BIR AYoL HAYoTIDAGI KOʻP YILLIK MUAMMOLAR IJOBIY HAL ETILDI

Prezidentimizning tegishli Farmoniga koʻra mamlakatimizning shahar-tumanlarida Adliya boʻlimlari tashkil etilib, faoliyatini boshlagani xalqimizning orzulari roʻyobi boʻldi desak, adashmagan boʻlamiz. Chunki oʻtgan davr mobnaynida boʻlimlar aholining ogʻirini yengil qilib, ularning huquqlari, erkinliklari va qonuniy manfaatlarining soʻzsiz himoya qilinishini taʼminlab kelmoqda.

Shuningdek, adliya boʻlimlari tomonidan davlat hokimiyati va boshqaruvi organlarida qonuniylikni taʼminlash va amaldagi qonunchilik talablariga rioya qilinishi doimiy ravishda oʻrganilib, tahlil qilinmoqda, natijasi boʻyicha takliflar, taʼsir choralari koʻrilmoqda. Yangi qabul qilinayotgan qonun, farmon va qarorlar yuzasidan targʻibot tadbirlari oʻtkazish orqali aholining huquqiy ongi va madaniyati yuksalishiga hissa qoʻshmoqda, jamiyatimizda, davlatimizda amalga oshirilayotgan islohotlarning samaradorligiga erishishga harakat qilinmoqda.

Amudaryo tumani Adliya boʻlimida ham fuqarolar huquqlarini himoya qilish boʻyicha chora-tadbirlarni amalga oshirishga, oʻz vakolati doirasida jismoniy va yuridik shaxslarning murojaatlarini koʻrib chiqishga alohida eʼtibor qaratilmoqda. Muammolar oʻz vaqtida hal etilayotganligini aholi haqli eʼtirof etmoqda, bu boʻlim nufuzi oshishiga xizmat qilmoqda.

Yaqinda tumanimizning Kuyuk koʻpir ovulida istiqomat qiluvchi fuqaro Umid Galiyeva fuqarolik pasporti yoʻqligi sababli nogironligi boʻlsa-da, nogironlik nafaqasiga chiqa olmayotganini, mazkur masalada yordam berishini soʻrab boʻlimga murojaat qilgan edi. Tuman Adliya boʻlimi ushbu murojaatni ijobiy hal qilish uchun tuman Ichki ishlar boʻlimining Migratsiya va fuqarolikni rasmiylashtirish boʻlinmasini jalb qilib, hamkorlikda Galiyeva Umid Tadjibayevnaga shaxsini tasdiqlovchi ID karta olishga yordam berdi. Bu bilan ushbu fuqaroning 19 yillik shaxsini tasdiqlovchi hujjat olish uchun boʻlgan sarsonligiga chek qoʻyildi.

Boʻlim masʼullari bu bilan cheklanmadi. Chunki ushbu fuqaroning nogironligi boʻlsa-da, shaxsini tasdiqlovchi hujjati yoʻqligi sabab nogironlik nafaqasiga chiqish masalasi bir necha yildan beri hal etilmay kelayotganini inobatga olib, fuqaro 2-sonli Amudaryo tumanlararo Tibbiy-ijtimoiy ekspert komissiyasiga tibbiy koʻrikka olib borildi. Qisqa muddatda Umid Galiyevaga 2-sonli Amudaryo tumanlararo Tibbiy-ijtimoiy ekspert komissiyasining 2022-yil 11-fevraldagi xulosasi bilan 2-guruh nogironligi tayinlandi.

Bundan tashqari murojaatni oʻrganish davomida Umid Galiyeva shaxsini tasdiqlovchi hujjati boʻlmaganligi sababli turmush oʻrtogʻi bilan qonuniy nikohdan oʻta olmaganligi, katta farzandining tugʻilish guvohnomasini esa “yolgʻiz ona” maqomi bilan olishga majbur boʻlganligi aniqlandi.

Tuman Adliya boʻlimining aralashuvi bilan fuqaroning bu muammolari ham qisqa fursatda hal etildi. Yaʼni Umid Galiyeva va turmush oʻrtogʻi Qalbay Nuraddinov belgilangan tartibda tuman fuqarolik holati dalolatnomalarini yozish boʻlimida qonuniy nikohdan oʻtishdi va ularning katta farzandi Nuraddinova Nursulu Qalbay qizining tugʻilganlik haqidagi guvohnomasining “otasi” grafasidagi kamchiliklar toʻgʻrilanib, unga Nuraddinov Qalbay Saʼdullayevichning otaligi belgilandi.

Fuqaro Umid Galiyevaning murojaatiga kompleks yondoshilib, murojaati toʻliq qanoatlantirildi.

Boʻlim faoliyatida buningdek misollar juda koʻp. Yurtdoshlarimizni yillar mobaynida qiynab kelayotgan huquqiy muammolar Adliya boʻlimi xodimlari tomonidan ijobiy hal qilinmoqda.

Oygul RAJABOVA.