MAJBURIY MEHNATNING OLDINI OLISh BOʻYIChA YIGʻILISh BOʻLIB OʻTDI

2. 26-yanvar kuni Amudaryo tumani Yuridik xizmat koʻrsatish markazi binosida tumanda faoliyat yuritayotgan tashkilot, muassasa hodimlari  ishtirokida “Majburiy mehnatning oldini olish” mavzusida yigʻilish boʻlib oʻtdi.  

Yigʻilishdan koʻzlangan maqsad, majburiy mehnat tushunchasi, majburiy mehnatning oldini olish va bunday holat yuz bergan taqdirda,  oʻz haq-huquqlarini himoya qila bilish, majburiy mehnatga jalb qilgan rahbar hodimlarga belgilangan javobgarlik turlari haqida maʼlumot berishdan iborat boʻldi.

Yigʻilishni tuman Yuridik xizmat koʻrsatish markazi  boshligʻi Nilufar Jumaniyozova ochdi va olib bordi. Shuningdek, yigʻilishda bosh yuriskonsult Mansur Matyusupov ham ishtirok etib mavzu yuzasidan oʻz fikr-mulohazalarini bildirib oʻtdi.

Yigʻilishda mehnat qonunchiligida belgilab qoʻyilgan qoida va mezonlarga toʻliq amal qilinishi lozimligi, haftasiga 5 kun ishlovchi hodimlarga 8 soatlik, 6 kun ishlovchi hodimlarga 7 soatlik ish vaqti joriy qilinganligi, hodimlar belgilangan vaqtdan ortiq ish joyida ushlab turilmasligi, majburiy tarzda hashar ishlariga jalb qilinmasligi, bordiyu bunday holat yuz bersa, rahbar maʼmuriy javobgarlikka tortilishi haqida keng turda maʼlumotlar berib oʻtildi.

Nilufar Jumaniyozova hodimlarga murojaat qilar ekan, demokratik islohatlar takomiliga yetkazilib rivojlanayotgan mamlakatda hech qanday majburiy mehnat tushunchasi boʻlmasligi, barcha rahbar va xodimlar oʻz haq-huquqlari va majburiyatlarini bilishlari lozimligini taʼkidladi.

Biroq, ming afsuski, yuqoridagi qonun hujjatlari va koʻrilayotgan chora-tadbirlarga qaramasdan, baʼzi bir rahbar va xodimlarning qonun hujjatlarini yaxshi bilmasligi tufayli hali hamon qonun buzilish holatlari uchrab turadi.  

Bundan tashqari yigʻilishda, majburiy mehnatga kirmaydigan mehnat turlari haqida ham maʼlumot berib oʻtildi. Bunda asosan, harbiy yoki muqobil xizmatda boʻlgan fuqarolar, huquq-tartibot organlari hodimlari, favqulodda vaziyat organlari xodimlarining mehnatidan foydalanish majburiy mehnat turiga kirmasligi aytib oʻtildi.

Shu oʻrinda taʼkidlab oʻtish joizki, majburiy mehnatga qarshi kurashish boʻyicha mamlakatimizda qator ijobiy oʻzgarishlar amalga oshirilmoqda. Tuman Yuridik xizmat koʻrsatish boʻlimi va Adliya boʻlimi hodimlari  zimmasiga bu borada masʼuliyatli vazifalar yuklatilgan boʻlib, ularni amalga oshirish, avvalambor, majburiy mehnatning oldini olish boʻyicha targʻibot ishlarini kuchaytirish choralari koʻrilmoqda.

Yigʻilishda fuqarolarning kafolatlangan mehnat huquqlarini taʼminlash boʻyicha hamda bolalar mehnati va majburiy mehnatni yuzaga keltiradigan har qanday holatning oldini olish, majburiy mehnatga yoʻl qoʻymaslikka doir chora-tadbirlarni kuchaytirish lozimligi boʻyicha takliflar tinglandi. Xodimlar oʻzlarini qiziqtirgan savollar bilan murojaat qilib tegishlicha javoblar oldilar.

F.Eshimbetova