Doʻrman ovulida davra suhbati oʻtkazildi

Amudaryo tumanida faoliyat yuritayotgan “Jayxun ilhomlari” nodavlat notijorat tashkiloti tomonidan amalga oshirilayotgan Oliy Majlis huzuridagi nodavlat notijorat tashkilotlarini va fuqarolik jamiyatining boshqa institutlarini qoʻllab-quvvatlash fondi tomonidan moliyalashtirilgan “Yoshlar – yangi Oʻzbekiston bunyodkorlari” loyihasi kalendar rejasi boʻyicha tuman maktablarida, korxona, tashkilotlarda, ovul fuqarolar yigʻinlarida yoshlar tarbiyasiga oid turli tadbirlar, uchrashuvlar oʻtkazilmoqda.

Navbatdagi “Oilada farzand tarbiyasining ahamiyati, yoshlarni zararli illatlar va turli axloqsizliklardan himoya qilishda ota-onalar va mahallaning oʻrni” mavzusidagi davra suhbati Doʻrman ovul fuqarolar yigʻinida boʻlib oʻtdi. Davra suhbatida mahalla faollari, imomlar, maʼnaviyat targʻibotchilari ishtirok etdilar.

Davra suhbatini Doʻrman ovul fuqarolar yigʻini raisi Atamurod Yusupov kirish soʻzi bilan ochdi va boshqarib bordi.

Aytish joizki, tashkilotning grant loyihasi doirasida oʻtkazilayotgan tadbirlardagi “Oilada farzand tarbiyasining ahamiyati, yoshlarni zararli illatlar va turli axloqsizliklardan himoya qilishda ota-onalar va mahallaning oʻrni, “Yoshlar maʼnaviyatini yuksaltirish ularni kitobxonlikka jalb qilish orqali giyohvandlik, ichkilikbozlik, turli axloqsizliklardan himoya qilish”, “Yoshlar oʻrtasida sogʻlom turmush tarzi koʻnikmalarini keng targʻib qilish, ularni giyohvandlik, ichkilikbozlik, turli axloqsizliklardan himoya qilish” kabi mavzulardagi suhbatlar ishtirokchilarda katta qiziqish uygʻotmoqda.

Tadbirda “Jayxun ilhomlari” nodavlat notijorat tashkilotining raisi Oʻrozali Reyimov yoshlar tarbiyasiga oid grant loyihasining mazmun-mohiyati, ahamiyati, loyiha doirasida amalga oshiriladigan ishlar va ulardan kutilayotgan natijalar haqida soʻz yuritdi. Grant loyihasi doirasida turli uchrashuvlar oʻtkazilayotgani, aholi oʻrtasida keng tarzda tushuntirish ishlarini olib borish uchun ijodkor shoir va yozuvchilar, maʼnaviyat targʻibotchilari, shifokorlar, imomlar, mahallaning faol yoshlari jalb qilingani taʼkidlandi.

Davra suhbatida tuman mahalla va oilani qoʻllab-quvvatlash boʻlimi mutaxassisi Rahmonjon Bobojonov tumanimizda yoshlar tarbiyasiga oid olib borilayotgan ishlar, ular uchun yaratib qoʻyilgan imkoniyatlar, tadbirkorlikni yoʻlga qoʻyish borasidagi imtiyozlarga keng turda toʻxtalib oʻtdi.

Doʻrman ovul fuqarolar yigʻini raisi Atamurat Yusupov esa mahalla hududidagi muammolar va ularni ijobiy hal etish borasida oʻz fikr-mulohazalarini bildirdi.

Davra suhbati ishtirokchilari boʻlgan mahalla faollari va yoshlar oʻzlarini qiziqtirayotgan savollar va muammolarni oʻrtaga tashladilar.

Doʻrman ovulida yangidan ish boshlagan hokim yordamchisi Mahmud Norboyev, Doʻrman ovul fuqarolar yigʻini yoshlar yetakchisi Sherali Jumamurodov savollarga javob berar ekan, mahalla yoshlarini kutib turgan keng istiqbolli yoʻllar haqida gap ochib, yoshlar koʻnglida ulkan umid uchqunlarini uygʻotdi.

Jumladan, ovul fuqarolar yigʻini hududida yoshlarni ish bilan taʼminlash maqsadida 4 gektar maydonda issiqxona quriladi. Oliy oʻquv yurtiga kirish maqsadida tayyorgarlik koʻrish uchun tuman markaziga qatnayotgan yoshlarga endi mahalla hududida bilim beriladi. Bu ishlarni amalda ijro etish uchun mahalla hududida alohida bino ajratib beriladi, maxsus, malakali oʻqituvchilar jalb qilinadi.

Doʻrman ovul fuqarolar yigʻinida olib borilayotgan ishlar mamlakatimizda yoshlar tarbiyasi boʻyicha amalga oshirilayotgan islohotlarning amaldagi ijobiy koʻrinishi, desak aslo mubolagʻa boʻlmaydi.

Oʻrozali REYIMOV.