Huquqbuzarliklar profilaktikasi boʻyicha ish hujjatlarini yuritishga bagʻishlangan oʻquv-seminar oʻtkazildi

Oʻzbekiston Respublikasi Konstitutsiyasining 20-moddasida fuqarolar oʻz huquq va erkinliklarini amalga oshirishda boshqa shaxslarning, davlat va jamiyatning qonuniy manfaatlari, huquqlari va erkinliklariga putur yetkazmasliklari shartligi alohida taʼkidlangan. Oʻzbekiston Respublikasi Oliy Sudi rayosatining 2021-yil 9-noyabrdagi “Sudlar tomonidan 2021-yilning birinchi yarmida yengil tan jarohat yetkazish va mayda bezorilik bilan bogʻliq koʻrilgan maʼmuriy huquqbuzarlik toʻgʻrisidagi ishlar boʻyicha sud amaliyotini umumlashtirish natijalari haqida”gi 59-21-sonli Qarorida ham fuqarolar oʻz huquq va erkinliklarini amalga oshirishda boshqa shaxslarning, shuningdek davlat va jamiyatning qonuniy manfaatlariga putur yetkazmasligi, bu borada sudlarning odil va shaffof ish yuritishlariga eʼtibor qaratilgan.

Joriy yilning 12-yanvar sanasida Amudaryo tumani Madaniyat markazi binosida Amudaryo tuman Ichki ishlar boʻlimi profilaktika inspektorlari malakasini oshirish maqsadida boʻlib oʻtgan oʻquv-seminar mashgʻulotida ham aynan ana shu masalaga alohida eʼtibor qaratildi.

Mazkur oʻquv-seminar ishida Jinoyat ishlari boʻyicha Amudaryo tuman sudining raisi Jasur Oʻrozboyev, tuman Ichki ishlar boʻlimi boshligʻining oʻrinbosari Muxtor Rahmatullayev, tuman Ichki ishlar boʻlimi huquqbuzarliklar profilaktikasi boʻlinmasi boshligʻining oʻrinbosari Orifjon Qosimovlar Oʻzbekiston Respublikasi Oliy Sudi Rayosatining “Sudlar tomonidan 2021-yilning birinchi yarmida yengil tan jarohat yetkazish va mayda bezorilik bilan bogʻliq koʻrilgan maʼmuriy huquqbuzarlik toʻgʻrisidagi ishlar boʻyicha sud amaliyotini umumlashtirish natijalari haqida”gi Qarorida koʻrsatilgan topshiriq boʻyicha belgilangan vazifalar yuzasidan mashgʻulotlar olib borishdi.

Oʻquv-seminar mashgʻulotida Oʻzbekiston Respublikasi Maʼmuriy javobgarlik toʻgʻrisidagi Kodeksning 52- va 183-moddalari bilan bogʻliq ish boʻyicha materiallarni toʻplashda amaliyotda yuzaga kelayotgan muammolar, ish hujjatlariga ilova qilinishi lozim boʻlgan hujjatlar xususida zarur tushuntirishlar berildi. Xususan, huquqbuzar qarshisiga toʻplanadigan hujjatlar yigʻma jildini tayyorlash, huquqbuzar shaxsning fuqarolar, shuningdek, davlat va jamiyatning qonuniy manfaatlariga eʼtibor qaratgan holda materiallarni jildga kiritish, har qanday maʼmuriy huquqbuzarlik boʻyicha ish materiallarini toʻplashda yuzaga keladigan muammolar, ish hujjatlariga ilova qilinishi lozim boʻlgan boshqa qoʻshimcha hujjatlar haqida ham alohida toʻxtalib oʻtildi.

Oʻquv-seminar mashgʻulotlari yakunida ichki ishlar boʻlimi profilaktika inspektorlari masʼullarga oʻzlarini qiziqtirgan savollar bilan murojaat qildilar va barcha savollariga batafsil javoblar oldilar.

Boʻlib oʻtgan oʻquv-seminar mashgʻulotlari profilaktika inspektorlari uchun fuqarolar oʻz huquq va erkinliklarini amalga oshirishda nimalarga eʼtibor berishlari zarurligi, shuningdek, Oʻzbekiston Respublikasi Maʼmuriy javobgarlik toʻgʻrisidagi Kodeksning 52- va 183-moddalari bilan bogʻliq koʻrilgan maʼmuriy huquqbuzarlik toʻgʻrisidagi ishlar boʻyicha sud amaliyotini umumlashtirish haqida oʻz bilimlarini mustahkamladilar.

Robiya YOʻLDOShEVA.