Amudaryo tumani hokimi Sultonboy Yoʻldoshevning Qurbon hayiti munosabati bilan yurtdoshlarimizga tabrigi
Aziz vatandoshlar, qadrli yurtdoshlar!
Bugun butun musulmon olami qatori xalqimiz ham muqaddas islom dinidagi qutlugʻ bayram - Qurbon hayitini keng nishonlamoqda.
Necha asrlar davomida xalqimizning qalbidan mustahkam oʻrin olgan, iymon-eʼtiqodini yuksaltirib, jamiyatimizda bagʻrikenglik, oʻzaro hurmat va xayr-sahovat tuygʻularining barqaror boʻlishiga xizmat qilib kelayotgan ushbu muqaddas bayram bilan barcha yurtdoshlarimizni samimiy tabriklayman!
Bu qutlugʻ bayramning, umuman, islom dinining mazmun-mohiyatini oʻzida mujassam etgan sabr-qanoat va shukronalik, mehr-sahovat va bagʻrikenglik, tinchlik va osoyishtalikning, sogʻlik va salomatlikning qadriga yetish va boshqa koʻplab insoniy fazilatlar hamda hislatlar xalqimizning qon-qoniga singib ketgan, desak yanglishmaymiz.
Hayit ayyomida yaqinlarni yoʻqlash, ehtiyojmand oilalarga yordam qoʻlini choʻzish, oʻtganlar ruhiga Qurʼon tilovat qilish, yoshi ulugʻlarning duolarini olish kabi islomiy va insoniy fazilatlar yanada yaqqolroq namoyon boʻladi.
Afsuski, koronavirus pandemiyasi bu yil ham Qurbon hayiti bilan bogʻliq marosimlarni ommaviy miqyosda oʻtkazish, Hayit namozini jamoat boʻlib ado etishga maʼlum darajada toʻsqinlik qilmoqda. Mavjud vaziyatni toʻgʻri tushungan xalqimiz butun dunyodan ushbu ofatning tezroq ketishi, xalqimzning farovonligi va yurtimiz rivoji bundan ham ziyoda boʻlishini tilab duolar qilmoqda.
Muqaddas dinimizda insonlar doimo poklik va tozalikka buyurilgan. Asrlar osha mana shu tamoyilga amal qilib kelayotgan xalqimiz bugun ham hovli va uy-joylar, koʻcha va guzarlar, ovul va mahallar, qabriston va muqaddas qadamjolar saranjom-sarishtaligi, obodligiga katta eʼtibor qaratmoqda. Davlatimiz rahbari va hukumatimizning hududlarni obodonlashtirish, shahar va qishloqlarimiz qiyofasini tubdan yaxshilash, xalqimiz uchun munosib turmush sharoiti yaratish borasida amalga oshirayotgan ishlari ham ana shu ezgu maqsad bilan hamohangdir. Ayniqsa, mamlakatimiz mustaqilligining 30 yilligi nishonlanishiga oz fursatlar qolgan ushbu kunlarda qurilish va obodonlashtirish ishlari jadal surʼatlarda davom etmoqda.
Aziz yurtdoshlar!
Fursatdan foydalanib ushbu muqaddas ayyom bilan barcha vatandoshlarimizni, moʻmin-musulmonlarni chin qalbimdan samimiy tabriklayman!
Yaratgandan yurtimizga tinchlik, xalqimizga salomatlik va farovonlik, oilalarimizga baxt-u saodat soʻrab duoga qoʻl ochgan har bir yurtdoshimizning duolari mustajob, niyatlari ijobat boʻlsin! Qilayotgan qurbonlik va ehsonlaringiz Olloh dargohida qabul, murodingiz hosil boʻlsin!
Qurbon hayiti barchamizga muborak boʻlsin!
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
