abdurahimov, mehnat faxriysi Kamol Oʻrazboyev hamda Yoshlar ishlari agentligi tuman boʻlimi boshligʻi Sardor Ismoilovlar soʻzga chiqib, mamlakatimizda yosh avlodni maʼnaviy barkamol inson etib tarbiyalash, ularning boʻsh vaqtlarini samarali oʻtkazishni tashkil etish, sanʼat, sport, axborot texnologiyalari, kitob oʻqishga qiziqishlarini oshirish boʻyicha “Beshta muhim tashabbus” doirasida keng koʻlamli ishlar amalga oshirilayotganligini taʼkidladilar.

Tadbirda dastlab birinchi tashabbus doirasida madaniyat, adabiyot, sanʼatga qiziquvchan yoshlar oʻz iqtidorlarini namoyish etishdi. Tasviriy sanʼat asarlari, oʻquvchilar tomonidan tayyorlangan milliy hunarmandchilik buyumlari hamda badiiy chiqishlar yigʻilganlarda katta taassurot qoldirdi.

Shundan soʻng ikkinchi tashabbus doirasida Bobur nomli ovul yoshlaridan iborat “Shunqorlar” jamoasining harbiy chiqishlari, Kuyuk koʻpir ovuli yoshlarining esa taekvandoning WTF turi boʻyicha chiqishlari namoyish etilib, yoshlarning sportga boʻlgan qiziqshlari yanada oshishiga hizmat qildi.

Yoshlar saylida har bir mahalladan tashrif buyurgan yoshlar ishtirokida sportning futbol, voleybol, stol tennisi, shaxmat-shashka musobaqalari ham boʻlib oʻtdi. Har bir musobaqa shiddatli va murosasiz tarzda kechib, hakamlar hayʼati tomonidan odilona baholab borildi.

Tadbir yakunida yoshlar saylida faol ishtirok etgan barcha yoshlarga tuman hokimligining esdalik sovgʻalari torshirildi.

Albatta, bunday saʼy-harakatlarning tub zamirida yoshlarni ilm-maʼrifat, sogʻlom eʼtiqod bilan maʼnaviy yuksalishlariga koʻmaklashish maqsad qilingan. Shu bois “Besh tashabbus” doirasida tashkil etilgan yoshlar sayli ham oʻquvchi-yoshlarni oʻz iqtidorlarini namoyon qilishga, yurtimizda amalga oshirilayotgan keng koʻlamdagi islohotlarga kamarbasta boʻlishga yetaklashi bilan ahamiyatlidir.

Tuman hokimligining Axborot xizmati