7-SONLI MAKTABDA OʻQUVChILARNING SIFATLI TAʼLIM OLIShLARI UChUN BARChA ShAROITLAR YaRATILGAN

Mamlakatimizda uzluksiz taʼlim tizimini isloh qilish, takomillashtirish, yangi sifat bosqichiga koʻtarish, unga ilgʻor pedagogik axborot texnologiyalarini joriy etish hamda taʼlim samaradorligini oshirish davlat siyosati darajasidagi masalalardan biri hisoblanadi. Chunki, jamiyatning ertangi kuni, kelajagi taʼlim tizimining qay darajada rivojlangani bilan belgilanadi.

 Oq oltin ovulidagi 7-son umumiy oʻrta taʼlim maktabi 1999-yildan buyon barcha qulayliklarga ega boʻlgan binoda faoliyat yuritib kelmoqda. Bugungi kunda 422-oʻringa moʻljallangan ushbu maktabda 50 nafar pedagog xodimlar 410 nafar oʻquvchilarga bir smenada taʼlim-tarbiya berib kelmoqda. Maktabdagi 50 nafar pedagog xodimlarning 47 nafari oliy maʼlumotli, 2 nafari tugallanmagan oliy maʼlumotli, 1 nafar oʻrta maxsus maʼlumotli oʻqituvchilar boʻlib, ularning 2 nafari oliy toifali, 12 nafari birinchi toifali, 15 nafari ikkinchi toifali va 21 nafari mutaxassis oʻqituvchilardir.

 Maktabda darslardan keyin turli toʻgarak mashgʻulotlarini oʻtish uchun barcha shart-sharoitlar bor. Barcha sinflarda oʻqitiladigan fanlar boʻyicha fan toʻgaraklari tashkil qilingan boʻlib, oʻquvchilar qiziqishlari boʻyicha toʻgarak mashgʻulotlariga jalb qilingan. Maktabda beshta tashabbus doirasida ham sport, musiqa, tasviriy sanʼat, kompyuter savodxonligi, “Chevar qizlar” toʻgaraklari faoliyat koʻrsatmoqda. Shuningdek, sportning voleybol, basketbol, futbol, stol tennisi va shaxmat-shashka turlaridan toʻgaraklar tashkil qilingan. Undan tashqari, ovuldagi Dehqonobod va Paxtaobod mahallalarida yashovchi uyushmagan yoshlarga ham har kuni boʻsh vaqtlarida maktab sport zalida turli sport mashgʻulotlari bilan shugʻullanishlariga imkoniyatlar yaratilgan.

 Maktab kutubxonasida bugungi kunda 1 ming 101 nusxa va 808 nomdagi badiiy, ijtimoiy-siyosiy, maʼnaviy-maʼrifiy va sohalarga oid, 129 nomdagi audio kitoblar mavjud boʻlib, kitobxon yoshlarning maktab kutubxonasidan foydalanishlari uchun yetarlicha adabiyotlar va sharoitlar bor. Maktab kutubxonasida kitobsevar oʻquvchilar tomonidan maktab ijodiy-madaniy ishlar targʻibotchisi Adolat Yangiboyeva va kutubxonachi Muyassar Atajanovalar boshchiligida turli adabiy-badiiy kechalar, mushoiralar, “Bir asar mazmuni yuzasidan bahs munozaralar” kabi tadbirlar oʻtkazib kelinmoqda.

Maktab kutubxonasidan nafaqat oʻquvchilar, balki ovul aholisining turli yoshdagi aʼzolari ham foydalanib kelmoqdalar. Kutubxona fondi koʻpayishiga maktabni bitirib ketgan sobiq oʻquvchilar ham oʻz hissalarini qoʻshishmoqda. Ayniqsa, muntazam ravishda oʻtkazilib kelinayotgan “Oʻzim oʻqigan maktabga kitob sovgʻa qilaman” tadbirida sobiq oʻquvchilar ishtirok etib, maktab kutubxonasiga badiiy adabiyotlar sovgʻa qilishmoqda. Shuningdek, 3-sektor masʼullari tomonidan ham 12 nomda 42 dona kitob sovgʻa qilindi.

Maktabga 2020-yil dekabr oyida 16 dona kompyuter texnikasi oʻrnatildi. Bugungi kunda maktab lokal tarmoqqa ulangan boʻlib, internetdan foydalanish imkoniyati kengaydi. Kompyuter xonasida darsdan boʻsh vaqtlarida oʻqituvchilarning AKTdan foydalanib, turli metodik maʼlumotlar, yangiliklarni olishlari uchun sharoit yaratilgan. Maktabda oʻquvchilar uchun ham ikkita kompyuter toʻgaragi tashkil qilingan. “Kompyuter savodxonligi” fan toʻgaragiga maktabning 5-11-sinf oʻquvchilari doimiy qatnashib kelmoqdalar. Davlatimiz rahbari tashabusi bilan belgilangan “Bir million dasturchi” loyihasi asosida tashkil qilingan “Yosh dasturchi” toʻgaragi ishtirokchilaridan 82 nafari esa yosh dasturchi sertifikatini olishga muvaffaq boʻldilar.

Davlatimiz rahbari taʼkidlaganidek, taraqqiyotning tamal toshi ham, mamlakatni qudratli, millatni buyuk qiladigan kuch ham ilm-fan, taʼlim va tarbiyadir. Shu boisdan ham 7-sonli maktabning oʻqituvchi-pedagoglari oʻquvchilarni yurt kelajagiga munosib, bilimli, komil insonlar qilib tarbiyalashga, chuqur bilim berishga harakat qilishmoqda.

Oybek Durdiyev, 7-sonli maktab direktori oʻrinbosari.