HAR DARSDA +3

Dialog

– Hello! How are you? Can you speak English?

– Nima deyapsiz? Tushunmadim.

– Privet, kak tebya zovut? Ti govorish po russkiy?

– A....

Muammo

Hozirgi kunda istalgan maktab oʻquvchisiga shunday savollar bersangiz, aksariyatigina siz bilan muloqot qila oladi. Deyarli 90 foiz 4-5-sinf oʻquvchilari sizning nima deyayotganingizni tushunmaydi ham, ayniqsa, qishloq joylarida... Hattoki, baʼzi maktab bitiruvchilari rus tilida oʻzining qaysi maktabda oʻqishini aytolmaydi.

Faraz qilaylik, shunday bitiruvchilardan biri maktabni tugatdi. OTMga ham kirolmadi. Endi ishlashga ketadi yoki yollanib ishlaydi, bu odatiy hol. Xoʻsh, Rossiyada yoki Toshkentda ishlamoqchi. Qayerda boʻlishidan, kim boʻlib ishlashidan qatʼiy nazar, til bilish bugungi kun talabi va ehtiyoji. Ammo bizda yuqoridagi holat...

Kim aybdor? Oʻquvchimi? Oʻquvchiga nimanidir chin dildan oʻrgatsangiz, qabul qilib oladi. Qizigʻi shundaki, bu yerda oʻqituvchi ham aybdor emas. U ham oʻziga yuklatilgan rejani bajaradi, tamom.

Taklif

Mening fikrimcha, oʻquvchi har bir darsga kirganida oʻqituvchisidan kam deganda 2 ta oʻzi uchun yangi maʼlumotni bilib olsa, bu hayotda, albatta, asqotadi.

Hurmatli ustozlar, agarda siz ingliz yoki rus tilidan dars bersangiz, bittagina iltimosim bor. Haftada 2-martadan, yil davomida kamida 60 soat dars oʻtasiz. Imkoni boʻlsa, har bir darsingizda oʻquvchilaringizga qiyin emas, soddagina 3 ta gap oʻrgatsangiz, yil davomida sinfingizdagilar 180 ga yaqin gap ayta oladi. Bu oʻquvchingiz uchun va siz uchun quvonarli boʻlishiga shubha yoʻq. Toʻgʻri, sinfda turfa xil oʻquvchilar oʻqiydi, ularni qiziqtira bilish endi sizning mahoratingizga bogʻliq. Umumtaʼlim maktabida oʻqituvchimiz aytgandilar: oʻqituvchi sermazmun dars oʻtishi uchun oʻzi zerikarli darsni tinglab koʻrishi hamda oʻquvchilarini zeriktirmaslik usullarini oʻylab topishi kerak.

Mana shunday qila olsangiz, sizga boʻlgan hurmatim yana ham oshar edi. Shunchaki, yangi shior: “Har darsda +3”.

Oddiygina taklif, lekin samarasi yaxshi boʻladi, deb oʻylayman.

Laylo OLIMOVA, OʻzJOKU xalqaro jurnalistika fakulteti talabasi.