“Dugonalar bormisiz?” deb nomlangan tadbir boʻlib oʻtdi

Ayolning nafosati va nazokati, vafo va sadoqati, aql-zakovati va fidoyiligi asrlar mobaynida yer yuzida hayot davomiyligi va abadiyligiga asos boʻlib keladi. Shu bois ham dunyodagi eng buyuk sanʼat asarlari, qoʻshiq va qasidalar, meʼmoriy obidalar ayollar shaʼniga bagʻishlangandir.

Yurtimizda xotin-qizlarni har tomonlama qoʻllab-quvvatlash, onalik va bolalikni muhofaza qilish, oila mustahkamligini taʼminlash davlat siyosati darajasida ekanligi bilan har qancha faxrlansak arziydi. Prezidentimiz tomonidan qabul qilinayotgan qaror va farmonlar tumanimizdagi xotin-qizlarni har tomonlama qoʻllab-quvvatlashga xizmat qilmoqda.

8-mart Xalqaro xotin-qizlar bayrami oldidan ayol-qizlarga yuqori kayfiyat ulashish qolaversa, ularning qobilyat hamda isteʼdodlarini roʻyobga chiqarish maqsadida har yili muntazam ravishda turli koʻrik-tanlovlar va sport musobaqalari oʻtkazilib kelinadi.

Jumladan, 5-mart kuni Bolalar musiqa va sanʼat maktabida “Dugonalar bormisiz?” deb nomlangan tadbir boʻlib oʻtdi. Tadbirda tumanimizdagi Maktabgacha taʼlim tashkiloti rahbarlari qatnashib belgilangan shartlar asosida oʻzaro bellashdilar.

1-shart “Tanishtirish” sharti boʻlib unda ishtirokchilar oʻz hayoti va ish faoliyati bilan tadbir qatnashchilarini tanishtirib oʻtishdi. 2-shart “Rahbarning nutq maʼdaniyati” shartida har bir rahbar oʻz notiqlik qobilyatini namoyon qilib, rahbar qanday boʻlishi lozimligi va uning muomala madaniyati va kiyinish odobi haqida oʻz fikr-mulohazalarini bildirishdi. 3-shart “Alla” aytish sharti boʻlib, bunda har bir ishtirokchining oʻgit va nasihatlarga yogʻrilgan allalari tinglandi. Ushbu shart qizlarni onalikka tayyorlash va ularning qalbida muqaddas oilaga nisbatan hurmat ruhini yanada keng qaror toptirishga xizmat qildi. 4-shart esa “Bayramga tabriknoma” deb nomlandi. Bunda har bir ishtirokchi oʻz ijodkorlik qobilyatlaridan kelib chiqib oʻz onasi va opa-singillarini noodatiy ravishda tabrikladilar.

Tadbir doirasida tashkil etilgan har bir shart ayol-qizlarning isteʼdodini aniqlashga hamda rivojlantirishga hizmat qildi.

Hakamlar hayʼati aʼzolari, Pardagul Oʻrazbayeva, Sharifa Seyitova, Sanobar Xoʻjamuratova hamda Nilufar Davletovalar ishtirokchilarning har bir chiqishlarini adolatli va shaffof tarza baholab bordilar.

Yakuniy natijalarga koʻra, “Eng namunali direktor” nominatsiyasi boʻyicha Sevara Oʻrazbayeva, “Eng faol direktor” nominatsiyasi boʻyicha Shaxnoza Qlicheva, “Eng ijodkor direktor” nominatsiyasi boʻyicha Zebo Hayitbayeva, “Eng bilimdon direktor” nominatsiyasi boʻyicha Aynura Rahimova hamda “Eng tashabbuskor direktor” nominatsiyasi boʻyicha Gulnoza Qurbanbayevalar gʻolib deb topildi. Ishtirokchilar tuman Maktabgacha taʼlim boʻlimi tomonidan faxriy yorliq hamda esdalik sovgʻalari bilan taqdirlandi.

Tadbir yakunida soʻzga chiqqanlar barcha ayol-qizlarni 8-mart Xalqaro xotin-qizlar kuni bilan samimiy muborakbod etib kelgusi ish faoliyatlarida muvafaqqiyatlar tilashdi.

Tuman hokimligining Axborot xizmati