YuRIDIK XIZMAT KOʻRSATISh MARKAZI FAOLIYaTI TARTIBI, FUNKTsIYa VA VAZIFALARI TUShUNTIRILDI

Shu yil 1-oktyabrdan boshlab respublikamizning barcha shahar va tumanlarida Qoraqalpogʻiston Respublikasi Adliya vazirligi, viloyatlar va Toshkent shahar adliya boshqarmalari huzurida yuridik xizmat koʻrsatish markazlari ish boshladi.

Yuridik xizmat koʻrsatish markazlari davlat tashkilotlariga yuridik xizmat koʻrsatish, xodimlarning huquqiy savodxonligi va huquqiy madaniyatini oshirish, mulkiy hamda boshqa huquqlari va qonuniy manfaatlarini himoya qilish kabi yoʻnalishlarda faoliyat koʻrsatadi.

28-oktyabr kuni tuman Madaniyat boʻlimida Yuridik xizmat koʻrsatish markazi masʼullari tomonidan Prezidentimizning bu boradagi Qarori mazmun-mohiyatini tushuntirish maqsadida yigʻilish tashkil etildi. Yigʻilishda Markaz boshligʻi Nilufar Jumaniyozova va bosh yuriskonsult Saidjon Sultonovlar qatnashishdi.

 Markaz masʼullari tuman darajasidagi davlat organlari yuridik xizmatlari faoliyatidagi muammolarni bartaraf etish maqsadida Prezidentimizning “Davlat organlari va tashkilotlariga yuridik xizmat koʻrsatish faoliyatini yanada takomillashtirish chora-tadbirlari toʻrisida”gi Qarori qabul qilingani, mazkur Qaror bilan Markazlarning maqomi, faoliyat tartibi, funktsiya va vazifalari belgilab berilgani xususida soʻz yuritishdi.

Markaz faoliyati xususida tushuncha berib, asosiy yoʻnalishlari yuridik xizmat koʻrsatiladigan davlat organlari va tashkilotlari faoliyatini huquqiy jihatdan taʼminlash, davlat tashkilotlariga sifatli va malakali yuridik yordam koʻrsatish, davlat tashkilotlari xodimlarining huquqiy savodxonligi va huquqiy madaniyatini oshirish, davlat tashkilotlarining mulkiy hamda boshqa huquqlari va qonuniy manfaatlari oʻz vaqtida, har tomonlama va samarali himoya qilinishini taʼminlash, davlat tashkilotlari tomonidan qabul qilinayotgan hujjatlarning qonuniy hamda har tomonlama puxta va sifatli boʻlishini taʼminlashdan iborat ekanligini eʼtirof etishdi.

Shuningdek, yigʻilish davomida yuridik xizmat markazlarining vazifalari, xizmat koʻrsatiladigan tashkilotlar bilan oʻzaro munosabatlar, yaʼni “E-huquqshunos” elektron tizimi orqali hujjatlar almashinuvi haqida tushuntirish berildi.

Elektron tizimga ichki buyruq, shartnomalar va boshqa yuridik tusdagi hujjatlarning namunalarini kiritish hamda mavjud hujjatlar loyihalari namunalaridan erkin foydalanish, elektron tizimdan foydalanuvchi tashkilotlar tomonidan shaxsiy kabinetga kirish, har qanday hujjat loyihasi va unga tahliliy materiallarni tayyorlash, qayta ishlash va xulosa olish uchun markazlarga yuborish kabilar kiritilgan.

Markazlarning masʼul xodimlari tomonidan tegishli xulosa tayyorlash, hujjatlarni elektron raqamli imzo bilan tasdiqlagan holda, elektron tizimga biriktirish hamda oʻzaro hujjat almashish, elektron tizimdan foydalanuvchi tashkilotlar tomonidan markazlardan ijobiy xulosa olinganidan soʻng takrorlanmaydigan maxsus raqam berish va elektron tarzda qabul qilish hamda ushbu hujjatlarni avtomatik tarzda izchil ketma-ketlikda raqamlash kabilar amalga oshiriladi.

Oʻrnatilgan tartibga koʻra markazlar tomonidan yuridik xizmat koʻrsatilishi belgilangan tashkilotlar tomonidan markazlar bilan kelishilmagan holda yuridik tusdagi hujjatlar qabul qilinishiga yoʻl qoʻyilmaydi. Bunday hujjatlar yuridik kuchga ega emas hamda ular qabul qilingan paytdan eʼtiboran hech qanday huquqiy oqibatlarni keltirib chiqarmaydi. Xulosa qilib aytganda faoliyat Yuridik xizmat koʻrsatish markazlari toʻgʻrisidagi Nizomga asoslanib amalga oshiriladi.

Markaz masʼullari ishtirokchilar tomonidan berilgan savollarga batafsil javoblar berishdi.

N.Jumaniyozova, tuman Yuridik xizmat koʻrsatish markazi boshligʻi.